வடசென்னை, சேலம் இல்ல... அடுத்து இங்கதான்! விஜய் பிரச்சாரத்தில் புதிய ட்விஸ்ட்

2026-ஆம் ஆண்டு தமிழக சட்டப்பேரவைத் தேர்தலை முன்னிட்டு, தமிழக வெற்றிக் கழகத்தின் தலைவர் விஜய், கடந்த செப்டம்பர் 13-ஆம் தேதி முதல் தமிழகம் முழுவதும் தனது சுற்றுப்பயணத்தை மேற்கொண்டு வருகிறார். இதன் ஒரு பகுதியாக, கடந்த செப்டம்பர் 20-ஆம் தேதி நாகப்பட்டினம் மற்றும் திருவாரூர் மாவட்டங்களில் அவர் தனது தேர்தல் பிரசாரத்தை மேற்கொண்டார்.

முன்னதாக, வரும் செப்டம்பர் 27-ஆம் தேதி வடசென்னை மற்றும் திருவள்ளூர் மாவட்டங்களில் பிரசாரம் செய்ய விஜய் திட்டமிட்டிருந்தார். ஆனால், அந்தப் பயணத்திட்டத்தில் மாற்றம் செய்யப்பட்டு, சேலம் மற்றும் நாமக்கல் மாவட்டங்களில் பிரசாரம் செய்ய உள்ளதாக அறிவிக்கப்பட்டது. தற்போது, அந்தப் பயணத்திட்டத்திலும் மீண்டும் ஒரு மாற்றம் ஏற்பட்டுள்ளது.

புதிய அறிவிப்பின்படி, வரும் செப்டம்பர் 27-ஆம் தேதி சேலத்திற்குப் பதிலாக கரூர் மாவட்டத்தில் விஜய் தனது பிரசாரத்தை மேற்கொள்ளவுள்ளார். இது தமிழக அரசியல் வட்டாரத்தில் பெரும் பரபரப்பை ஏற்படுத்தியுள்ளது.

இந்த சுற்றுப்பயணத்தின் படி, காலை 11 மணியளவில் நாமக்கல் மாவட்டத்தில் தனது உரையைத் தொடங்கும் விஜய், பின்னர் மாலை 3 மணியளவில் கரூர் மாவட்டத்தில் நடைபெறும் பொதுக்கூட்டத்தில் உரையாற்றுவார் என்று எதிர்பார்க்கப்படுகிறது.

அமைச்சர் செந்தில் பாலாஜியின் சொந்த ஊரான கரூரில் விஜய் பிரசாரம் மேற்கொள்வது, ஆளும் கட்சியான திமுக மற்றும் எதிர்கட்சியான அதிமுகவுக்கு கடும் சவாலை ஏற்படுத்தும் என்று எதிர்பார்க்கப்படுகிறது. மேலும், இந்த பிரசாரத்தில் அவர் பேசும் கருத்துக்கள், தமிழக அரசியல் களத்தில் பெரும் எதிர்பார்ப்பை ஏற்படுத்தியுள்ளன. இந்த மாற்றங்கள் தமிழக அரசியலில் மேலும் பல திருப்பங்களை ஏற்படுத்தும் என எதிர்பார்க்கப்படுகிறது.