கரூர் நெரிசலில் பலியானவர்களின் குடும்பங்களை சந்தித்த விஜய்; திரைக்குப் பின்னால் நடந்தது என்ன?

Arun Janardhanan

தமிழக வெற்றிக் கழகத்தின் (த.வெ.க) கரூர் பிரச்சாரத்தின்போது ஏற்பட்ட கூட்ட நெரிசலில் 41 பேர் உயிரிழந்த ஒரு மாதத்திற்குப் பிறகு, நடிகர் - அரசியல்வாதி விஜய், பாதிக்கப்பட்டவர்களின் குடும்பங்களைச் சந்தித்தார். இந்தச் சந்திப்பு, அவர்களின் சொந்த ஊரான கரூரில் நடைபெறாமல், சென்னை கிழக்கு கடற்கரைச் சாலையில் உள்ள அவரது வீட்டிற்கு அருகிலுள்ள மாமல்லபுரம் கடற்கரை விடுதியில் நடைபெற்றது.

ஆங்கிலத்தில் படிக்க:

400 கிலோமீட்டருக்கும் அதிகமான தொலைவில் உள்ள கரூரிலிருந்து தனியார் பேருந்துகள் மூலம் அழைத்து வரப்பட்ட 41 குடும்பங்களில் 37 குடும்பங்கள் திங்கள்கிழமை மாமல்லபுரத்தை வந்தடைந்ததை த.வெ.க-வின் உயர்மட்ட வட்டாரங்கள் உறுதிப்படுத்தியுள்ளன.

அடையாளம் வெளியிட விரும்பாத இரண்டு மூத்த த.வெ.க தலைவர்கள்,  “விஜய், ஒவ்வொரு குடும்பத்தையும் தனித்தனியாக ஓர் அரங்கத்தில் சந்தித்தார்” என்று இந்தியன் எக்ஸ்பிரஸ் நாளிதழுக்குத் தெரிவித்தனர்.

“ஒவ்வொரு சந்திப்பும் சுமார் 10 முதல் 15 நிமிடங்கள் நீடித்தது. அவர்கள் அனைவரும் ஓர் அரங்கத்தில் அமர வைக்கப்பட்டனர், அவர் ஒரு திரைக்குப் பின்னால் ஒரு நேரத்தில் ஒரு குடும்பத்துடன் பேசினார்” என்று அந்தத் தலைவர்களில் ஒருவர் கூறினார்.

காலை தொடங்கிய இந்தச் சந்திப்பு, மாலை 5 மணி வரை நீடித்தது. ஒவ்வொரு குடும்பத்திற்கும் உயிரிழந்தவர்களின் புகைப்படம் அடங்கிய ஒரு பிரேமும், ரூ.5 லட்சத்திற்கான மருத்துவக் காப்பீட்டு பாலிசியும் வழங்கப்பட்டதாக அந்த வட்டாரங்கள் தெரிவித்தன.

“சில குடும்பங்கள் அவரிடம் மனுக்களை வழங்கினர், அவரும் அவற்றைப் பெற்றுக்கொண்டார்” என்று அந்தத் தலைவர்களில் ஒருவர் கூறினார். “விஜய், அவர்களைச் சென்னைக்கு வரவழைத்ததற்காக மன்னிப்புக் கேட்டார். அவர்கள் எப்போது வேண்டுமானாலும் அவரைத் தொடர்பு கொள்ளலாம் என்றும், அடுத்த முறை கரூர் வரும்போது அவர்களைச் சந்திப்பதாகவும் உறுதியளித்தார்.”

வருகை தந்தவர்களுக்கு காலை மற்றும் மதிய உணவு ஏற்பாடு செய்யப்பட்டிருந்தது. மேலும், அவர்கள் கட்சியில் முன்பதிவு செய்யப்பட்ட அறைகளில் தங்கவைக்கப்பட்டனர். நான்கு குடும்பங்கள் இந்தச் சந்திப்பில் கலந்துகொள்ளவில்லை.

அரசியல் பிரச்சாரத்தைத் தற்காலிகமாக நிறுத்திய அந்தத் துயரச் சம்பவத்திற்குப் பிறகு, பாதிக்கப்பட்ட ஒவ்வொரு குடும்பத்தையும் விஜய் "தனிப்பட்ட முறையில்" சந்திக்கும் வாய்ப்பை வழங்குவதற்காகவே இந்த நிகழ்வு வடிவமைக்கப்பட்டது என்று கட்சி வட்டாரங்கள் தெரிவித்தன.

ஆனால், அவரது சொந்த இயக்கத்தைச் சேர்ந்த சில விமர்சகர்கள் உட்படப் பலரும், இது அவரது அரசியல் பாணியை வரையறுக்கும் நடவடிக்கையின் மற்றுமொரு உதாரணம் என்று பார்க்கின்றனர்.

மாமல்லபுரம் சந்திப்பு, அவரது சொந்த இடத்தில், அவர் நிர்ணயித்த விதிமுறைகளின்படி நடத்தப்பட்ட ஒருவழி அணுகுமுறையாக இருந்தது - இது அவரது அரசியல் பாணியைப் பிரதிபலிப்பதாக த.வெ.க-வைச் சேர்ந்த சிலர் தனிப்பட்ட முறையில் கூறுகின்றனர்.

திங்கள்கிழமை நடந்த சந்திப்புக்கு பாதிக்கப்பட்ட குடும்பங்கள் அழைக்கப்பட்டபோது, 20 குடும்பங்கள் உடனடியாக ஒப்புக்கொண்டன.  “ஆனால் 21 குடும்பங்கள் தயங்கின. அவர் எங்களைச் சந்திக்க வந்திருக்க வேண்டிய இடத்தில், நாங்கள் ஏன் இவ்வளவு தூரம் பயணிக்க வேண்டும் என்று அவர்கள் கேட்டனர்” என்று ஒரு த.வெ.க தலைவர் சனிக்கிழமை கூறினார். இருப்பினும், அவர்கள் பங்கேற்க வேண்டும் என்று த.வெ.க நிர்வாகிகள் கடுமையாக உழைத்து அவர்களைச் சம்மதிக்க வைத்தனர்.

சந்திக்கும் இடத்தை கரூரிலிருந்து மாமல்லபுரத்திற்கு மாற்ற வேண்டியது "தளவாட மற்றும் பாதுகாப்புப் பிரச்சினைகள்" காரணமாகத் தவிர்க்க முடியாதது விஜய்யின் நெருங்கிய ஆதரவாளர்கள் தெரிவித்தனர். கட்சி இதற்கு முன்பு கரூரில் நிகழ்வை நடத்தக் காவல்துறையிடம் அனுமதி கோரியதாகவும், ஆனால் த.வெ.க நிர்வாகிகள் கருத்துப்படி, நிகழ்ச்சி நடத்துவதற்குப் பொருத்தமான இடம் கிடைக்கவில்லை என்றும் கூறப்படுகிறது.

செப்டம்பர் 27-ம் தேதி நடந்த கூட்ட நெரிசல் சம்பவத்தில் 18 பெண்கள் மற்றும் 10 குழந்தைகள் உட்பட 41 பேர் உயிரிழந்தனர். பாதிக்கப்பட்டவர்கள் கரூர், ஈரோடு, திண்டுக்கல், திருப்பூர் மற்றும் சேலம் மாவட்டங்களைச் சேர்ந்தவர்கள் ஆவர். விஜய்யின் உரையைத் தொடர்ந்து வெளியேறும் வாயிலுக்கு அருகில் நெரிசல் ஏற்பட்டபோது, கரூர் - ஈரோடு நெடுஞ்சாலையில் உள்ள வேலூசாமிபுரத்தில் "மக்கள் பேரணி" என்று விளம்பரப்படுத்தப்பட்ட அந்த இடத்திற்கு மக்கள் திரண்டிருந்தனர்.

சம்பவத்தைத் தொடர்ந்து நிகழ்விடத்தை விட்டு விஜய் வெளியேறியதற்காக நீதிமன்றத்தில் அவர் விமர்சனங்களை எதிர்கொண்டார். கடந்த ஒரு மாதமாக த.வெ.க அனைத்து பொது நிகழ்ச்சிகளையும் நிறுத்தி வைத்திருந்தது. பாதிக்கப்பட்ட 41 குடும்பங்களில், 39 குடும்பங்களுக்கு ஏற்கனவே கட்சி சார்பில் தலா ரூ.20 லட்சம் இழப்பீடாக வழங்கப்பட்டுள்ளது; மீதமுள்ள 2 குடும்பங்களுக்கு வங்கிக் கணக்குத் தெளிவுபடுத்தலுக்காகக் காத்திருப்பதாக த.வெ.க தலைமை சனிக்கிழமை தெரிவித்தது.

இவ்வளவு விளக்கங்கள் அளிக்கப்பட்ட போதிலும், அவரது இல்லத்திலிருந்து மிகக் குறைந்த தூரத்தில் உள்ள ஒரு தனியார் கடற்கரை விடுதியைத் தேர்ந்தெடுத்தது, அனுதாபிகள் மத்தியிலும் புருவங்களை உயர்த்தியுள்ளது. “அவர் அமைதியாகக் கரூர் சென்று, அவர்களின் வீடுகளில் அவர்களைச் சந்தித்திருக்கலாம்” என்று வடக்கு தமிழ்நாட்டைச் சேர்ந்த ஒரு த.வெ.க மாவட்டத் தலைவர் கூறினார். “இந்த ஏற்பாடு செய்யப்பட்ட நிகழ்வை விட, அதுவே பெரிய அளவில் பேசப்பட்டிருக்கும்.” என்று கூறினார்.

மாலைக்குள், குடும்பங்களைத் தாங்கிய கடைசிப் பேருந்துகளும் கரூருக்குத் திரும்பிப் பயணித்தன.