'தி.மு.க. இல்லாத தி.மு.க. கூட்டணி'- விஜய்யின் வியூகம்; தமிழக காங். கூட்டணி குறித்து மறுபரிசீலனை!

அடுத்தாண்டு நடைபெறவுள்ள சட்டமன்றத் தேர்தலை முன்னிட்டு, தமிழ்நாட்டில் உள்ள காங்கிரஸ் தலைவர்களில் ஒருசிலர், விஜய்யின் தமிழக வெற்றிக் கழகம் (TVK) கட்சிக்கு மாநில அரசியலில் தங்கள் கட்சிக்கு ஒரு மாற்றுப் பாதையை வழங்க முடியும் என்று நம்பத் தொடங்கியுள்ளனர்.

முதல்வர் மு.க.ஸ்டாலின் தலைமையிலான தி.மு.க.வுடனான தங்களது கூட்டணியின் ஸ்திரத்தன்மையை காங்கிரஸ் தலைமை ஒப்புக் கொண்டாலும், மாநில அலகுக்குள் உள்ள சில தலைவர்கள், விஜய்யின் பிரபலத்தில் நம்பிக்கை கொண்டு, அவரது கட்சியுடன் கூட்டணி அமைக்கும் துணிச்சலான சிந்தனையையும் கொண்டுள்ளனர். இந்த விளைவாக உருவாகும் பதற்றம், காங்கிரஸ் சட்டமன்றக் கட்சிக் குழுவில் (CLP) எதிரொலிக்கிறது. அங்கேதான் தொகுதிப் பங்கீடு மற்றும் நீண்ட கால நிலைப்பாடு குறித்து விவாதங்கள் நடக்கின்றன.

சமீபத்தில், சட்டமன்ற காங்கிரஸ் குழுத் தலைவர் மற்றும் கிள்ளியூர் சட்டமன்ற உறுப்பினர் எஸ். ராஜேஷ்குமார், தி.மு.க கூட்டணியில் கட்சிக்கு பெரிய பங்கு தேவை என்று வலியுறுத்தினார். 2021 சட்டமன்றத் தேர்தலில் காங்கிரஸ் 25 இடங்களில் போட்டியிட்டது. இம்முறை அதிக இடங்கள் மட்டுமல்லாமல், ஆட்சியிலும் பங்கேற்க வேண்டும் என்ற கோரிக்கையை அவர் வைத்தார்.

இந்த செய்தியை ஆங்கிலத்தில் படிக்க

6 தசாப்தங்களாக மாநிலத்தில் ஆட்சியிழந்துள்ள காங்கிரஸ், கூட்டணி அரசியல் மூலம் மக்களவைத் தேர்தலில் வெற்றி பெற்றாலும், அதன் அடித்தள அமைப்பு பலமிழந்துள்ளது. சிறிய பிரிவின் முகமாக இருக்கும் ராஜேஷ்குமார், அமைச்சர் பதவிகள் கிடைத்தால், கட்சியால் தனது கட்டமைப்பையும் நம்பகத்தன்மையையும் மீண்டும் கட்டியெழுப்ப முடியும் என்று நம்புகிறார்.

மற்றொரு குழுவினர், தி.மு.க.விடம் இருந்து அதிக இடங்களைப் பெறுவதோடு நிற்காமல், விஜய்யின் கட்சியுடனும் பேச்சுவார்த்தை நடத்த விரும்புகிறார்கள். விஜய்யின் பொதுக்கூட்டங்களுக்கு அதிக கூட்டம் வருவதால், அக்கட்சியுடன் கூட்டணி அமைப்பது நன்மை பயக்கும் என்று அவர்கள் கருதுகின்றனர்.

மூத்த காங்கிரஸ் தலைவர் கூறுகையில், "ராகுல்காந்தி, சோனியா காந்தி, மல்லிகார்ஜுன் கார்கே, தமிழக காங். தலைவர் செல்வபெருந்தகை ஆகியோர் ஸ்டாலினுடன் உறுதுணையாக உள்ளனர். அவர்கள் திமுக கூட்டணியை விட்டு வெளியேற விரும்பவில்லை. ஆனால், மாணிக்கம் தாகூர், சசிகாந்த் செந்தில், ராஜேஷ்குமார், கே.எஸ். அழகிரி போன்ற மாநிலப் பிரிவில் உள்ள மாற்று அணியினர், தமிழக வெற்றிக் கழகத்தை விரும்புகிறார்கள். இது கட்சிக்கு அதிக இடங்களையும், அதிகாரப் பகிர்வையும் வழங்கும் என்று அவர்கள் வாதிடுகிறார்கள்.

இருப்பினும், "காங்கிரஸ் தி.மு.க.வை விட்டு வெளியேறாது, ஏனெனில் இது நிரூபிக்கப்பட்ட கூட்டணி. 2019 முதல் 2024 வரை, நாங்கள் நல்ல எண்ணிக்கையைப் பெற்றுள்ளோம். ஆனால், ராகுலின் கவலை 2026 சட்டமன்றத் தேர்தலை விட 2029 மக்களவைத் தேர்தல் எம்பிக்களின் எண்ணிக்கைதான்" என்று அவர் கூறினார்.

தி.மு.க.வின் மூத்த வியூகவாதி ஒருவர், காங்கிரஸ் கட்சிக்கு எச்சரிக்கை விடுத்துள்ளார்: தமிழ்நாட்டில் இதற்கு முன்பு கூட்டம் கூட்டும் பிரபலங்கள் தேர்தலில் தோல்வியைச் சந்தித்துள்ளனர் என்பதை காங்கிரஸ் மறக்கக் கூடாது. 2011-ல் வடிவேலு தி.மு.க.வின் மிகப்பெரிய கூட்டத்தைக் கூட்டியவர், ஆனால் கட்சி மோசமான தோல்வியைச் சந்தித்தது. 2021-ல் கமல்ஹாசன் கூட்டத்தைக் கூட்டினாலும், தேர்தலில் தோல்வியடைந்தார். "விஜய் இன்னும் தன்னை நிரூபிக்கவில்லை. அப்படியிருக்கையில் ஏன் ராகுல் தி.மு.க.வை விட்டு வெளியேற வேண்டும்?" என்று தி.மு.க தலைவர் கேள்வி எழுப்பினார்.

சில காங்கிரஸ் வட்டாரங்களில், காங்கிரஸ்-தமிழக வெற்றிக் கழகக் கூட்டணி குறித்த பேச்சு ரகசியமாக உள்ளது. தி.மு.க.வின் நிழலில் இருப்பதன் மூலம் காங்கிரஸ் தமிழ்நாட்டில் ஒருபோதும் வளர முடியாது என்று ஒரு தலைவர் வாதிடுகிறார். "தேசியத் தலைவர்களில் பலர், ஒரு வலுவான திராவிடக் கட்சியுடன் கூட்டணி வைப்பதை விட, சிறிய கூட்டாளிகளுடன் சுதந்திரமாகச் செயல்பட்டால் காங்கிரஸ் தேர்தல் சக்தியாக வெளிவர முடியும் என்று நம்புகிறார்கள்," என்றார் மற்றொரு தலைவர்.

சில காங்கிரஸ் வட்டாரங்களின்படி, அடுத்த ஆண்டு சட்டமன்றத் தேர்தலில் விஜய்யின் புதிய கட்சி 20% வாக்குகளைப் பெற வாய்ப்புள்ளது (TVK-இன் சொந்த மதிப்பீடு 12% முதல் 15% ஆகும்). 2021 சட்டமன்றத் தேர்தலில் காங்கிரஸின் வாக்குச் சதவீதம் 4.27% ஆக இருந்தது. 2024 மக்களவைத் தேர்தலில் அது 10.67% ஆக உயர்ந்தது. "இளைஞர்கள், குறிப்பாக 35 வயதுக்குட்பட்ட பெண்கள், த.வெ.கவுக்கு வாக்களிக்க வாய்ப்புள்ளது," என்று ஒரு காங்கிரஸ் தலைவர் தெரிவித்தார்.

விஜய்யின் நெருங்கிய வட்டாரத்தினர், காங்கிரஸின் ராகுல் காந்தியுடன் நடிகர்-அரசியல்வாதிக்கு "மிக நல்ல உறவு" இருப்பதாகக் குறிப்பிட்டது. இருப்பினும், தற்போது எந்தப் பேச்சுவார்த்தையும் இல்லை என்றும் தெளிவுபடுத்தப்பட்டது. தேசிய ஜனநாயக கூட்டணி மற்றும் திமுக ஆகிய இரு கட்சிகளையும் விமர்சித்து வரும் விஜய், செப்.13 பேரணியில், ராகுல் காந்தியின் வாக்குத் திருட்டு குற்றச்சாட்டுடன் ஒத்துப்போகும் வகையில், பா.ஜ.க.வுக்கு எதிராக இதேபோன்ற குற்றச்சாட்டை எழுப்பியது குறிப்பிடத்தக்கது.

விஜய்யின் திட்டம் குறித்துப் பேசிய நெருங்கிய வட்டாரம், "தி.மு.க இல்லாமல் ஒரு தி.மு.க கூட்டணியை உருவாக்க விஜய் திட்டமிட்டுள்ளார். அவர் அதைச் சாதித்தால், 150 இடங்களைக் கோருவார். மீதமுள்ள இடங்கள் காங்கிரஸ், கம்யூனிஸ்டுகள், ம.தி.மு.க, வி.சி.க மற்றும் சிறிய முஸ்லிம், கிறிஸ்தவ அமைப்புகளுடன் அதிகாரப் பகிர்வு வாக்குறுதியுடன் பகிரப்படும்," என்று கூறியது.

இறுதியில், "விஜய் மீதான மக்களின் அன்பைப் பொருட்படுத்தாமல், வாக்காளர்களின் நம்பிக்கையைப் பெற விஜய் தொடர்ச்சியாக, ஒவ்வொரு நாளும் கடினமாக உழைக்க முடியுமா?" என்ற கேள்விதான் இதில் இருக்கும் முக்கிய சவால் என்று த.வெ.க உள்வட்டாரங்கள் கூறுகின்றன.

தற்போதைக்கு, இரு கட்சிகளின் அதிகாரப்பூர்வ நிலைப்பாடு உறுதியாக உள்ளது. காங்கிரஸ் இந்தியா கூட்டணியில் தி.மு.க.வுடன் நீடிக்கும். ஆனால் திரைமறைவில், அரசியல் வியூகவாதிகள் த.வெ.க-ன் நகர்வுகளை உன்னிப்பாக கவனித்து வருகின்றனர். 2026-ல் அதன் செயல்திறன், தமிழ்நாட்டில் காங்கிரஸின் நீண்ட காலப்பாதையை வரையறுக்கும். அது தி.மு.க.வின் விசுவாசமான இளைய பங்காளியாகவோ அல்லது சோதனை செய்யப்படாத நட்சத்திர அரசியல்வாதியின் கூட்டாளியாகவோ இருக்கலாம்.