அ.தி.மு.க மூத்த தலைர் செங்கோட்டையனை இ.பி.எஸ் நீக்கியது ஏன்? கூட்டணியில் எழுந்த கேள்விக்குறி?

அ.தி.மு.க மூத்த தலைவர் கே.ஏ. செங்கோட்டையன், தனது கட்சிப் பதவிகள் அனைத்திலிருந்தும் நீக்கப்பட்டது, கட்சியில் மற்றொரு சுற்றுக் கோஷ்டி பூசலை மட்டும் தூண்டவில்லை. அ.தி.மு.க மற்றும் அதன் தலைவர் எடப்பாடி கே. பழனிசாமி அல்லது இ.பி.எஸ் ஆகியோருக்கு முன்னால் உள்ள ஒரு பெரிய கேள்வியை இது வெளிப்படுத்தியுள்ளது. அதாவது, அ.தி.மு தமிழகத்தில் பா.ஜ.க-வின் பெரிய கூட்டணி கட்சியாக தொடர வேண்டுமா அல்லது என்.டி.ஏ கூட்டணியிலிருந்து மீண்டும் வெளியேற வேண்டுமா என்பதுதான் அந்தக் கேள்வி.

ஆங்கிலத்தில் படிக்க:

ஒன்பது முறை சட்டமன்ற உறுப்பினரான 77 வயதான செங்கோட்டையன், ஓ. பன்னீர்செல்வம் (ஓ.பி.எஸ்) மற்றும் டி.டி.வி. தினகரன் உள்ளிட்டோரை மீண்டும் கட்சியில் சேர்க்க வேண்டும் என்று வெள்ளிக்கிழமை பகிரங்கமாக அழைப்பு விடுத்தார்.

கட்சித் தலைமை நடவடிக்கை எடுக்காவிட்டால், "ஒத்த எண்ணம் கொண்ட தலைவர்கள் ஒன்றிணைந்து அதைச் செய்வார்கள்" என்று 10 நாட்கள் காலக்கெடுவை நிர்ணயித்த செங்கோட்டையன் எச்சரித்தார். அ.தி.மு.க நிறுவனரான எம்.ஜி.ஆர் மற்றும் முன்னாள் முதல்வர் ஜெயலலிதா ஆகியோரின் தலைமை காலத்தில் கிளர்ச்சியாளர்களை மீண்டும் கட்சியில் சேர்த்துக்கொண்ட முன்னுதாரணங்களையும் அவர் சுட்டிக்காட்டினார். 2021 சட்டமன்றத் தேர்தலில் கட்சி தோல்வியடைந்த பிறகு அ.தி.மு.க-வின் 6 மூத்த தலைவர்களை சேர்ப்பதை கருத்தில்கொள்ளுமாறு இ.பி.எஸ்-ஐ தனிப்பட்ட முறையில் வலியுறுத்தியதாகவும் அவர் கூறினார்.

இதற்கு சனிக்கிழமை இ.பி.எஸ்  பதிலடி கொடுத்தார். ஒரு அறிக்கையில், செங்கோட்டையன் அமைப்புச் செயலாளர் மற்றும் ஈரோடு புறநகர் (மேற்கு) மாவட்டச் செயலாளர் பதவிகளில் இருந்து விடுவிக்கப்படுவதாக அறிவித்தார். அவருக்கு நெருக்கமாகக் கருதப்பட்ட கட்சியின் மற்ற 7 நிர்வாகிகளும் நீக்கப்பட்டனர்.

அவரது உடனடி பதிலடி, பிரிந்து சென்ற தலைவர்கள் அல்லது அவர்களது பிரிவினருடன் இணைவது குறித்த எந்தவொரு வெளியிலிருந்து வரும் அழுத்தத்திற்கும் இ.பி.எஸ் எவ்வளவு உணர்வுபூர்வமாக இருக்கிறார் என்பதை அடிக்கோடிட்டுக் காட்டுகிறது. இது பா.ஜ.க இந்தப் பிரச்னையில் "அதிகமாகச் செயல்பட்டுவிட்டது" என்ற பேச்சையும் அ.தி.மு.க வட்டாரங்களில் ஏற்படுத்தியுள்ளது.

2021 முதல், பா.ஜ.க மற்றும் ஆர்.எஸ்.எஸ் மீண்டும் மீண்டும் அ.தி.மு.க-வை என்.டி.ஏ கூட்டணிக்குள் கொண்டுவர முயன்று வருகின்றன. பன்னீர்செல்வம் மற்றும் தினகரன் ஆகியோர் என்.டி.ஏ-வில் இல்லாததால், மேலும் முன்னாள் எம்.எல்.ஏ கிருஷ்ணசாமியின் புதிய தமிழகம் மற்றும் தே.மு.தி.க போன்ற சிறிய கூட்டணிக் கட்சிகள் விலகிச் சென்றதால், பா.ஜ.க தமிழகத்தில் பின்னடைவை சந்தித்துள்ளது. ஏன், பாட்டாளி மக்கள் கட்சியும் அதன் நிறுவனர் எஸ். ராமதாஸ் மற்றும் அவரது மகன் அன்புமணி இடையே பிளவு ஏற்பட்டுள்ளது.

தற்போது, மாநிலத்தில் என்.டி.ஏ கூட்டணி பெரும்பாலும் பா.ஜ.க மற்றும் அ.தி.மு.க-வைச் சார்ந்துள்ளது. இவர்களுடன், முன்னாள் மத்திய அமைச்சர் ஜி.கே. வாசனின் தமிழ் மாநில காங்கிரஸ், முன்னாள் எம்.பி. ஏ.சி. சண்முகத்தின் புதிய நீதி கட்சி, எஸ்.ஆர்.எம் குழும நிறுவனர் டி.ஆர். பாரிவேந்தரின் இந்திய ஜனநாயக கட்சி, மற்றும் ஜான் பாண்டியனின் தமிழக மக்கள் முன்னேற்றக் கழகம் போன்ற சில குறிப்பிட்ட சாதி செல்வாக்கு உள்ள கட்சிகள் கூட்டணியில் உள்ளன. இவற்றுக்கு அதிக வாக்கு வங்கி பலம் இல்லை.

இந்த பின்னணியில், செங்கோட்டையனின் திடீர் அ.தி.மு.க ஒற்றுமைக்கான அழைப்பு, கட்சிக்குள்ளேயே பலருக்கு ஒரு "திட்டமிட்ட மிஷன்" போல் தோன்றியது. அ.தி.மு.க மூத்த தலைவர் ஒருவர், இந்த முழு விவகாரத்திலும் சில மூத்த சங்க பரிவார் தலைவர்களின் "செல்வாக்கு" செங்கோட்டையன் மீது இருந்தது குறிப்பிடத்தக்கது என்றார்.

“பா.ஜ.க-வின் ஆதரவு இல்லாமல் செங்கோட்டையன் இதைச் செய்திருக்க மாட்டார்” என்று இன்னும் அவருடன் தொடர்பில் இருக்கும் மூத்த அ.தி.மு.க தலைவர் ஒருவர் கூறினார்.  “இது அவர்களின் திட்டம்தான்.” என்றார்.

ஆனால், இ.பி.எஸ்-ஐப் பொறுத்தவரை, இத்தகைய அழுத்தங்களுக்கு அடிபணிவது ஆபத்தானது. ஜெயலலிதாவின் மறைவுக்குப் பிறகு ஏற்பட்ட கோஷ்டி பூசல்களில் அவருக்கு விசுவாசமாக இருந்த பல தொண்டர்கள், தங்கள் எதிரிகள் மீண்டும் கட்சியில் சேர்க்கப்பட்டால் பிரிந்து செல்லக்கூடும். இது கட்சியை மீண்டும் பிளவுபடுத்தும்.  “இ.பி.எஸ் ஏன் இதுபோன்ற கோரிக்கைகளுக்கு உடன்பட வேண்டும்? அவர்களை மீண்டும் கட்சியில் சேர்ப்பது இ.பி.எஸ்-க்கு கட்சியை நடத்துவதை கடினமாக்கும்” என்று அ.தி.மு.க மூத்த தலைவர் கூறினார்.

ஈரோடு மாவட்டத்தில் உள்ள கோபிசெட்டிப்பாளையம், செங்கோட்டையனின் சொந்த ஊர். அங்கு சில தொகுதிகளில் அவருக்கு செல்வாக்கு உள்ளது. ஆனால், மாநில அளவில், அவர் இ.பி.எஸ்-ன் கட்டுப்பாட்டுக்கு அச்சுறுத்தலாக இல்லை. அவரது "10 நாள் காலக்கெடு" தைரியமானதாக இருக்கலாம், ஆனால், இது இ.பி.எஸ்-க்கு தேவையான ஒரு வாய்ப்பு என்று உள்வட்டாரங்கள் கூறுகின்றன: அவரை ஒதுக்கிவைத்து, அ.தி.மு.க மற்றும் பா.ஜ.க-வின் திட்டங்களுக்கு இடையே ஒரு தெளிவான எல்லையை வரையறுக்க ஒரு வாய்ப்பு.

அ.தி.மு.க உள்வட்டாரங்கள், பல மூத்த தலைவர்கள் என்.டி.ஏ-வில் இருந்து வெளியேற இது ஒரு "பொன்னான வாய்ப்பு" என்று ஏற்கனவே இ.பி.எஸ்-யிடம் தெரிவித்துள்ளனர். “பா.ஜ.க-வுடனான கூட்டணி காரணமாக, எந்த கம்யூனிஸ்டுகளும், சிறுபான்மையினரும், ஆளும் தி.மு.க-வின் எந்த கூட்டணிக் கட்சிகளும் எங்களுடன் சேர மாட்டார்கள். வெளியேறுவதற்கு இதுவே சிறந்த நேரம்” என்று இ.பி.எஸ்-க்கு நெருக்கமான மூத்த அ.தி.மு.க தலைவரும் முன்னாள் அமைச்சரும் கூறினார்.

கட்சி வட்டாரங்கள் கூறுகையில், இ.பி.எஸ் இப்போது ஒரு மூலையில் சிக்கியிருப்பதாகத் தோன்றலாம்: செங்கோட்டையன் வெளியேற்றப்பட்டுவிட்டார், ஆனால் பா.ஜ.க-வின் மாநிலத் தலைவர் நயினார் நாகேந்திரன் உட்பட பா.ஜ.க தலைவர்கள் அ.தி.மு.க-வின் ஒற்றுமைக்கு ஆதரவாக குரல் கொடுக்கத் தொடங்கியுள்ளனர். அவர் மீதான அழுத்தங்கள் குவியக்கூடும், என்று அந்த முன்னாள் அமைச்சர் கூறினார். "இருந்தாலும், அவர் எதிர்த்தால், பா.ஜ.க-வின் பினாமி என்று கருதப்படுபவர்களை நீக்கி, அமைதியாக என்.டி.ஏ-விலிருந்து வெளியேறுவதற்கான ஒரு பாதையை வகுத்தால், அவர் அ.தி.மு.க-வை தமிழ்நாட்டில் ஒரு பரந்த தி.மு.க-அல்லாத, பா.ஜ.க-அல்லாத கூட்டணியின் மையமாக நிலைநிறுத்த முடியும்." என்கிறனர்.

வாய்ப்புகள் ஏராளம், என்று மற்றொரு அ.தி.மு.க தலைவர் கூறினார்.  “நடிகர்-அரசியல்வாதி விஜய் கூட்டத்தை ஈர்த்து, இளம் வாக்காளர்களைத் தன் பக்கம் இழுக்கிறார். புதிய தமிழகம் ஏற்கனவே அவருடன் இணைய உள்ளது. அ.தி.மு.க விஜய் மற்றும் பிற பிராந்திய அமைப்புகளுடன் கைகோர்த்தால், அது 2026 சட்டமன்றத் தேர்தலுக்கு முன்னால் தி.மு.க-வை அதன் வியூகத்தை மறுபரிசீலனை செய்ய கட்டாயப்படுத்தக்கூடும்” என்று இ.பி.எஸ் அமைச்சரவையில் இருந்த அ.தி.மு.க தலைவர் ஒருவர் கூறினார்.

ஜெயலலிதாவின் மறைவுக்குப் பிறகு பல சவால்களைச் சமாளித்த ஒரு புத்திசாலித்தனமான அரசியல்வாதியான இபிஎஸ், இப்போது தனது வாழ்க்கையின் மிக முக்கியமான முடிவுகளில் ஒன்றை எதிர்கொள்கிறார்.

பொதுவெளியில், அதிமுக பொதுச் செயலாளர் அமைதி காத்து வருகிறார். செங்கோட்டையனின் நீக்கம் மட்டுமே அவரது நிலைப்பாட்டைப் பேசுகிறது. ஆனால் அதிமுகவுக்குள் விவாதம் தீவிரமடைந்துள்ளது. "இந்த 10 நாள் காலக்கெடுவே ஒரு பெரிய தாக்கத்தை ஏற்படுத்தியுள்ளது. இபிஎஸ் பாஜகவின் லாபிக்கு செவிசாய்த்தால், கட்சித் தலைவர் என்ற அவரது வாழ்க்கைக்கு என்ன அர்த்தம்?" என்று ஒரு மூத்த கட்சி நிர்வாகி கூறினார். "இது தோல்வியடைந்த மற்றொரு முட்டாள்தனமான திட்டம். இப்போது உண்மையிலேயே கவலைப்பட வேண்டியது திமுகதான்," என்று முன்னாள் ஜெயலலிதா உதவியாளர் வி.கே. சசிகலா மற்றும் தினகரன் ஆகியோருக்கு விசுவாசமானவராக இருந்த மற்றொரு அதிமுக தலைவர் கூறினார்.