ரூ706 கோடியில் 18720 பெண் தொழிலாளர்கள் தங்குமிட வசதி; தமிழகத்தில் உற்பத்தியை விரிவுப்படுத்தும் ஃபாக்ஸ்கான்

Arun Janardhanan

ஃபாக்ஸ்கான் (Foxconn) நிறுவனத்தின் தலைவர் யங் லியு, தனது நிறுவனத்தின் உற்பத்தி மையங்களில் திருமணமான பெண்கள் முக்கியப் பங்காற்றுவதாக, சென்னைக்கு அருகில் உள்ள ஸ்ரீபெரும்புதூரில் பெண் தொழிலாளர்களுக்காக ரூ.706 கோடி செலவில் கட்டப்பட்ட குடியிருப்பு வளாகத்தை சனிக்கிழமை திறந்து வைத்தபோது கூறினார். ஆப்பிள் நிறுவனத்தின் முக்கிய சப்ளையர்களான ஃபாக்ஸ்கான் இந்தியாவில் திருமணமான பெண்களுக்கு வேலை மறுப்பதாக அறிக்கைகள் வந்த சில வாரங்களுக்குப் பிறகு இது வந்துள்ளது.

ஆங்கிலத்தில் படிக்க: With Rs 706 crore facility that can house 18,720 women, Foxconn doubles down in Tamil Nadu

தமிழக முதல்வர் மு.க.ஸ்டாலினால் திறந்து வைக்கப்பட்ட இந்த குடியிருப்பு வசதி, 20 ஏக்கர் பரப்பளவில், தலா 10 தளங்கள் கொண்ட 13 பிளாக்குகளை உள்ளடக்கியுள்ளது. மேலும், 18,720 தொழிலாளர்கள் தங்கும் வகையில் வடிவமைக்கப்பட்ட தங்குமிட பாணி அறைகளை வழங்குகிறது. 

புதிய குடியிருப்பு வசதி ஆயிரக்கணக்கான பெண்களுக்கு தங்குமிடமாக இருக்கும் என்பதை வலியுறுத்துவதற்கு யங் லியு இந்த சந்தர்ப்பத்தைப் பயன்படுத்தினார், மேலும் "திருமணமான பெண்கள் தமிழகத்தில் ஃபாக்ஸ்கானின் உற்பத்தி மையங்களுக்கு கணிசமாக பங்களிக்கிறார்கள்" என்றும் யங் லியு கூறினார். பெண் தொழிலாளர்கள் பலர் சிறிய நகரங்களில் இருந்து வந்து தைவானில் உள்ளதைப் போன்ற ஒரு தங்குமிட அமைப்பில் வாழ்வார்கள் என்று யங் லியு குறிப்பிட்டார். இந்த வளாகம், ஜீரோ-டிஸ்சார்ஜ் தொழில்நுட்பத்தின் மூலம் நிலைத்தன்மையைக் காட்டுகிறது என்றும் யங் லியு கூறினார்.

தமிழ்நாடு அரசாங்கத்தின் கூற்றுப்படி, இப்போது இந்தியாவில் தொழிலாளர்களுக்கான மிகப்பெரிய குடியிருப்பு வளாகமாக அமைந்துள்ள இந்த வளாகம், 2021 ஆம் ஆண்டில் ஸ்ரீபெரும்புதூர் ஆலையில் "மோசமான" வாழ்க்கை நிலைமைகள் தொடர்பாக நடந்த போராட்டங்களைத் தொடர்ந்து ஃபாக்ஸ்கான் பெண் தொழிலாளர்களுக்காக தமிழக அரசால் உருவாக்கப்பட்டது. போராட்டங்கள் ஆலையை தற்காலிகமாக மூடுவதற்கு வழிவகுத்தது மற்றும் தங்குமிடங்களை மேம்படுத்த தமிழக அரசாங்கத்துடன் ஒத்துழைக்க ஃபாக்ஸ்கான் நிறுவனத்தை கட்டாயப்படுத்தியது.

ஃபாக்ஸ்கான் நிறுவனம் தமிழகத்தில் 41,000 தொழிலாளர்களுக்கு வேலை வழங்கி வருவதாகவும், அதில் 35,000 பேர் பெண்கள் என்றும் ஸ்டாலின் கூறினார். “இங்கே தமிழ்நாட்டில் ஆண்களுக்கு நிகராக பெண்கள் வளர்ந்து வந்துள்ளனர் என்பது மட்டுமல்ல; பல துறைகளில், பெண்கள் முன்னணியில் உள்ளனர், குறிப்பாக தொழில்துறை மற்றும் அதிநவீன உற்பத்தியில் அதிகமாக பணிபுரிந்து வருகின்றனர்," என்று ஸ்டாலின் கூறினார். 41 சதவீத பெண்கள் பங்கேற்பில் தமிழ்நாடு இந்தியாவிலேயே முன்னணியில் உள்ளது என்பதை முதல்வர் எடுத்துரைத்தார்.

தமிழக தொழில்துறை அமைச்சகத்தின் உயர் அதிகாரி ஒருவர் கூறுகையில், சீனாவுக்கு வெளியே ஃபாக்ஸ்கானின் மிகப்பெரிய பணியாளர்கள் தற்போது இந்தியாவாகவும், அதிக எண்ணிக்கையில் தமிழ்நாட்டில் உள்ளதாகவும் கூறினார். 

சனிக்கிழமை மாலை சென்னை சர்வதேச விமான நிலையத்திற்கு வந்தடைந்த யங் லியுவை, மாநில தொழில்துறை அமைச்சர் டி.ஆர்.பி ராஜா அன்புடன் வரவேற்று ஸ்ரீபெரும்புதூருக்கு அழைத்துச் சென்றார்.

தமிழ்நாடு மாநில தொழில்கள் மேம்பாட்டுக் கழகம் (SIPCOT) செயல்படுத்தும் திட்டத்தில், 4,000 பேர் அமரக்கூடிய பெரிய சாப்பாட்டு கூடம், உட்புற விளையாட்டு வசதிகள், வெளிப்புற விளையாட்டுப் பகுதிகள் மற்றும் பல்வேறு விளையாட்டுகளுக்கான வசதிகள் போன்றவை தொழிலாளர்களுக்கு ஆரோக்கியமான வாழ்க்கை முறையை ஊக்குவிக்கும். சூரிய மற்றும் மழைநீர் சேகரிப்பு அமைப்புகள், கழிவுநீர் சுத்திகரிப்பு நிலையம் மற்றும் திடக்கழிவு மேலாண்மை அமைப்பு ஆகியவற்றுடன் சுற்றுச்சூழல் நிலைத்தன்மைக்கு தீர்வு காணப்பட்டது. பாதுகாப்புக்கும் முன்னுரிமை அளிக்கப்படுகிறது, வளாகம் முழுவதும் 1,170 சிசிடிவி கேமராக்கள் பொருத்தப்பட்டுள்ளன.

கூகுளின் பிக்சல் ஃபோன்கள் மற்றும் ட்ரோன்களை உற்பத்தி செய்வதை உள்ளடக்கி, ஃபாக்ஸ்கான் நிறுவனம் இந்தியாவில் அதன் செயல்பாடுகளை விரிவுபடுத்தும் நிலையில், புதிய குடியிருப்பு வளாகம், எதிர்பார்க்கப்படும் தொழிலாளர்களின் வருகைக்கு வசதியான வாழ்க்கை சூழலை உறுதி செய்வதை நோக்கமாகக் கொண்டுள்ளது.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“