போன் தொலைந்துவிட்டதா?... பதட்டப்படாதீர்கள்! கண்டுபிடிக்க சில நிமிடங்கள் போதும்!

நம் கையில் இருக்கும் ஸ்மார்ட்போன் என்பது வெறும் கருவி மட்டுமல்ல, அது நம் நினைவுகள், முக்கியமான தகவல்கள், தொடர்பு எண்கள் என பலவற்றின் தொகுப்பு. அப்படிப்பட்ட போன் தொலைந்துபோனால் ஏற்படும் பதட்டமும் கவலையும் வார்த்தைகளில் அடங்காது. ஆனால், பயப்படத் தேவையில்லை. ஆண்ட்ராய்டு போன்களைக் கண்டறிவதற்கு கூகுள் பல பயனுள்ள அம்சங்களை வழங்குகிறது. உங்கள் தொலைந்த போனை மீட்டெடுக்க இந்த வழிகள் உதவும்.

Google Find My Device:

தொலைந்த ஆண்ட்ராய்டு போன்களைக் கண்டறிய Google வழங்கும் மிக முக்கியமான கருவி "Find My Device". இது சக்திவாய்ந்த சேவை, உங்கள் போன் இருக்கும் இடத்தைக் கண்டறியவும், அதை பூட்டவும், அல்லது அதிலுள்ள தரவை அழிக்கவும் இது உதவுகிறது.

உங்கள் தொலைந்த போனில் உங்கள் Google கணக்கு உள்நுழைந்திருக்க வேண்டும். போனில் இருப்பிட சேவை (Location) இயக்கப்பட்டிருக்க வேண்டும். Find My Device அம்சம் இயக்கப்பட்டிருக்க வேண்டும். போன் ஆன் செய்யப்பட்டு, இணையத்துடன் (மொபைல் டேட்டா அல்லது Wi-Fi) இணைக்கப்பட்டிருக்க வேண்டும். சில சமயங்களில், ஆஃப்லைனில் இருந்தாலும் கடைசியாகப் பதிவு செய்யப்பட்ட இருப்பிடத்தைக் காட்டும்.

எப்படி பயன்படுத்துவது?

போன் தொலைந்த உடனே மற்றொரு போன், டேப்லெட் அல்லது கணினியில் android.com/find என்ற முகவரிக்குச் செல்லவும். தொலைந்த போனில் பயன்படுத்திய அதே Google கணக்கு மூலம் உள்நுழையவும். உங்களிடம் பல ஆண்ட்ராய்டு போன்கள் இருந்தால், பட்டியலிலிருந்து தொலைந்த போனைத் தேர்ந்தெடுக்கவும். மேப்பில் உங்கள் போனின் துல்லியமான இருப்பிடம் காண்பிக்கப்படும். உங்கள் நண்பரின் (அ) குடும்ப உறுப்பினரின் ஆண்ட்ராய்டு போனில் "Find My Device" ஆப் Google Play Store-லிருந்து பதிவிறக்கம் செய்து நிறுவவும். ஆப்பைத் திறந்து, உங்கள் Google கணக்கு மூலம் உள்நுழையவும். மேப்பில் உங்கள் போனின் இருப்பிடத்தை நீங்கள் காணலாம்.

கண்டறிந்த பின் என்ன செய்யலாம்? 

Find My Device உங்கள் போனின் இருப்பிடத்தைக் காட்டுவதுடன் மட்டுமல்லாமல், வேறு சில முக்கிய செயல்பாடுகளையும் செய்ய அனுமதிக்கிறது.

சத்தமாக ஒலி எழுப்பு (Play Sound): உங்கள் போன் அமைதியான (silent) பயன்முறையில் இருந்தாலும், இந்த அம்சத்தைப் பயன்படுத்தி 5 நிமிடங்களுக்கு முழு சத்தத்தில் ஒலிக்க வைக்கலாம். போன் வீட்டிற்குள்ளோ (அ) அருகிலோ தொலைந்து போயிருந்தால், இது அதை எளிதில் கண்டறிய உதவும்.

சாதனத்தைப் பூட்டு (Secure Device): உங்கள் போனை உடனடியாக PIN, பேட்டர்ன் அல்லது கடவுச்சொல் மூலம் பூட்டலாம். மேலும், லாக் ஸ்கிரீனில் மீட்பு செய்தி அல்லது தொடர்பு எண்ணையும் சேர்க்கலாம். யாராவது உங்கள் போனை கண்டெடுத்தால், உங்களை தொடர்புகொள்ள இது மிகவும் உதவும்.

டேட்டா எரேஸ் (Erase Device): ஒருவேளை உங்கள் போனை மீட்டெடுக்க வாய்ப்பே இல்லை என உறுதியானால், உங்கள் தனிப்பட்ட தகவல்கள் தவறான கைகளில் சிக்குவதைத் தடுக்க போனில் உள்ள எல்லா தரவையும் நிரந்தரமாக அழிக்கலாம். ஆனால் இதைச் செய்த பிறகு, Find My Device மூலம் அதன் இருப்பிடத்தைக் கண்டறிய முடியாது என்பதை நினைவில் கொள்ளவும். போனை அழித்த பிறகு நீங்கள் அதைக் கண்டால், அதை மீண்டும் பயன்படுத்த உங்கள் Google கணக்கு கடவுச்சொல் தேவைப்படும்.

கூடுதல் பாதுகாப்பு மற்றும் முன்னெச்சரிக்கை நடவடிக்கைகள்:

Location History: உங்கள் Google கணக்கில் Google Maps Timeline இயக்கப்பட்டிருந்தால், Google Maps-ல் சென்று "Your Timeline" (உங்கள் காலவரிசை) என்பதைப் பார்த்து, உங்கள் போன் பயணித்த இடங்களை காலவரிசைப்படி பார்க்கலாம். இது போன் எங்கு தொலைந்து போயிருக்கும் என்ற யோசனையைத் தரும்.

IMEI எண்: உங்கள் போனின் IMEI (International Mobile Equipment Identity) எண்ணை எப்போதும் குறித்து வைத்துக் கொள்ளுங்கள். போன் தொலைந்து போனால், காவல்துறை மற்றும் தொலைத்தொடர்பு நிறுவனத்திடம் புகாரளிக்கும்போது இந்த எண் மிகவும் முக்கியம். இந்த எண்ணைப் பயன்படுத்தி போனின் சேவையை முடக்கலாம் (அ) CEIR (Central Equipment Identity Register) போன்ற அரசு தளங்களில் புகாரளித்து போனை பிளாக் செய்யலாம்.

முக்கிய குறிப்பு: போன் தொலைந்த பிறகு கவலைப்படுவதை விட, தொலைவதற்கு முன்பே சில எளிய பாதுகாப்பு நடவடிக்கைகளை எடுத்து வைப்பது சிறந்தது. உங்கள் போனில் எப்போதும் ஸ்கிரீன் லாக் பயன்படுத்துங்கள், Find My Device அம்சத்தை இயக்கி வைத்துக்கொள்ளுங்கள், மற்றும் உங்கள் Google கணக்கின் கடவுச்சொல்லை பாதுகாப்பாக வைத்திருங்கள்.