![google maps flyover](https://img-cdn.thepublive.com/fit-in/1280x960/filters:format(webp)/indian-express-tamil/media/media_files/F9TODCyzHEWzmgq8Sc96.jpg)
கூகுள் மேப்ஸ் இந்திய பயனர்களுக்காக ஃப்ளைஓவர் கால்அவுட் அம்சத்தை அறிமுகப்படுத்துகிறது. (புகைப்பட உதவி: கூகுள்)
கூகுள் மேப்ஸ் இந்திய பயனர்களுக்கு சில புதிய அம்சங்களை அறிமுகப்படுத்துகிறது, இதில் மின்சார வாகன (EV) சார்ஜிங் பாயிண்ட்களைக் கண்டறியும் வசதி மற்றும் சில இந்திய நகரங்களில் மெட்ரோ டிக்கெட்டுகளை முன்பதிவு செய்யும் வசதி ஆகியவை அடங்கும்.
இந்த அம்சங்கள் இறுதியாக பயனர்கள் ஒரு மேம்பாலம் அல்லது அதற்கு அடுத்துள்ள சர்வீஸ் சாலையை எடுக்க வேண்டுமா என்பதைத் தெரிவிக்கும். ஜூலை 25, வியாழன் அன்று நடந்த செய்தியாளர் சந்திப்பில், "ஃப்ளைஓவர் வழிகாட்டுதல் எங்கள் பயனர்களிடமிருந்து மிகவும் கோரப்பட்ட அம்சங்களில் ஒன்றாகும், நாங்கள் உங்கள் கருத்தைக் கேட்டு அதைச் செயல்படுத்தியுள்ளோம்" என்று கூகுள் மேப்ஸ் இந்தியாவின் பொது மேலாளர் லலிதா ரமணி கூறினார்.
ஃப்ளைஓவர் கால்அவுட்கள் வரவிருக்கும் மேம்பாலங்களை பயனர்களுக்கு அவர்களின் வழித்தடங்களில் சுட்டிக்காட்டும் என்று கூகுள் கூறியது, இதனால் அவர்கள் அதை எடுக்கலாமா வேண்டாமா என்று முடிவு செய்யலாம். குறுக்குச்சாலைகள் மற்றும் ஃப்ளைஓவர்களில் பயணிக்க உதவும் இதே போன்ற அம்சங்கள், MapMyIndia-க்குச் சொந்தமான Mappls ஆப்ஸ் போன்ற மாற்று டிஜிட்டல் மேப் பிளாட்ஃபார்ம்களில் சில காலமாக உள்ளன.
ஃப்ளைஓவர் கால்அவுட் அம்சம் நான்கு சக்கர மற்றும் இரு சக்கர வாகன பயனர்களுக்காக இந்தியாவில் உள்ள 40 நகரங்களில் வெளியிடப்படுகிறது. இருப்பினும், இந்த புதுப்பிப்பு முதலில் ஆண்ட்ராய்டு (Android) சாதனங்களுக்கு வரும், மேலும் இது ஐ.ஓ.எஸ் (iOS) மற்றும் கார்ப்ளே (CarPlay) பயனர்களுக்கு பின்னர் கிடைக்கும்.
இந்தியாவில் கூகுள் மேப்ஸில் எலக்ட்ரிக் வாகன சார்ஜிங் இடங்கள்
எலட்ரிக் வாகன சார்ஜிங் வழங்குநர்கள் மற்றும் ElectricPe, Ather, Kazam மற்றும் Statiq போன்ற தரவு ஒருங்கிணைப்பாளர்களுடன் ஒத்துழைப்பதன் மூலம் நாட்டில் 8,000 எலக்ட்ரிக் சார்ஜிங் இடங்களைச் சேர்க்க உள்ளதாக தொழில்நுட்ப நிறுவனமான கூகுள் தெரிவித்துள்ளது.
"இந்தியாவில் கார்கள் மற்றும் இரு சக்கர வாகனங்கள் இரண்டிலும் எலக்ட்ரிக் வாகனங்களை ஏற்றுக்கொள்வதில் உண்மையான எழுச்சியை நாங்கள் காண்கிறோம், மேலும் எலக்ட்ரிக் வாகன ஓட்டுனர்களுக்குத் தேவையான தகவல்கள் இருப்பதை நாங்கள் உறுதிப்படுத்த விரும்புகிறோம்" என்று லலிதா ரமணி கூறினார்.
எலக்ட்ரிக் வாகன சார்ஜிங் நிலையங்கள், பிளக் வகைகள் மற்றும் நிகழ்நேர கிடைக்கும் தன்மை போன்ற விரிவான தகவலை கூகுள் மேப்ஸ் (Google Maps) காண்பிக்கும். சார்ஜர் வகையின் அடிப்படையில் பயனர்கள் எலக்ட்ரிக் வாகன சார்ஜிங் இடங்களை தேர்வு செய்யலாம். கூடுதலாக, பயனர்கள் இரு சக்கர வாகனங்களுக்காக குறிப்பாக எலக்ட்ரிக் வாகன சார்ஜிங் நிலையங்களை நாடலாம். லலிதா ரமணியின் கூற்றுப்படி, இந்த வசதி வேறு எந்த நாட்டிலும் இன்னும் கிடைக்கவில்லை.
கூகுள் மேப்ஸ் இந்தியா வழியாக மெட்ரோ டிக்கெட் முன்பதிவு
அடுத்து ஒரு முக்கியமான புதுப்பிப்பை வழங்குகிறது கூகுள் மேப்ஸ், அது மெட்ரோ டிக்கெட் முன்பதிவு அம்சம், அரசாங்கத்தின் தலைமையிலான டிஜிட்டல் வர்த்தகத்திற்கான ஓபன் நெட்வொர்க் (ONDC) மற்றும் ரைடு புக்கிங் ஆப் நம்ம யாத்ரி ஆகியவற்றுடன் கைகோர்த்து உருவாக்கப்பட்டுள்ளது, இது கொச்சி மற்றும் சென்னையில் இந்த வாரம் முதல் பயன்பாட்டிற்கு வரும் என்று கூறியது.
![Metro ticket booking on Google Maps via Namma Yatri and ONDC.](https://img-cdn.thepublive.com/filters:format(webp)/indian-express-tamil/media/post_attachments/0c9953036004155188366dc20295fef723e4d5f9394a8ada66cd7125b7e3774c.jpg?resize=600,338)
மெட்ரோ மெனுவில் பயனர்கள் தாங்கள் சேருமிடத்திற்கான வழிகளைத் தேடும் போது, மெட்ரோ டிக்கெட்டுகளை முன்பதிவு செய்வதற்கான விருப்பம் இருக்கும். அதைத் தட்டினால், நம்ம யாத்ரியில் டிக்கெட் முன்பதிவு திரைக்கு அழைத்துச் செல்லப்படும், அதன் பிறகு உங்கள் தொலைபேசி எண்ணை உள்ளிட்டு உங்கள் டிக்கெட்டின் க்யூ.ஆர் (QR) குறியீட்டைப் பெற பணம் செலுத்த வேண்டும்.
"உங்கள் பொதுப் போக்குவரத்து அனுபவத்தை மேம்படுத்த, நம்ம யாத்ரி மற்றும் ஓ.என்.டி.சி உடன் நெருக்கமாக ஒத்துழைத்து, பல நகரங்கள் மற்றும் கூடுதல் பொதுப் போக்குவரத்து முறைகளுக்கு இந்த அம்சத்தை விரிவுபடுத்த நாங்கள் ஆர்வமாக உள்ளோம்" என்று கூகுள் மேப்ஸ் இந்தியாவின் தயாரிப்பு பிரிவு தலைவர் அனல் கோஷ் செய்தியாளர்களிடம் கூறினார்.
ஓ.என்.டி.சி மேலும் பல நகரங்களுக்கு செல்லும்போது, கூகுள் மேப்ஸ் வழியாக மெட்ரோ முன்பதிவு அம்சம் உங்கள் நகரத்திற்கும் வரும் என்று எதிர்பார்க்கலாம் என்று அனல் கோஷ் கூறினார். நம்ம யாத்ரி ஒருங்கிணைப்பு எதிர்காலத்தில் பேருந்துகள் போன்ற பிற போக்குவரத்து முறைகளை உள்ளடக்கும் என்றும் அனல் கோஷ் குறிப்பிட்டார்.
2016 ஆம் ஆண்டில், கூகுள் மேப்ஸ் இயங்குதளத்திற்குள் ஓலா மற்றும் உபெர் வாடகை வாகன சேவைகளை ஒருங்கிணைத்தது. இருப்பினும், நம்ம யாத்ரி ஒருங்கிணைப்பு வேறுபட்டது என்று அனல் கோஷ் வலியுறுத்தினார். "இந்த வழக்கில், என்ன நடக்கிறது என்றால், கொச்சி மற்றும் சென்னையில் உள்ள மெட்ரோ போக்குவரத்து ஏஜென்சிகள் ஓ.என்.டி.சி-ல் விற்பனையாளர் பயன்பாடுகளைக் கொண்டுள்ளன, மேலும் நம்ம யாத்ரி ஒரு வாங்குபவர் செயலியாகும், இது தகவல்களைப் பெற்று இந்த சேவைகளை முன்பதிவு செய்யும் அம்சத்தை வழங்குகிறது," என்று அனல் கோஷ் கூறினார்.
குறுகலான சாலைகள் மற்றும் பலவற்றை வழிசெலுத்துதல்
இந்தியாவில் கூகுள் மேப் பயனர்களுக்கு வரவிருக்கும் மற்றொரு புதிய வழிசெலுத்தல் அம்சம் குறுகிய சாலை எச்சரிக்கைகள் ஆகும், இது நான்கு சக்கர வாகன ஓட்டிகள் அந்தச் சாலைகளைப் பயன்படுத்துவதைத் தவிர்க்க உதவும்.
சாலையின் அகலத்தை மதிப்பிடுவதற்காக ஏற்கனவே உள்ள செயற்கை நுண்ணறிவு (AI) ரூட்டிங் அல்காரிதம்களை நன்றாகச் சரிசெய்ததாக கூகுள் கூறியது. ஆரம்பத்தில், ஹைதராபாத், பெங்களூரு, சென்னை, கோயம்புத்தூர், இந்தூர், போபால், புவனேஸ்வர் மற்றும் கவுகாத்தி ஆகிய எட்டு நகரங்களில் கூகுள் மேப் பயனர்களுக்கு குறுகிய சாலை அழைப்புகள் நேரலையில் இருக்கும்.
இந்த அம்சம் கிடைக்க, ஐ.ஓ.எஸ் (iOS) பயனர்கள் காத்திருக்க வேண்டும், ஏனெனில் இது தற்போது ஆண்ட்ராய்டுக்கு மட்டுமே வெளியிடப்படுகிறது. குறுகிய சாலைகள் விழிப்பூட்டல்கள் மற்றும் ஃப்ளைஓவர் கால்அவுட்கள் போன்ற இந்த வழிசெலுத்தல் அம்சங்களை கூகுளின் ரூட்ஸ் API (பயன்பாடு) மூலம் மூன்றாம் தரப்பு பயன்பாடுகளின் டெவலப்பர்களால் ஒருங்கிணைக்க முடியும்.
![Google Maps to show users alerts for narrow roads.](https://img-cdn.thepublive.com/filters:format(webp)/indian-express-tamil/media/post_attachments/d5266e097341dde45ea016191687360326e1712a530aabb652110b87ec462117.jpg?resize=600,338)
வியாழன் அன்று கூகுள் மேப்ஸ் மூலம் அறிவிக்கப்பட்ட வேறு சில புதுப்பிப்புகளில், நடந்து வரும் கட்டுமான பணிகள் அல்லது போக்குவரத்து விபத்துகளை எச்சரிக்க பயனர்களுக்கான விரைவான அறிக்கையிடல் விருப்பங்கள் மற்றும் "மும்பையில் உள்ள சிறந்த காலை உணவு இடங்கள்" அல்லது "கோவாவில் உள்ள சிறந்த கடல் வியூ கஃபேக்கள்" ஆகியவற்றிற்கான பரிந்துரைகளை பயனர்கள் க்யூரேட் செய்ய உதவும் 'லிஸ்ட்கள்' அம்சம் ஆகியவை அடங்கும்.
இந்த மாத தொடக்கத்தில், கூகுள் அதன் மேப்ஸ் பயன்பாட்டைப் பயன்படுத்தும் இந்திய டெவலப்பர்களுக்கான விலைகளைக் குறைப்பதாகக் கூறியது. ஓலா இனி கூகுள் மேப்ஸ் பயன்பாட்டைப் பயன்படுத்தாது, அதற்குப் பதிலாக அதன் உள் தீர்வைத் தேர்வுசெய்யும் என்று ஓலா கூறிய சில நாட்களுக்குப் பிறகு இந்த அறிவிப்பு வந்துள்ளது.
கூகுள் மேப்பின் திருத்தப்பட்ட பயன்பாட்டின் விலையின் நேரத்தைப் பற்றி கேட்டபோது, கூகுள் மேப்ஸின் துணைத் தலைவர் மற்றும் பொது மேலாளர் மிரியம் டேனியல், பெங்களூரில் நடந்த கூகுள் ஐ/ஓ கனெக்ட் நிகழ்வின் மூலம் அதை குறைக்க முடிவு செய்தோம் என்று கூறினார். "நாங்கள் எங்கள் அனைத்து விலை அமைப்புகளையும் உள்ளூர்மயமாக்க வேண்டும் மற்றும் இந்தியாவில் உள்ள எங்கள் கூட்டாளர்களுக்கு உள்ளூர் நாணயத்தில் கிடைக்கச் செய்ய வேண்டும்," என்றும் மிரியம் டேனியல் கூறினார்.
“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“
Stay updated with the latest news headlines and all the latest Lifestyle news. Download Indian Express Tamil App - Android or iOS.