வைஃபை பாஸ்வேர்ட் மறந்துட்டிங்களா? ரூட்டரை ரீசெட் செய்யாமல் ஈசியாக கண்டுபிடிக்கலாம்!

நம்மில் பலர் ஒருமுறை வைஃபை-ஐ மொபைல் அல்லது லேப்டாபில் இணைத்துவிட்டால், பாஸ்வோர்ட் மறந்துவிடுவோம். பின்னர் யாராவது அந்த வைஃபை பாஸ்வோர்ட் கேட்டால், அதை எப்படிச் சொல்வது என்று தெரியாமல் திகைப்போம். உங்கள் வைஃபை ரூட்டரை ரீசெட் செய்யாமல், எளிதாக பாஸ்வோர்ட் கண்டறிய சில சுவாரசியமான வழிகள் குறித்து பார்ப்போம்.

ஆண்ட்ராய்டு போனில் வைஃபை பாஸ்வோர்ட் கண்டறிய:

உங்கள் மொபைலில் 'Settings' பகுதிக்குள் செல்லவும். அதில் 'Network & Internet' > 'WiFi' என்பதைத் தேர்ந்தெடுக்கவும். நீங்கள் இணைந்திருக்கும் வைஃபை நெட்வொர்க்கைத் தட்டி, பின்னர் 'Share' விருப்பத்தை கிளிக் செய்யவும். உங்கள் போன் PIN, கைரேகை அல்லது முக அடையாளத்தைக் கொண்டு சரிபார்க்கும்படி கேட்கும். சரிபார்த்ததும், ஒரு QR கோட் திரையில் தோன்றும், அதன் கீழே உங்கள் வைஃபை கடவுச்சொல் தெளிவாகக் காட்டப்படும். சில மாடல் போன்களில் இந்த வசதி சற்று மாறுபடலாம். அப்படிப்பட்ட சூழ்நிலையில், கூகிள் கடவுச்சொல் மேலாளர் (Google Password Manager) அல்லது வேறு 3-ம் தரப்பு பயன்பாடுகளைப் பயன்படுத்தலாம்.

ஐபோனில் வைஃபை பாஸ்வோர்ட் கண்டறிய:

உங்கள் iPhone-ல் 'Settings' > 'WiFi' என்பதற்குச் செல்லவும். நீங்கள் இணைந்திருக்கும் நெட்வொர்க்கைத் தட்டி, பின்னர் கடவுச்சொல் தெரியும் இடத்தைத் தட்டவும். Face ID அல்லது Touch ID மூலம் சரிபார்த்த பிறகு, கடவுச்சொல் உங்களுக்காகக் காத்திருக்கும். iCloud Keychain வசதி இருந்தால், உங்கள் ஆப்பிள் சாதனங்களில் வைஃபை கடவுச்சொற்கள் தானாகவே ஒத்திசைக்கப்படும்.

விண்டோஸ் PC-ல் வைஃபை பாஸ்வோர்ட் கண்டறிய:

உங்கள் PC-ல் 'Control Panel' > 'Network and Sharing Centre' என்பதைத் திறக்கவும். உங்கள் வைஃபை பெயரை கிளிக் செய்து, 'Wireless Properties' என்பதைத் தேர்ந்தெடுக்கவும். அதில், 'Security' என்ற டேப்பிற்குச் சென்று, 'Show Characters' என்பதைத் தேர்ந்தெடுத்தால், கடவுச்சொல் உங்கள் கண்ணுக்குத் தெரியும்.

இனி உங்கள் நண்பர்களிடம் 'தெரியாது' என்று சொல்லத் தேவையில்லை! இந்த வழிமுறைகளைப் பயன்படுத்தி, நீங்கள் மறந்த வைஃபை பாஸ்வோர்ட் எளிதாகக் கண்டறியலாம். ஆனால், நீங்கள் சொந்தமாக வைத்திருக்கும் அல்லது பயன்படுத்த அனுமதி உள்ள நெட்வொர்க்குகளை மட்டுமே பயன்படுத்துவது நல்லது என்பதையும் நினைவில் கொள்ளுங்கள்.