7,000mAh பேட்டரி, 120Hz ரெப்ரெஷ் ரேட்.. லாவா அக்னி 4 ஸ்மார்ட்ஃபோன் நவம்பரில் அறிமுகம்!

உள்நாட்டு ஸ்மார்ட்ஃபோன் பிராண்டான லாவா (Lava), தனது அடுத்த தலைமுறை லாவா அக்னி 4 (Lava Agni 4) ஸ்மார்ட்ஃபோனை இந்தியாவில் விரைவில் அறிமுகம் செய்ய உள்ளது. இந்த மொபைலின் முதல் அதிகாரப்பூர்வ டீஸரை லாவா தனது இணையதளம் மூலம் வெளியிட்டுள்ளது.

லாவா அக்னி 4: தொழில்நுட்ப விவரங்கள்

லாவா அக்னி 3-க்கு அடுத்தபடியாக வரவிருக்கும் இந்த அக்னி 4 மொபைல், நவம்பர் மாதம் இந்தியாவில் அறிமுகப்படுத்தப்படும் என்று லாவா நிறுவனம் தனது இந்திய இணையதளத்தின் மூலம் அதிகாரப்பூர்வமாக உறுதி செய்துள்ளது. சரியான வெளியீட்டு தேதி இன்னும் அறிவிக்கப்படவில்லை.

டீஸர் போஸ்டரில் மொபைல் கருப்பு நிறத்தில் காட்சிப்படுத்தப்பட்டுள்ளது. இது கிடைமட்டமாக சீரமைக்கப்பட்ட 'பில் ஷேப்ட்' வடிவிலான பின்புற கேமரா யூனிட்டைக் கொண்டுள்ளது. இது இரட்டை பின்புற சென்சார்களைக் கொண்டதாகத் தெரிகிறது. இந்த ஃபோன் 4nm மீடியாடெக் டைமன்சிட்டி 8350 சிப்செட்டுடன் வரும் என்று எதிர்பார்க்கப்படுகிறது.

இது 120Hz ரெஃப்ரெஷ் ரேட் சப்போர்ட் கொண்ட 6.78-இன்ச் ஃபுல்-HD+ டிஸ்ப்ளேவுடன் வரும் என்று கூறப்படுகிறது. மொபைல் UFS 4.0 ஸ்டோரேஜூடன் இருக்கும் என எதிர்பார்க்கப்படுகிறது. இது டூயல் ரியர் கேமரா யூனிட்டை (இரண்டு 50MP கேமராக்கள்) கொண்டிருக்கலாம். லாவா அக்னி 4-ன் பேட்டரி திறன் 7,000mAh-க்கும் அதிகமாக இருக்கும் என்று கூறப்படுகிறது. இந்த மொபைலின் விலை இந்தியாவில் ரூ.25,000 ஆக இருக்கலாம் என்று முன்பு வெளியான தகவல்கள் தெரிவிக்கின்றன.

முந்தைய மாடல் (லாவா அக்னி 3) விவரம்:

லாவா அக்னி 3 கடந்த ஆண்டு அக்டோபரில் இந்தியாவில் வெளியிடப்பட்டது. பேஸ் மாடல் 8GB ரேம் + 128GB ஸ்டோரேஜூடன் ரூ.20,999 விலையில் வெளியிடப்பட்டது. 120Hz ரெஃப்ரெஷ் ரேட் சப்போர்ட்டுடன் கூடிய 6.78-இன்ச் 1.5K AMOLED ஸ்கிரீனைக் கொண்டுள்ளது. இது 4nm MediaTek Dimensity 7300X சிப்செட்டில் இயங்குகிறது. 50MP பிரைமரி சென்சார், 8MP அல்ட்ராவைட் சென்சார், மற்றும் 8MP டெலிஃபோட்டோ கேமரா உள்ளிட்ட மூன்று பின்புற கேமரா அமைப்பைக் கொண்டது. பின்புற பேனலில் 1.74-இன்ச் AMOLED டச் ஸ்கிரீனும் இருந்தது. 66W சார்ஜிங் சப்போர்ட்டுடன் கூடிய 5,000mAh பேட்டரி இதில் உள்ளது.