க்ரிஸ்டலுடன் ஆடம்பர ஸ்மார்ட்போன்... மோட்டோரோலா பிரில்லியண்ட் கலெக்ஷன் அறிமுகம்!

தொழில்நுட்பமும் ஆடம்பரமும் கைகோர்க்கும்போது தனித்துவமான படைப்பு உருவாகும். அதை நிரூபிக்கும் வகையில், மோட்டோரோலா நிறுவனம் புகழ்பெற்ற நகை பிராண்டான ஸ்வாரோவ்ஸ்கியுடன் இணைந்து தனது ஃபிளிப் ஃபோனான Razr 60 மற்றும் Moto Buds Loop இயர்பட்ஸ் ஆகியவற்றை புதிய மற்றும் ஆடம்பரமான க்ரிஸ்டல்களால் அலங்கரித்து வெளியிட்டுள்ளது. ஃபிளிப் ஃபோனை எடுத்துச் செல்ல பிரத்யேகமாக வடிவமைக்கப்பட்ட கிராஸ்பாடி பேக் வாடிக்கையாளர்களுக்கு வழங்கப்படும் என மோட்டோரோலா தெரிவித்துள்ளது.

இந்த புதிய தொகுப்பு Brilliant Collection என்றழைக்கப்படுகிறது. இதில் உள்ள சாதனங்கள் Pantone Ice Melt என்ற தனித்துவமான நிறத்தில் வடிவமைக்கப்பட்டுள்ளன. இந்த நிறமே பார்ப்பவர்களை ஈர்க்கிறது. மேலும், ஃபோனின் பின்புறத்தில் உள்ள 3D குயில்டட் வடிவமைப்பு, அதற்கு லெதர் போன்ற உணர்வைக் கொடுக்கிறது. இதை மேலும் மெருகூட்டும் வகையில், இந்த ஃபோனில் 35 கைவினை ஸ்வாரோவ்ஸ்கி க்ரிஸ்டல்கள் பதிக்கப்பட்டுள்ளன. குறிப்பாக, ஃபோனை மடிக்கும் பகுதியில் உள்ள 26-பேசட் க்ரிஸ்டல், ஒளியில் மின்னும்போது கண்கவர் காட்சியளிக்கிறது.

வழக்கமான ஸ்மார்ட்போன் வடிவமைப்புகளைத் தாண்டி, இந்த படைப்பு ஃபேஷன் & தொழில்நுட்பத்தின் கலவையாக உள்ளது. மொபைல் ஃபோனை ஸ்டைல் ஸ்டேட்மென்ட்டாக மாற்றுவதே இதன் நோக்கம். இதற்கு ஏற்றாற்போல், இந்த ஃபோனை எடுத்துச் செல்ல பிரத்யேக கிராஸ்பாடி பேக்-கையும் மோட்டோரோலா வழங்குகிறது. இது வாடிக்கையாளர்களுக்கு முழுமையான அனுபவத்தை அளிக்கிறது.

அழகு மட்டுமல்ல, செயல்திறனிலும் இந்த ஃபோன் சளைத்ததல்ல. இந்த ஆண்டின் தொடக்கத்தில் அறிமுகப்படுத்தப்பட்ட அதே Motorola Razr 60 ஃபோன்தான். இதில், சக்திவாய்ந்த MediaTek Dimensity 7400X SoC செயலி, 6.9-இன்ச் முதன்மை டிஸ்ப்ளே, 3.6-இன்ச் கவர் டிஸ்ப்ளே உள்ளன. புகைப்பட ஆர்வலர்களுக்காக, 50 மெகாபிக்சல் பிரதான கேமராவும், 13 மெகாபிக்சல் அல்ட்ராவைட் கேமராவும் இதில் இடம்பெற்றுள்ளன. இந்த தொகுப்பிலுள்ள Moto Buds Loop இயர்பட்ஸ், கேட்கும் சாதனம் மட்டுமல்ல, அவை ஸ்வாரோவ்ஸ்கி க்ரிஸ்டல்களால் அலங்கரிக்கப்பட்டு நகையை போல அணியக்கூடிய வகையில் வடிவமைக்கப்பட்டுள்ளன. Bose-tuned செய்யப்பட்ட இயர்பட்ஸ்கள், சிறந்த ஒலி அனுபவத்தை வழங்குவதோடு, பார்ப்பவர்களின் கவனத்தையும் ஈர்க்கின்றன.

இந்த Brilliant Collection லிமிடெட் எடிஷன் தொகுப்பாக ஆகஸ்ட் 7 முதல் அமெரிக்காவில் $999 (சுமார் ரூ.87,000) விலையில் கிடைக்கும். உலகளவில் தேர்ந்தெடுக்கப்பட்ட சந்தைகளில் மட்டுமே கிடைக்கும். இந்த விலை, வழக்கமான Motorola Razr 60-ஐ விட அதிகமாக இருந்தாலும், இது ஃபேஷன் மற்றும் ஆடம்பரத்தை விரும்பும் வாடிக்கையாளர்களை ஈர்க்கும் என்பதில் சந்தேகமில்லை. மோட்டோரோலாவின் இந்தப் புதிய முயற்சி, தொழில்நுட்ப சாதனங்களை வெறும் பயன்பாட்டுப் பொருட்களாக மட்டும் பார்க்காமல், தனிப்பட்ட பாணியின் அங்கமாகவும் மாற்ற முடியும் என்பதை நிரூபிக்கிறது.