செவ்வாய் கிரகத்தில் பண்டைய உயிரினங்களின் தடயங்கள்? நாசாவின் பெர்சவரன்ஸ் ரோவர் கண்டுபிடிப்பு

அமெரிக்க விண்வெளி ஆய்வு நிறுவனமான நாசா-வின் பெர்சவரன்ஸ் (Perseverance) ரோவர், செவ்வாய் கிரகத்தில் உள்ள ஒரு காய்ந்த ஆற்றுப் படுகையில் நுண்ணிய உயிரினங்களின் சாத்தியமான தடயங்கள் கொண்ட பாறைகளைக் கண்டுபிடித்திருப்பதாக விஞ்ஞானிகள் தெரிவித்துள்ளனர்.

செவ்வாய் கிரகத்தின் மேற்பரப்பை ஆராய்ந்து வரும் பெர்சவரன்ஸ் ரோவர், உயிரினங்களை நேரடியாகக் கண்டறியும் திறன் கொண்டது அல்ல. மாறாக, அது தனது துல்லியமான துளைப்பான் மூலம் பாறைகளைத் துளையிட்டு, பல பில்லியன் ஆண்டுகளுக்கு முன்பு உயிரினங்கள் வாழ்ந்திருக்க வாய்ப்புள்ள இடங்களில் இருந்து மாதிரிகளைச் சேகரித்து வருகிறது. இந்த மாதிரிகள் எதிர்காலத்தில் பூமிக்கு கொண்டு வரப்பட்டு ஆய்வுக்கு உட்படுத்தப்பட உள்ளன.

நுண்ணுயிர்களின் சாத்தியமான தடயம்

2021-ம் ஆண்டு முதல் செவ்வாய் கிரகத்தில் சுழன்று வரும் இந்த ரோவர், ஜெசரோ பள்ளத்தில் உள்ள ஒரு பழைய ஆற்றின் படுகையில் (Neretva Vallis) இருந்து சேகரித்த மாதிரிகளில் கரிம கார்பன், இரும்பு பாஸ்பேட் மற்றும் இரும்பு சல்பைட் போன்ற வேதியியல் கலவைகள் இருப்பதைக் கண்டறிந்துள்ளது. பூமியில் உள்ள நுண்ணுயிரிகள் கரிமப் பொருட்களைச் சிதைக்கும்போது, இத்தகைய வேதிப்பொருட்கள் உருவாகின்றன. இதனால், செவ்வாய் கிரகத்திலும் இதேபோன்ற நுண்ணுயிரிகள் இருந்திருக்கலாம் என விஞ்ஞானிகள் நம்புகின்றனர்.

இந்த கண்டுபிடிப்பு குறித்து ஸ்டோனி ப்ரூக் பல்கலைக்கழகத்தின் ஆய்வாளர் ஜோயல் ஹுரோவிட்ஸ் கூறுகையில், "இந்தக் கண்டுபிடிப்பு நுண்ணுயிர் வாழ்க்கைக்கான ஒரு சாத்தியமான விளக்கமாக இருக்கலாம். ஆனால், வேறு சில இயற்கையான காரணங்களாலும் இந்த வேதியியல் கலவைகள் உருவாகியிருக்கலாம். இருப்பினும், இதுவரையிலான ரோவரின் தேடலில், பண்டைய கால வாழ்க்கைக்கான சாத்தியமான அறிகுறிகளுக்கான மிகச்சிறந்த மற்றும் மிகவும் உறுதியான தடயம் இதுவே" என்றார்.

பூமிக்கு மாதிரிகள் கொண்டுவரும் திட்டம்

இந்த மாதிரிகளை பூமிக்கு கொண்டுவரும் திட்டம் தற்போது தற்காலிகமாக நிறுத்தி வைக்கப்பட்டுள்ளது. அதிக செலவு மற்றும் காலதாமதம் காரணமாக, மாற்றுத் திட்டங்களை நாசா ஆராய்ந்து வருகிறது. இந்த மாதிரிகள் பூமிக்கு கொண்டு வரப்பட்ட பின்னரே, உறுதியான முடிவுகளை எட்ட முடியும் என விஞ்ஞானிகள் தெரிவிக்கின்றனர்.

இது, ரோவர் சேகரித்த 25-வது மாதிரியாகும். தற்போது இந்த எண்ணிக்கை 30 ஆக உயர்ந்துள்ளது. இன்னும் 6 மாதிரிகளைச் சேகரிக்கும் பணி நடைபெற்று வருகிறது. இந்த மாதிரிகள், செவ்வாய் கிரகத்தின் பண்டைய வரலாற்றையும், அதில் உயிரினங்கள் இருந்ததா என்பதையும் பற்றிய பல கேள்விகளுக்கு விடை அளிக்கும் என விஞ்ஞானிகள் ஆவலுடன் காத்திருக்கின்றனர்.

இந்த செய்தியை ஆங்கிலத்தில் வாசிக்க இந்த இணைப்பை கிளிக் செய்யவும்.