இந்தியாவில் விற்பனைக்கு வரும் ரே-பான் மெட்டா ஸ்மார்ட் கிளாஸ்... விலை எவ்வளவு தெரியுமா?

சமூக வலைதள நிறுவனமான மெட்டா ஆதரவுடன் உருவாக்கப்பட்ட செயற்கை நுண்ணறிவு தொழில்நுட்பம் உள்ள ரே-பான் ஸ்மார்ட் கண்ணாடிகள் இந்திய சந்தையில் அறிமுகமாகியுள்ளன. இந்த அதிநவீன கண்ணாடிகளின் ஆரம்ப விலை ரூ.29,900 ஆக நிர்ணயிக்கப்பட்டுள்ளது.

இந்த கண்ணாடிகளில் உள்ளமைக்கப்பட்ட குரல் மூலம் இயங்கும் மெட்டா ஏ.ஐ அம்சம் உள்ளது. இதன்மூலம் பயனர்கள் தங்கள் தொலைபேசியைத் தொடாமலேயே புகைப்படங்கள் எடுப்பது (அ) நேரலை ஒளிபரப்பு செய்வது போன்ற பல்வேறு வசதிகளைப் பெற முடியும். தொழில்நுட்ப ஆர்வலர்கள் மற்றும் புதுமையான கேட்ஜெட்களை விரும்புவோர் மத்தியில் இந்த புதிய ரே-பான் ஸ்மார்ட் கண்ணாடிகள் பெரும் வரவேற்பைப் பெறும் என்று எதிர்பார்க்கப்படுகிறது.

இந்த செயற்கை நுண்ணறிவு திறன் கொண்ட ஸ்மார்ட் கண்ணாடிகள், எஸ்.எம்.எஸ். அனுப்புவது, அழைப்புகள் மேற்கொள்வது முதல் புகைப்படங்கள் எடுப்பது வரை பல்வேறு செயல்பாடுகளைக் கைகளை பயன்படுத்தாமல் மேற்கொள்ள பயனர்களுக்கு உதவுகின்றன. இதன்மூலம், பயனர்கள் தங்கள் செயலிகளுடன் தொடர்ந்து இணைந்திருக்கவும் அதேநேரத்தில் கைகளை வேறு பணிகளில் ஈடுபடுத்தவும் முடியும்.

இந்த கண்ணாடிகள், பாரீஸைத் தலைமையிடமாகக் கொண்டு செயல்படும் பன்னாட்டு லென்ஸ் உற்பத்தியாளரான எஸிலோர்லக்ஸோட்டிகாவுடன் இணைந்து வடிவமைக்கப்பட்டுள்ளன என்பது குறிப்பிடத்தக்கது. பயனர்களைக் கவரமெட்டா நிறுவனம் இந்த செயற்கை நுண்ணறிவு கண்ணாடிகள் மூலம் பல்வேறு சேவைகளை வழங்குகிறது. இந்த ஸ்மார்ட் கண்ணாடிகள் தொழில்நுட்ப புரட்சியின் அடுத்த கட்டமாக பார்க்கப்படுகின்றன.

இந்த ஸ்மார்ட் கண்ணாடிகள் முதலில் 2023-ம் ஆண்டு அமெரிக்காவில் அறிமுகப்படுத்தப்பட்டன. இந்தியாவில் நேற்று  (மே.13) விற்பனைக்கு வந்துள்ளன. ரே-பான் இந்தியாவின் வலைத்தளத்தில் இந்த கண்ணாடிகளின் பல்வேறு வடிவமைப்புகள் பட்டியலிடப்பட்டுள்ளன. சில குறிப்பிட்ட மாடல்களின் விலை ரூ.35,700 ஆகவும் உள்ளது. இந்த செயற்கை நுண்ணறிவு கண்ணாடிகளைப் பயன்படுத்த, பயனர்கள் அவற்றை தங்கள் ஸ்மார்ட்போனுடனும் மெட்டா ஏஐ செயலியுடனும் இணைக்க வேண்டியது அவசியம்.

இந்த ஏ.ஐ. கண்ணாடிகள் மூலம் என்னவெல்லாம் செய்ய முடியும்?

• குரல் கட்டளை மூலம் புகைப்படம் மற்றும் வீடியோ: பயனர்கள் வெறுமனே "மெட்டா, புகைப்படம் எடு" (அ) "மெட்டா, வீடியோ பதிவு செய்" என்று கூறுவதன் மூலம் படங்களையும் வீடியோக்களையும் எடுக்க முடியும்.
• உடனடி மொழிபெயர்ப்பு மற்றும் தகவல்: கண்ணாடியை அணிந்திருக்கும்போது, பயனர்கள் தாங்கள் பார்க்கும் ஒன்றைப் பற்றி நிகழ்நேரத்தில் மொழிபெயர்ப்பு அல்லது தகவல்களைக் கேட்கலாம்.  
• நேரடி சேமிப்பு: மெட்டா ஏஐ செயலியின் அமைப்புகளை நிர்வகிப்பதன் மூலம், கண்ணாடிகள் மூலம் எடுக்கப்பட்ட புகைப்படங்கள் மற்றும் வீடியோக்களை நேரடியாக தொலைபேசியில் சேமிக்க முடியும் என்று மெட்டா தெரிவித்துள்ளது.
• ஒளிபுகும் திறன் மாற்றம்: இந்த மெட்டா ஏஐ கண்ணாடிகள் ஒளிபுகும் திறன் மாறும் வசதியைக் கொண்டுள்ளன. இதன் மூலம், உட்புறத்தில் இருந்து வெளிப்புறத்திற்குச் செல்லும்போது கண்ணாடியின் லென்ஸ்கள் தானாகவே நிறத்தை மாற்றிக்கொள்ளும். 
• வீடியோ பதிவு: மெட்டா கண்ணாடிகள் 3 நிமிடங்கள் வரை நீளமான வீடியோக்களைப் பதிவு செய்ய முடியும். சிறந்த ஒலி மற்றும் வீடியோ தரத்திற்காக 12MP கேமரா, 5 மைக்ரோஃபோன் அமைப்பைக் கொண்டுள்ளது. இந்த செயல்பாட்டிற்காக ஒரு பிடிப்பு பொத்தானும் உள்ளது.
• திறந்த ஸ்பீக்கர்கள்: சுற்றுப்புற ஒலிகளுக்கு ஏற்ப தானாகவே சரிசெய்து கொள்ளும் தகவமைப்பு ஒலி கட்டுப்பாட்டுடன் திறந்த காது ஸ்பீக்கர்கள் உள்ளன.  
• மின்சக்தி சுவிட்ச்: இந்த கண்ணாடிகள் பவர் சுவிட்சுடன் வருகின்றன. இதன் சார்ஜிங் கேஸ் ஒருமுறை சார்ஜ் செய்தால் நான்கு மணி நேரம் வரை கண்ணாடிகளுக்கு சக்தியளிக்கும். முழுமையாக சார்ஜ் செய்யப்பட்ட கேஸுடன் மொத்தம் 36 மணி நேரம் வரை பயன்படுத்தலாம்.
• நேரலை ஒளிபரப்பு: பயனர்கள் கண்ணாடிகள் மூலமாக நேரடியாக நேரலை ஒளிபரப்பு சேவையையும் பயன்படுத்த முடியும்.  
• தனியுரிமை பாதுகாப்பு: பதிவு செய்யும் போதோ அல்லது நேரலை ஒளிபரப்பு செய்யும் போதோ மற்றவர்களுக்குத் தெரியப்படுத்துவதற்காக ஒரு பிடிப்பு எல்.இ.டி. விளக்கு ஒளிரும். அது தடுக்கப்பட்டால், அதை அகற்ற பயனர்களுக்கு அறிவிப்பு வரும். இது உள்ளடக்கம் பதிவு செய்யும்போது மற்றவர்கள் அறிந்து கொள்ள உதவும்.