கடல் நீரிலிருந்து ஹைட்ரஜன் எரிபொருள்: ஷார்ஜா விஞ்ஞானிகள் சாதனை!

பூமியில் இருந்து தோண்டி எடுக்கப்படும் எரிபொருட்களை விட ஹைட்ரஜன் சிறந்த, மாசு இல்லாத எரிபொருளாக கருதப்படுகிறது. காரணம் மற்ற எரிபொருட்கள் போல கரியமில வாயுவை (கார்பன்-டை-ஆக்சைடை) வெளியிடாது. எனவே, ஹைட்ரஜன்தான் எதிர்கால எரிசக்திக்கான ஆதாரமாக இருக்கும் என கருதப்படுகிறது.

மின்சாரத்தை பயன்படுத்தி கடல் நீரிலிருந்து ஹைட்ரஜன் எரிபொருளைத் தயாரிக்கும் முறையை ஷார்ஜா பல்கலை. விஞ்ஞானிகள் உருவாக்கியுள்ளனர். இதன் மூலம், காற்றில் மாசுபாட்டை ஏற்படுத்தும் கார்பைன்டை ஆக்ஸைடை வெளியிடாத, தூய்மையான ஹைட்ரஜன் எரிபொருள் தயாரிக்க முடியும்.

ஐக்கிய அரபு எமிரேட்ஸில் உள்ள ஷார்ஜா பல்கலைக் கழக விஞ்ஞானிகள் ரசாயனங்கள் அல்லது உப்பு அகற்றுதல் இல்லாமல் கடல் நீரில் இருந்து நேரடியாக ஹைட்ரஜனை உற்பத்தி செய்யும் திறன் கொண்ட தொழில்நுட்பத்தை உருவாக்கியுள்ளனர். ஹைட்ரஜன் வாயுவை உற்பத்தி செய்ய பொதுவாக தூய நீர் தேவைப்படுகிறது. இது பல நாடுகளில் கிடைக்காது. ஆனால், இந்த புதிய தொழில்நுட்பத்தின் மூலம், கடல் நீரில் இருந்து 98% மின்சாரத்தைப் பயன்படுத்தி சுத்தமான ஹைட்ரஜனை உருவாக்க முடியும். இந்த முறையில் எந்த ரசாயனங்களும் பயன்படுத்தப்படுவதில்லை, எனவே இது முற்றிலும் சுற்றுச்சூழல் நட்பு மற்றும் மாசு இல்லாதது.

கடல் நீரில் குளோரைடு அயனிகள் இழப்பிலிருந்து தன்னைப் பாதுகாக்கும் பல அடுக்கு மின்முனையை உருவாக்கியுள்ளதாக ஆராய்ச்சிக் குழுவின் தலைவர் டாக்டர் தன்வீர் உல் ஹக் கூறினார். இந்த மின்முனை சிறப்பு மைக்ரோ சூழலை உருவாக்குகிறது, இது ஹைட்ரஜன் உற்பத்தி விகிதத்தை நீண்ட நேரம் பராமரிக்க உதவுகிறது.

இந்த தொழில்நுட்பம் குறைந்தது 300 மணி நேரம் தொடர்ந்து வேலை செய்யும். பயன்படுத்தப்படும் மின் ஆற்றலில் சுமார் 98% ஹைட்ரஜனாக மாற்றப்படுகிறது. செலவு குறைந்தது மற்றும் நிலையானது. இந்த கண்டுபிடிப்பு முக்கியமாக கடலோரப் பகுதிக்காக வடிவமைக்கப்பட்டுள்ளது. எதிர்காலத்தில், இந்த தொழில்நுட்பத்தின் மூலம் கடலோரப் பகுதிகளில் சூரிய சக்தியில் இயங்கும் ஹைட்ரஜன் பண்ணைகளை உருவாக்க முடியும் என்று விஞ்ஞானிகள் நம்புகின்றனர்.