நொடிக்கு நொடி கண்காணிக்கும் ஜி.பி.எஸ் டிராக்கர்கள்... டாப் 3 இந்திய மாடல்கள் விவரம்!

இன்றைய வேகமான உலகில், நமது வாகனங்களைப் பாதுகாப்பது என்பது சவாலான விஷயம். கார் திருட்டு அபாயங்கள் அதிகரித்துவிட்ட நிலையில், நமது கார் எங்கிருக்கிறது என்பதைத் தெரிந்துகொள்வது அவசியமாகிறது. இங்குதான் ஜி.பி.எஸ் டிராக்கர் (Global Positioning System Tracker) என்ற சாதனம் முக்கியப் பங்காற்றுகிறது. இது சிறிய மின்னணு சாதனம் ஆகும், இது செயற்கைக்கோள்கள் உதவியுடன் உங்க காரின் துல்லியமான இருப்பிடத் தகவலைப் பெற்று, அதை உங்க ஸ்மார்ட்போன் ஆஃப்-க்கு ரியல்டைம் நேரத்தில் (Real-Time) அனுப்பும்.

முக்கியப் பயன்கள்:

கார் திருடு போகும் பட்சத்தில், அதன் இருப்பிடத்தை உடனடியாக அறிந்து, காவல்துறையின் உதவியுடன் விரைவாகக் கண்டுபிடிக்க உதவுகிறது. உங்க குடும்ப உறுப்பினர்கள் அல்லது ஓட்டுநர்கள் காரை எங்கு, எப்படி இயக்குகிறார்கள்? என்பதைக் கண்காணித்து, அவர்களின் பாதுகாப்பை உறுதி செய்கிறது. சில டிராக்கர்கள் காரின் பேட்டரி நிலை, மைலேஜ் மற்றும் ஓட்டுநர் பழக்கம் போன்ற தகவல்களையும் வழங்குகின்றன. விநியோக நிறுவனங்கள் (Delivery) தங்கள் வாகனக் குழுமத்தைக் (Fleet) கண்காணிக்கவும், வழித் தடங்களை (Routes) திறமையாக நிர்வகிக்கவும் உதவுகிறது.

இந்தியாவில் கிடைக்கும் 3 சிறந்த ஜி.பி.எஸ் டிராக்கர் மாடல்கள்

இந்தியச் சந்தையில் நம்பகத்தன்மை, துல்லியம் மற்றும் பயன்பாட்டுக்கு எளிமை ஆகியவற்றின் அடிப்படையில் வரவேற்பைப் பெற்றுள்ள 3 GPS டிராக்கர் மாடல்கள் இங்கே பட்டியலிடப்பட்டுள்ளன:

1. ஜியோமோடிவ் (JioMotive) 

ரிலையன்ஸ் ஜியோவின் தயாரிப்பான ஜியோமோடிவ், காரின் OBD போர்ட்டில் (On-Board Diagnostics) எளிதில் பொருத்தக்கூடிய ஸ்மார்ட் சாதனமாகும். இது ஜி.பி.எஸ் டிராக்கராக மட்டுமல்லாமல், காரின் சுகாதாரக் கண்காணிப்பு சாதனமாகவும் செயல்படுகிறது. 'Check Engine' லைட் ஏன் எரிகிறது என்பதைக் கண்டறிதல், ஓட்டுநர் பழக்கத்தைக் கண்காணித்தல் மற்றும் இன்ஜினை ரிமோட் மூலம் செயலிழக்க செய்யும் வசதி (Immobilizer) போன்ற மேம்பட்ட அம்சங்களை வழங்குகிறது. காரின் OBD போர்ட்டில் செருகினால் போதும், தனி வயரிங் தேவையில்லை.

2. ஆட்டோவிஸ் ஜிகா (AutoWiz Giga)

இந்தியாவில் மிகவும் பிரபலமான மற்றும் நம்பகமான ஜி.பி.எஸ். டிராக்கர்களில் இதுவும் ஒன்று. துல்லியமான நிகழ்நேர கண்காணிப்புடன், இது பயண வரலாற்றை விரிவாகப் பதிவு செய்கிறது. ஓட்டுநர் அதிக வேகத்தில் சென்றாலோ அல்லது திடீரென பிரேக் பிடித்தாலோ எச்சரிக்கை அனுப்பும் வசதி இதில் உள்ளது. இது தனிப்பட்ட பயன்பாடு மற்றும் சிறு வணிக வாகனக் கண்காணிப்புக்கு ஏற்றது. இதன் செயல்திறன் மற்றும் துல்லியமான இருப்பிடத் தகவல் அனுப்புதல் ஆகியவை பயனர்களிடையே நல்ல பெயரைப் பெற்றுள்ளது.

3. லெட்ஸ்டிராக் (Letstrack)

லெட்ஸ்டிராக் பல்வேறு தேவைகளுக்காக பலவிதமான ஜி.பி.எஸ். டிராக்கர் மாடல்களை வழங்குகிறது (வயர் மூலம் பொருத்தப்படும், வயர்லெஸ் பேட்டரி மூலம் இயங்கும்). இதன் தனித்துவமான அம்சம், பல மொழி ஆதரவு (Multiple Language Support), குரல் வழி கண்காணிப்பு (Voice Tracking) ஆகும். உங்க காரின் அருகில் குறிப்பிட்ட தூரத்தை (Geo-fence) அமைத்து, அதை விட்டு கார் வெளியேறினால் உடனடியாக எச்சரிக்கை பெறும் வசதியும் இதில் உள்ளது. இதன் வயர் மூலம் பொருத்தப்படும் மாடல்கள் பொதுவாகக் கண்ணுக்குத் தெரியாத வகையில் நிறுவப்படுவதால், திருடர்களால் எளிதில் அகற்ற முடியாது.

பெரும்பாலான ஜி.பி.எஸ். டிராக்கர் சேவைகளைப் பயன்படுத்த, டிவைஸின் விலைக்கு மேலாக, மாதாந்திர அல்லது வருடாந்திர சிம் கார்டு/டேட்டா சந்தா (Subscription Fee) கட்டணத்தை நீங்க செலுத்த வேண்டியிருக்கும். எனவே, வாங்கும் முன் அதன் மொத்தச் செலவையும் உறுதி செய்து கொள்வது நல்லது.