கடல் உயிரினங்களால் உருவான மாற்றம்: நீல நிறத்தில் ஒளிர்ந்த அலைகள்; ஆபத்து அறிகுறியா?

பயோலுமினென்சென்ஸ் அலைகள் சென்னையில் கடல் அலைகளில் ஒளிர்ந்ததால், சென்னைவாசிகளுக்கு ஒரு மயக்கும் இயற்கை காட்சி விருந்தாக அமைந்தது. இந்த அரிய நிகழ்வைக் காண பலரும் கடற்கரையில் குவிந்ததால், கூட்ட நெரிசல் ஏற்பட்டது.

சென்னையில் கிழக்கு கடற்கரைச் சாலை (ECR) கடற்கரை, குறிப்பாக திருவான்மியூர் மற்றும் நீலாங்கரை அருகே, கடந்த இரு தினங்களுக்கு முன்பு (அக்டோபர் 18) இரவு நேரத்தில் கடலின் அலைகள் நீல நிற ஒளியில் ஒளிர்ந்தது, பார்வையாளர்கள் கவனத்தை ஈர்த்த நிலையில், இது தொடர்பான அறிவியல் ஆர்வத்தைத் தூண்டியது.

பயோலுமினென்சென்ஸ் என்பது சில கடல் உயிரினங்களால் உற்பத்தி செய்யப்படும் ஒரு இயற்கை நிகழ்வு. முதன்மையாக டைனோஃப்ளாஜெல்லட்டுகள் எனப்படும் நுண்ணிய பிளாங்க்டன் இவற்றை வெளியிடுகின்றன. இந்த சிறிய உயிரினங்கள் கடல் அலை எழும்பும்போது அல்லது தண்ணீரில் உள்ள பிற தொந்தரவுகள் ஏற்படும்போது கிளர்ந்தெழுந்து தங்கள் உடலில் ஒரு இரசாயன எதிர்வினை மூலம் ஒளியை வெளியிடுகின்றன. இதன் விளைவாக ஏற்படும் நீல-பச்சை ஒளியியல் காட்சி அலைகளில் பிரதிபளிக்கும்.

வேறு எந்த உயிரினத்தாலும் தங்களுக்கு ஆபத்து வந்துவிட கூடாது என்பதால் தங்களை பாதுகாத்தக்கொள்ளவும்,  தங்களுக்கான இரையை ஈர்ப்பது மற்றும் தன் இனத்திடம் தகவல் தொடர்பு உள்ளிட்ட பல்வேறு நோக்கங்களுக்காக கடல் உயிரினங்கள் பயோலுமினென்சென்ஸைப் பயன்படுத்துகின்றன. இதனை பார்க்கும்போது அதிசயமாக இருந்தாலும், அது அடிப்படையான சுற்றுச்சூழல் மாற்றங்களையும் குறிக்கும் வகையில் இருக்கும் என்று கூறப்படுகிறது.

மேலும் சென்னையில் சமீபத்தில் பெய்த கனமழை இந்த நிகழ்வுக்கு காரணமாக இருக்கலாம் என்றும் தகவல் வெளியாகியுள்ளது. கடலோர நீரில் ஊட்டச்சத்துக்களின் வருகை, குறைந்த கடல் மேற்பரப்பு வெப்பநிலையுடன் இணைந்து, ஒரு பொதுவான பயோலுமினசென்ட் இனமான நோக்டிலூகா சிண்டிலன்ஸின் பெருக்கத்திற்கு சாதகமான நிலைமைகளை உருவாக்கியிருக்கலாம். பயோலுமினென்சென்ஸின் பெரும்பாலான நிகழ்வுகள் பாதிப்பில்லாதவை என்றாலும், பெரிய பூக்கள் தண்ணீரில் ஆக்ஸிஜனைக் குறைக்கும், கடல் வாழ் உயிரினங்களைப் பாதிக்கும் என்று நிபுணர்கள் எச்சரிக்கின்றனர்.

இத்தகைய நிகழ்வுகள் கடலோர நீரில் மாசு அதிகரிப்பதால் ஏற்படும் பாதிப்புகளுடன் தொடர்புடையதாக இருக்கலாம் என்று சுற்றுச்சூழல் ஆர்வலர் குறிப்பிடுகிறார். ஒளிரும் அலைகள் பற்றிய செய்தி சமூக வலைதளங்களில் பரவியதால், அப்பகுதியில் வசிப்பவர்கள் மற்றும் சுற்றுலாப் பயணிகள் என பலரும் இந்த அரிய காட்சியைக் காண கடற்கரைகளில் குவிந்தனர். இதன் காரணமாக அங்கு கூட்ட நெரிசல் ஏற்பட்டது.

இந்த நிகழ்வு இயற்கையின் அதிசயங்களையும், கடல் சுற்றுச்சூழல் அமைப்புகளின் நுட்பமான சமநிலையையும் காட்டுகிறது. அதே சமயம் கடலோரச் சூழல்களில் மனித நடவடிக்கைகளின் பாதுகாப்பு மற்றும் தாக்கம் பற்றிய விவாதங்களைத் தூண்டுகிறது என்று சுற்றுச்சூழல் ஆர்வலர்கள் கூறி வருகின்றனர்.