உலகின் 8-வது அதிசயம்?... சாலைகளை உருவாக்கும் அதிசய ஏரி! எந்த நாட்டில் இருக்கிறது தெரியுமா?

கரீபியன் தீவு நாடான டிரினிடாட்டின் தென்மேற்கு கடற்கரையில் அமைந்துள்ள லா ப்ரியா பிட்ச் ஏரி (La Brea Pitch Lake), வெறும் ஒரு ஏரி அல்ல, அது புவியியல் அற்புதம். உள்ளூர் மக்களால் "உலகின் 8-வது அதிசயம்" என்று புகழப்படும் இந்த ஏரி, சுமார் 109 ஏக்கர் பரப்பளவைக் கொண்டு உள்ளது. உலகின் மிகப்பெரிய இயற்கை நிலக்கீல் (asphalt) படிமத்தைக் கொண்டுள்ள இந்த ஏரி, கிட்டத்தட்ட 10 மில்லியன் டன் நிலக்கீலைத் தன்னகத்தே கொண்டுள்ளது. பல நூற்றாண்டுகளாக ஆராய்ச்சியாளர்களையும், பொதுமக்களையும் கவர்ந்துவரும் இந்த ஏரி, இன்றும் அறிவியலுக்குப் பல மர்மங்களை ஒளித்து வைத்துள்ளது.

உலக சாலைகளை அலங்கரித்த நிலக்கீல்:

லா ப்ரியா பிட்ச் ஏரியின் மிகவும் வியக்கத்தக்க அம்சங்களில் ஒன்று, அதன் நிலக்கீல் உற்பத்தி செய்யும் திறன். இந்த இயற்கை நிலக்கீல், உலகப் புகழ்பெற்ற பல இடங்களில் சாலைகளை அமைக்கப் பயன்படுத்தப்பட்டுள்ளது. இங்கிலாந்தில் உள்ள பக்கிங்ஹாம் அரண்மனையின் சாலைகள், நியூயார்க்கில் உள்ள லா கார்டியா விமான நிலையம், நியூயார்க்கை நியூஜெர்சியுடன் இணைக்கும் லிங்கன் டன்னல் சாலை நிலக்கீல் பயன்படுத்தி போடப்பட்டது. இதுமட்டுமின்றி, உலகின் பல்வேறு நாடுகளிலும் சாலைகள் அமைப்பதற்கு இந்த ஏரியின் நிலக்கீல் பயன்படுத்தப்பட்டுள்ளது.

சமீபத்தில், ஐரோப்பிய விண்வெளி ஏஜென்சி (European Space Agency) மேற்கொண்ட ஓர் ஆய்வு, இந்த ஏரி குறித்த திடுக்கிடும் உண்மையைக் கண்டறிந்துள்ளது. ஏரியின் மேற்பரப்பிற்கு அடியில் நுண்ணுயிரிகள் (microbes) உயிருடன் வாழ்கின்றன. இந்த நுண்ணுயிரிகளின் இருப்பு, மற்ற கிரகங்களில் உயிர் இருப்பதற்கான சாத்தியக் கூறுகள் குறித்த ஆய்வுகளுக்குப் புதிய வெளிச்சம் பாய்ச்சும் என விஞ்ஞானிகள் நம்புகின்றனர். இந்த கண்டுபிடிப்பு லா ப்ரியா பிட்ச் ஏரியின் மர்மத்தை மேலும் ஆழப்படுத்துகிறது.

ஏரியின் விசித்திரத் தோற்றமும், நம்பிக்கைகளும்:

தொலைவிலிருந்து பார்க்கும்போது, இந்த ஏரி பெரிய கருப்பு நிற வாகன நிறுத்துமிடத்தைப் போலவே காட்சியளிக்கும். ஆனால், அருகில் சென்று பார்த்தால், அதன் கரடுமுரடான, அலை அலையான மேற்பரப்பு, கருப்பு மண்ணைப் போலவே தோன்றும். மழைக்காலங்களில் இந்த மேற்பரப்பில் சிறிய குளங்கள் உருவாகின்றன. இந்த சல்ஃபர் நிறைந்த குளங்களை உள்ளூர் மக்கள் "உயிர் தரும் நீரூற்றுகள்" என்று நம்புகின்றனர். தோல் வியாதிகள் மற்றும் மூட்டு வலிகளுக்கு இவை நன்மை பயக்கும் என்றும் அவர்கள் கூறுகிறார்கள்.

தொன்மையான வரலாறு மற்றும் புராணக் கதைகள்

இந்த ஏரியை முதன்முதலில் 1595-ம் ஆண்டில் பிரிட்டிஷ் ஆய்வாளர் சர் வால்டர் ராலே, 'எல் டோரடோ' தேடிச் சென்றபோது கண்டறிந்தார். 1792-ம் ஆண்டு வரை ஸ்பானியர்கள் இந்த நிலக்கீலை சுத்திகரிக்கும் பணியைத் தொடங்கவில்லை. அப்போது, இந்த இடத்திற்கு Tierra de Brea (அ) Earth of Pitch என்று பெயரிடப்பட்டது. இதுவே பின்னர் ‘லா ப்ரியா’ என மருவியது. 

உள்ளூர் அமெரிக்கன் இந்திய சமூகத்தினர் இந்த ஏரியை "கடவுள்களின் கோபம்" என்று கருதினர். முன்னோர்களின் ஆவிகள் என்று நம்பப்பட்ட ஹம்மிங்பேர்டுகளை பழங்குடியினர் சாப்பிட்டதால், கடவுள் கோபமடைந்து அந்த பழங்குடி இனத்தையே ஏரி விழுங்கிவிட்டதாக புராணக்கதை கூறுகிறது. இது இந்த ஏரியைச் சுற்றியுள்ள மர்மத்தை மேலும் அதிகரிக்கிறது.

புதைபொருள் ஆராய்ச்சிகள் மற்றும் நீளும் மர்மம்:

இந்த ஏரிப் பகுதியில் மேற்கொள்ளப்பட்ட அகழ்வாராய்ச்சிகள், பல்வேறு தொல்பொருள் எச்சங்களை வெளிப்படுத்தியுள்ளன. அவற்றில், ஒரு கலைஞரின் பெயருடன் கூடிய, விலங்கு வடிவில் செதுக்கப்பட்ட மர பெஞ்சும் கிடைத்துள்ளது. கலைப்பொருட்கள் உள்ளூர் அருங்காட்சியகத்தில் பாதுகாக்கப்பட்டு, லா ப்ரியா பிட்ச் ஏரியின் தொன்மை மற்றும் மர்மத்திற்குச் சான்றாக நிற்கின்றன. லா ப்ரியா பிட்ச் ஏரி, அதன் அசாத்தியமான இயற்கை நிகழ்வுகளாலும், அறிவியலுக்கு அப்பாற்பட்ட மர்மங்களாலும், விஞ்ஞானிகள் மற்றும் உலகெங்கிலும் உள்ள பார்வையாளர்களின் கவனத்தை தொடர்ந்து ஈர்த்து வருகிறது.