33 நாட்கள் நீடிக்கும் பேட்டரி, சூரிய வெளிச்சத்திலும் பளிச்... விவோவின் ஸ்மார்ட்வாட்ச் புரட்சி!

விவோ நிறுவனம் அதன் ஸ்மார்ட்வாட்ச் சீரிஸில் புதிய வாட்ச் அறிமுகப்படுத்தியுள்ளது. அதுதான் விவோ வாட்ச் ஜிடி 2 (Vivo Watch GT 2). சீனாவில் இன்று எக்ஸ்-300 சீரிஸ் ஸ்மார்ட்போன்கள் மற்றும் பேட் 5e டேப்லெட்டுடன் இது அறிமுகப்படுத்தப்பட்டுள்ளது.

கடந்த வசந்த காலத்தில் வெளியான வாட்ச் 5-ன் அப்டேட்டாக வரும் வாட்ச் ஜிடி 2, அதன் சதுர வடிவ டிஸ்ப்ளேவை அப்படியே தக்கவைத்துள்ளது. முதலில் பார்க்கும்போது இது ஆப்பிள் வாட்ச் சீரிஸ் 11-ஐப் (Apple Watch Series 11) போல அச்சு அசலாக ஒத்திருக்கிறது. இந்தத் தோற்ற ஒற்றுமைக்கு மேலும் வலுசேர்க்கும் விதமாக, இந்த வாட்சில் சுவாரஸ்யமான இணைப்பு வசதி கொடுக்கப்பட்டுள்ளது. ஆம், வாட்ச் ஜிடி 2-ஐ ஒரே நேரத்தில் ஒரு ஐபோன், ஒரு விவோ ஸ்மார்ட்போனுடன் இணைக்க முடியும்! 2 போன்களில் இருந்து வரும் அறிவிப்புகளையும் ஒரே நேரத்தில் உங்கள் வாட்ச்சில் பார்த்துக் கொள்ளலாம். இந்தச் செயல்பாட்டைத் திறக்க சீன ஆப்பிள் அக்கவுண்ட் தேவை என்றாலும், இது அரிய மற்றும் பயனுள்ள அம்சமாகும்.

இந்த வாட்ச், அலுமினிய உறையில் பொருத்தப்பட்ட 2.07-இன்ச் டிஸ்ப்ளேவை கொண்டுள்ளது. இதன் ரெசல்யூஷன் 514×432 பிக்சல்கள், புதுப்பிப்பு வீதம் 60 Hz. சூரிய ஒளியிலும் தகவல்கள் பளிச்சென்று தெரிய, இது 2,400 நிட்ஸ் வரை பிரகாசத்தை அள்ளி வீசும். விவோ, இந்த வாட்சில் 695 mAh பேட்டரி உள்ளதாகக் கூறுகிறது. ஆனால், இ-சிம் இணைப்பு கொண்ட பதிப்பில் இது 595 mAh ஆகக் குறைகிறது. இ-சிம் பதிப்பை விட ப்ளூடூத் பதிப்புதான் பேட்டரி ஆயுளில் அதிக நாட்கள் தாக்குப்பிடிக்கிறது. பவர்-சேவிங் பயன்முறையில் (power-saving mode) 33 நாட்கள், சாதாரணப் பயன்பாட்டில் 17 நாட்கள், எப்போதும் இயங்கும் டிஸ்ப்ளே (AoD) செயல்படுத்தப்பட்டால் 14 நாட்கள், இ-சிம் (eSIM) மாடலில் எல்.டி.இ மோடம் (LTE modem) பயன்பாட்டில் இருக்கும்போது 8 நாட்கள் பேட்டரி ஆயுளை மட்டுமே அடையும்.

2 வகைகளும் மைக்ரோஃபோன்கள் மற்றும் ஸ்பீக்கர்களைக் கொண்டுள்ளன. எனவே, இணைக்கப்பட்ட போனை எடுக்காமலேயே நீங்க  கால்ஸ் கையாளலாம். அத்துடன், தூக்க கண்காணிப்பு, மாதவிடாய் சுழற்சி கண்காணிப்பு (sleep and cycle tracking) வசதிகளையும் இது ஆதரிக்கிறது.

ப்ளூடூத் மாடல்: CNY 499 (தோராயமாக ரூ.5,800), இ-சிம் மாடல்: CNY 699 (தோராயமாக ரூ.8,100)-க்கும் விற்பனை செய்யப்படுகிறது. விவோ வாட்ச் ஜிடி 2, கவர்ச்சிகரமான விலையில் (சுமார் $70) கிடைக்கிறது. ஆனால், X300 சீரிஸ் போலல்லாமல், இந்த வாட்ச் உலகளவில் எப்போது கிடைக்கும் என்பது குறித்து விவோ இன்னும் எந்த அறிவிப்பையும் வெளியிடவில்லை.