குட்டிகளுடன் சாலையைக் கடந்து சென்ற யானை கூட்டம்: வைரலாகும் வீடியோ காட்சி

சின்னதடாகம் பகுதியில் குட்டிகளுடன் 6 யானைகள் கூட்டம் ஒன்று சாலையை வேகமாக கடந்து வனப் பகுதிக்குள் செல்லும் செல்போன் வீடியோ காட்சி சமூக வலைதளங்களில் வைரலாகி வருகிறது.

சாலையைக் கடந்து சென்ற யானை கூட்டம்... வைரலாகும் விடியோ காட்சி!#Coimbatore pic.twitter.com/fXkt4W79gj

— Indian Express Tamil (@IeTamil) May 15, 2025

கோவை மேற்குத் தொடர்ச்சி மலையை ஒட்டியுள்ள தொண்டாமுத்தூர் சுற்றுவட்டார கிராமப் பகுதிகளில் கடந்த சில மாதங்களாக வனப்பகுதியில் இருந்து வெளியேறிய காட்டுயானைகள் அப்பகுதிகளில் முகாமிட்டு வீடுகளில் வைத்து இருக்கும் உணவுப் பொருட்கள், தோட்டத்தில் புகுந்து கால்நடைகளுக்கு வைத்து இருந்த தீவனங்கள் மற்றும் விவசாய பயிர்களை உண்டு சேதப்படுத்தி வருவது தொடர்ந்து நடைபெற்று வருகிறது. வனத் துறையினரும் பல்வேறு குழுக்கள் அமைத்து கண்காணித்து யானைகளை வனப் பகுதிக்குள் விரட்டி வருகின்றனர்.

இந்நிலையில், கடந்த சில நாட்களாக வெள்ளியங்கிரி அடிவாரத்தில் உள்ள பூண்டி ஆண்டவர் கோயில் வளாகத்தில் உள்ள கடைகள் மற்றும் உணவு கூடங்களுக்கு, அங்கு வரும் ஒற்றை காட்டுயானை உணவுப்பொருள்களை உண்டு சேதப்படுத்தியது. இதனால், பக்தர்களை பாதுகாக்க வனத்துறையினர் நரசிம்மன் மற்றும் சின்னத்தம்பி என்ற 2 கும்கி யானைகளை அங்கு நிறுத்தி கண்காணிப்பு பணியில் ஈடுபடுத்தி வருகின்றனர். இதனால், அப்பகுதியில் இருந்த கடைகளைச் சேதப்படுத்தி வந்த ஒற்றைக் காட்டுயானை அங்கு வருவதில்லை. இதனால் பக்தர்கள் நிம்மதியாக சென்று சாமி தரிசனம் செய்து வருகின்றனர்.

இந்நிலையில், இன்று காலை சின்னதடாகம் பகுதியில் குட்டிகளுடன் 6 யானை கூட்டம் ஒன்று சாலையை வேகமாக கடந்து வனப்பகுதிக்கு செல்லும் செல்போன் வீடியோ ஒன்று வெளியாகி உள்ளது. இதனால், அப்பகுதி மக்கள் பாதுகாப்பாக இருக்க வனத்துறையினர் அறிவுறுத்தி உள்ளது குறிப்பிடத்தக்கது.