'நீங்க பேசுங்க... நாங்க ஜெயிப்போம்'... அபிஷேக் - கில்லின் '4 வார்த்தை' ட்வீட் வைரல்!

செப்.21 அன்று துபாய் சர்வதேச கிரிக்கெட் ஸ்டேடியத்தில் நடந்த ஆசிய கோப்பை 2025 சூப்பர் 4 போட்டியின் பாகிஸ்தானுக்கு எதிரான ஆட்டத்தில், இந்திய அணிக்காக அபிஷேக் சர்மா மற்றும் ஷுப்மன் கில் ஆகியோர் பேட்டிங்கில் சிறப்பான ஆட்டத்தை வெளிப்படுத்தினர். இந்த போட்டியில் அபிஷேக் 39 பந்துகளில் 74 ரன்களும், ஷுப்மன் கில் 28 பந்துகளில் 47 ரன்களும் எடுத்து அணியின் வெற்றிக்கு உதவினர். இதில் இந்தியா 6 விக்கெட் வித்தியாசத்தில் வெற்றி பெற்றது.

அபிஷேக் சர்மா தனது இன்னிங்ஸில் 6 பவுண்டரிகள் மற்றும் 5 சிக்ஸர்களை விளாசி, ஷுப்மன் கில்லுடன் இணைந்து முதல் விக்கெட்டுக்கு 9.5 ஓவர்களில் 105 ரன்கள் குவித்தார். கில் தனது இன்னிங்ஸில் 8 பவுண்டரிகளை அடித்தார். இந்தப் போட்டியில் தனது சிறப்பான ஆட்டத்திற்காக அபிஷேக் ஆட்டநாயகன் விருதையும் வென்றார்.

சமூக வலைதளங்களில் ட்வீட்

போட்டியின் போது பாகிஸ்தான் வேகப்பந்து வீச்சாளர்களான ஷாஹீன் ஷா அப்ரிடி மற்றும் ஹாரிஸ் ரவுஃப் ஆகியோருடன் அபிஷேக் மற்றும் கில் இருவரும் வாக்குவாதத்தில் ஈடுபட்டனர். போட்டி முடிந்த பிறகு, இருவரும் தங்கள் X சமூக வலைதளப் பக்கத்தில் பாகிஸ்தான் வீரர்களை கிண்டல் செய்து பதிவுகளை இட்டனர்.

ஷுப்மன் கில் தனது பதிவில், "Game speaks, not words" விளையாட்டுதான் பேசும், வார்த்தைகள் அல்ல என்று பதிவிட்டார். அபிஷேக் சர்மா, "You talk, we win" நீ பேசு, நாங்கள் வெல்வோம் என்ற தலைப்புடன் போட்டியின் 4 புகைப்படங்களை பகிர்ந்தார். அந்தப் பதிவுகள் தற்போது வைரலாகி வருகின்றன.

அபிஷேக் சர்மா நிகழ்த்திய சாதனைகள்

இந்தப் போட்டியில் தனது அதிரடி ஆட்டத்தின் மூலம் அபிஷேக் சர்மா பல்வேறு சாதனைகளை முறியடித்தார். போட்டியின் முதல் பந்திலேயே ஷாஹீன் ஷா அப்ரிடி பந்துவீச்சில் சிக்ஸர் அடித்ததன் மூலம், டி20 போட்டிகளில் இந்தியாவின் இன்னிங்ஸின் முதல் பந்தில் 2 முறை சிக்ஸர் அடித்த முதல் இந்திய வீரர் என்ற பெருமையை அவர் பெற்றார்.

இந்தப் போட்டியில் அடித்த 2-வது சிக்ஸர் மூலம், சர்வதேச டி20 போட்டிகளில் 50 சிக்ஸர்கள் அடித்த வீரர்களின் பட்டியலில் அவர் இணைந்தார். இவர் தனது 50வது சிக்ஸரை 331வது பந்தில் அடித்து, சர்வதேச முழு உறுப்பினர் நாடுகளில் டி20 போட்டிகளில் வேகமாக 50 சிக்ஸர்களை எட்டிய வீரர் என்ற சாதனையைப் படைத்தார்.

பாகிஸ்தானுக்கு எதிராக ஒரு டி20 போட்டியில் இந்திய வீரர் அடித்த அதிவேக அரைசதம் என்ற யுவராஜ் சிங்கின் சாதனையை அபிஷேக் முறியடித்தார். யுவராஜ் சிங் 2012-ம் ஆண்டு அகமதாபாத்தில் பாகிஸ்தானுக்கு எதிராக 29 பந்துகளில் அரைசதம் அடித்திருந்தார். அபிஷேக் அதை 24 பந்துகளில் அடித்து புதிய சாதனை படைத்தார். தற்போது உலகின் நம்பர் 1 டி20 பேட்ஸ்மேனாக இருக்கும் அபிஷேக், அடுத்ததாக புதன்கிழமை, செப்டம்பர் 24 அன்று துபாயில் பங்களாதேஷ் அணிக்கு எதிராக களமிறங்கவுள்ளார்.