நடிகர் விஜய்க்கு மதுரையில் ரசிகர்கள் உற்சாக வரவேற்பு; விமான நிலையத்தில் பரபரப்பு

‘ஜனநாயகன்’ திரைப்படத்தின் படப்பிடிப்புக்காக கொடைக்கானல் செல்லும் வழியில் நடிகரும், தமிழக வெற்றிக் கழகத் தலைவருமான விஜய், இன்று மாலை மதுரை விமான நிலையம் வந்தடைந்தார். அவரை பார்வையிடும் நோக்கில் நூற்றுக்கணக்கான தொண்டர்கள் மற்றும் ரசிகர்கள் விமான நிலையத்திற்கு முன்பாக குவிந்தனர்.

விஜயின் வருகையை முன்னிட்டு, போலீசார் விமான நிலையத்திற்குள் பொதுமக்கள் நுழைவதை கட்டுப்படுத்தி, 500 மீட்டருக்கு முன்பே தடுப்பு வேலி அமைத்திருந்தனர். இருப்பினும், ரசிகர்கள் பலர் காவல்துறையின் கட்டுப்பாடுகளை மீற முயற்சித்ததால், பரபரப்பு சூழ்நிலை ஏற்பட்டது.

விமான நிலையத்தில் இருந்து திறந்த வாகனத்தில் புறப்பட்ட விஜய், ரசிகர்களை கையசைத்து வாழ்த்தினார். அவரை வரவேற்கும் ரசிகர்கள், மலர்மாலைகளை வீசினர். இதன் போது, சிலர் தடுப்பு கம்பிகளை அத்துமீறி தாண்டியதாக தகவல்கள் வெளியாகியுள்ளது. விரைந்து செயல்பட்ட போலீசார், நிலைமையை கட்டுப்படுத்த முயன்றனர்.

பெருங்குடி அருகே உள்ள அம்பேத்கர் சிலை வரை விஜய் பயணித்த நிலையில், இருபுறமும் ரசிகர்கள் மற்றும் பொதுமக்கள் அவரது வருகையை உற்சாகமாக வரவேற்றனர். பெருமளவு மக்கள் திரண்டதால், விமான நிலைய வளாகம் மற்றும் சுற்றுவட்டார பகுதியில் ஒரளவுக்கு பரபரப்புஏற்பட்டது.