கையில் தங்க துப்பாக்கி: கேங்ஸ்டர் லுக்கில் டேவிட் வார்னர்; புஷ்பா 2 படத்தில் நடிக்கிறாரா?

கிரிக்கெட் மட்டுமல்லமல்  நடிப்பிலும் ஆர்வம் கொண்ட ஆஸ்திரேலியா கிரிக்கெட் வீரர் டேவிட் வார்னர் அவ்வப்போது, ரீல்ஸ் வீடியோ வெளியிட்டு வரவேற்பை பெற்றிருந்த நிலையில், தற்போது புஷ்பா 2 படத்தில் நடிகர் அல்லு அர்ஜூனுடன் இணைந்து நடிக்கிறாரா என்ற சந்தேகத்தை எழுப்பியுள்ளது.

ஆஸ்திரேலிய கிரிக்கெட் அணியின் அதிரடி ஓப்பனிங் பேட்ஸ்மேன் டேவிட் வார்னர். கிரிக்கெட் போட்டிகளில் பல்வேறு சாதனைகளை படைத்துள்ள இவர், கொரோனா காலக்கட்டத்தின்போது லாக்டவுன் காலக்கட்டத்தில் டிக்டாக் வீடியோக்களை வெளியிட்டு வந்தார். இவரின் வீடியோக்கள் ரசிகர்கள் மத்தியில் பெரிய வரவேற்பினை பெற்றிருந்தது. குறிப்பாக தெலுங்கு படங்கள் குறித்து இவர் வெளியிட்ட வீடியோக்கள் கவனம் ஈர்த்து வந்தது.

அந்த வகையில், தெலுங்கில் அல்லு அர்ஜூன் நடிப்பில் வெளியாகி பெரிய வெற்றியை பெற்ற புஷ்பா படத்தின் ரீல்ஸ்களை வார்னர் வெளியிட்டது சமூகவலைதளங்களில் அவருக்கான ஃபாலோயர்ஸ் எண்ணிக்கையை அதிகரித்தது. மேலும் புஷ்பா படத்தின் தீவிர ரசிகராக மாறிய டேவிட் வார்னர், தனது சமீபத்திய நேர்காணல் ஒன்றில் தெலுங்கு படத்தில் நடிக்க விரும்புவதாக தெரிவித்திருந்தார். குறிப்பாக வாய்ப்பு கிடைத்தால் புஷ்பா 2 படத்தில் நடிப்பேன் என்றும் கூறியிருந்தார்.

இதற்கிடையில், வார்னர் கேங்ஸ்டர் கெட்டப்பில் போஸ் கொடுக்கும் புகைப்படம் சமூகவலைதளங்களில் வெளியாகியுள்ளது. வெள்ளை சட்டை மற்றும் வெள்ளை பேன்ட் அணிந்த வார்னர் புகைப்படத்தில் கையில் தங்க துப்பாக்கியை பிடித்துள்ளார். இந்தப் படம் சமூக ஊடகங்களில் வேகமாகப் பரவியது, மேலும் இது புஷ்பா 2 படத்தில் அமைந்துள்ளதாக நெட்டிசன்கள் கருத்து தெரிவித்து வருகின்றனர்.  

இருப்பினும், இந்த வதந்திகளைப் பற்றி வார்னர் அல்லது புஷ்பா 2 தயாரிப்பாளர்கள் எதையும் உறுதிப்படுத்தவில்லை. இதனால், இந்தச் செய்தி இப்போது வரை வதந்தியாகவே உள்ளது. எப்படியிருந்தாலும், இந்த புதிய தோற்றத்தில் வார்னரைப் பார்க்க ரசிகர்கள் ஆர்வமாக உள்ளனர், மேலும் அவர் எதற்காக ஷூட்டிங் செய்தார் என்பதைப் பார்க்க காத்திருக்கிறார்கள்.
சுகுமார் இயக்கத்தில், தயாராகி வரும் புஷ்பா 2 படத்தில் ராஷ்மிகா மந்தனா மற்றும் ஃபஹத் பாசில் உள்ளிட்ட பலர் முக்கிய கதாபாத்திரங்களில் நடித்துள்ளனர். டிசம்பர் 6-ம் தேதி உலகம் முழுவதும் வெளியாக உள்ளது.