உயிரைக் காக்க உயிரைப் பணயம் வைத்த நர்ஸ்... நெட்டிசன்கள் பாராட்டு மழை!

ஹிமாச்சல பிரதேசத்தின் மண்டி மாவட்டத்தில், செவிலியரின் அசாத்திய துணிச்சல் சமூகவலைதளங்களில் வைரலாகி, பலரின் நெஞ்சங்களை தொட்டுள்ளது.கனமழையால் பெருக்கெடுத்து ஓடும் ஆபத்தான ஓடையை கடந்து, 2 மாத குழந்தைக்கு உயிர்காக்கும் சிகிச்சையளிக்க விரைந்த அவரது செயல், கடமையுணர்ச்சிக்கு புதிய வரையறையை எழுதியுள்ளது.

Meet Staff Nurse Kamla, who risked her life to ensure a two-month-old baby received a crucial injection. With the bridge in her area swept away, she crossed the river to reach the child. She is From Paddhar's Chauharghati, Mandi. @CMOFFICEHP@mansukhmandviya@nhmhimachalp@WHOpic.twitter.com/o9JFmIHskx

— Vinod Katwal (@Katwal_Vinod) August 23, 2025

சௌஹர்காட்டி பகுதியில் உள்ள சுதர் பஞ்சாயத்து, தொடர் கனமழையால் முற்றிலும் துண்டிக்கப்பட்டுவிட்டன. சாலைகள், பாலங்கள் அனைத்தும் அடித்துச் செல்லப்பட்டு, மக்கள் வெளியுலகத் தொடர்பு இன்றி தவித்து வருகின்றனர். இந்த இக்கட்டான சூழ்நிலையில், திக்கர் கிராமத்தைச் சேர்ந்த செவிலியர் கமலா, தினமும் சுமார் 4 கி.மீ. தூரம் ஆபத்தான ஓடையைக் கடந்துதான் தனது மருத்துவ மையத்திற்குச் செல்ல வேண்டும்.

சமீபத்தில், அவசர அழைப்பு வந்தது. 2 மாதக் குழந்தைக்கு அவசர ஊசி தேவைப்பட்டது. ஒரு நொடிகூட யோசிக்காமல், தனது மருத்துவப் பெட்டியைப் பாதுகாப்பாகப் பிடித்துக்கொண்டு, வேகமாக ஓடும் நீரின் நடுவில் உள்ள வழுக்கும் பாறைகள் மீது துணிச்சலாகத் தாண்டிச் சென்றார் கமலா. இந்தச் செயல் சமூக வலைதளங்களில் பரவி, மக்கள் மத்தியில் பெரும் வரவேற்பைப் பெற்றது. பலரும் அவரது அர்ப்பணிப்பையும், தைரியத்தையும் பாராட்டி வருகின்றனர்.

கமலா, "இந்த ஆபத்து எனக்குப் புதிதல்ல. கடந்த பல வாரங்களாகவே நான் இப்படித்தான் சென்று வருகிறேன். நான் செல்லவில்லை என்றால், நோயாளிகள் சரியான நேரத்தில் சிகிச்சை பெற மாட்டார்கள்" என்று எளிமையாகக் கூறுகிறார். அவரது இந்த தியாகம், சமூக வலைதளங்களில் பாராட்டைப் பெற்ற அதே நேரத்தில், "உயிரைக் காப்பாற்ற மற்றொரு உயிர் ஏன் இப்படி ஆபத்தை எதிர்கொள்ள வேண்டும்?" என்ற கேள்வியை எழுப்பியுள்ளது. அடிப்படை வசதிகள் இல்லாத கிராமங்களில் இதுபோன்ற நிலைமைகள் ஏன் தொடர்கின்றன என்பதைப் பற்றிய விவாதத்தையும் இது தூண்டியுள்ளது. கமலா ஒரு செவிலியர் மட்டுமல்ல, இந்த இடர்பாடுகளுக்கு மத்தியில் கடமையின் மகத்துவத்தை உணர்த்திய ஒரு நம்பிக்கை நட்சத்திரம்.