வேலை - வாழ்க்கை சமநிலை இல்லாத உழைப்பே வெற்றிக்கு வழி; கோடீஸ்வரராக இந்திய வம்சாவளி சி.இ.ஓ கூறும் ரகசியம்!

இன்றைய இளம் தலைமுறையினர் குறைவான வேலை நேரம், நெகிழ்வான அட்டவணை மற்றும் வேலை - வாழ்க்கை இரண்டிற்கும் இடையேயான தெளிவான எல்லைகள் எனப் பலவற்றைக் கோரும் நிலையில், ட்விலியோ (Twilio) நிறுவனத்தின் தலைமைச் செயல் அதிகாரி (சி.இ.ஓ) கோசெமா ஷிப்சந்திலர் இதற்கு முற்றிலும் மாறுபட்ட கருத்தைக் கொண்டுள்ளார். 

ஆங்கிலத்தில் படிக்க:

மும்பையிலிருந்து அமெரிக்காவிற்குப் புலம்பெயர்ந்த குடும்பத்தைச் சேர்ந்தவரான இவர், செல்வம் மற்றும் தலைமைப் பொறுப்பை அடைவதற்குத் தியாகமும், இடைவிடாத ஒழுக்கமும் மட்டுமே வழிவகுக்கும் என்று நம்புகிறார்.

“நீங்கள் கோடீஸ்வரர் நிலையை அடைய விரும்பினால், வேலை-வாழ்க்கை சமநிலையைத் தியாகம் செய்ய வேண்டியிருக்கும்,” என்று ஷிப்சந்திலர் ஃபார்ச்சூன் பத்திரிக்கைக்கு அளித்த பேட்டியில் தெரிவித்தார். தற்போது, 16 பில்லியன் டாலர் மதிப்புள்ள நிறுவனத்தை வழிநடத்தி வரும் இவர், தனது வளர்ச்சிக்கு ஓய்வில்லா உழைப்புப் பழக்கங்களே காரணம் என்கிறார்.

கடினமான அன்றாடப் பழக்கவழக்கங்கள்
ஷிப்சந்திலர் தனது 31 வயதிலேயே ஒரு நிதி அதிகாரியாக (CFO) ஆனார். அவரின் அன்றாடப் பழக்கவழக்கங்கள் சூரிய உதயத்திற்கு முன்பே தொடங்குகின்றன:

அதிகாலை 4.30 மணிக்கே எழுந்து, உடனடியாக மின்னஞ்சல்களைச் சரிபார்க்கிறார்.

காலை 7.30 மணிக்கே, தனது 5,500 ஊழியர்களில் பெரும்பாலானவர்கள் வேலைக்கு வருவதற்கு முன்பே, அவர் பணியிடத்தில் இருப்பார்.

மாலை நேரங்களும் திட்டமிடப்பட்டே உள்ளன. மாலை 6.30 மணிக்கு இரவு உணவு, அதைத் தொடர்ந்து வீட்டில் மற்றொரு சிறு நேர வேலை அமர்வு என இவரின் அன்றாடப் பழக்கங்கள் அமைந்துள்ளன.

‘பழக்கவழக்கங்கள் மிகவும் முக்கியம்’
தனது மகனின் டென்னிஸ் போட்டிகளை வணிக வேலைக்காகத் தான் தவறவிட்டதாக அவர் ஒப்புக்கொண்டார். தனக்குச் சில பொழுதுபோக்குகள் இருந்தாலும், அவை ஒருபோதும் தன்னுடைய தொழில்முறைப் பணிகளுக்கு இடையூறாக இருந்ததில்லை என்றும் அவர் கூறினார். “பழக்கவழக்கங்கள் மிகவும் முக்கியம்,” என்று கூறிய அவர், தனது சந்திப்புகளை 10 நிமிடங்களுக்குள்ளாக முடித்துக்கொள்வதாகவும், நிறுவனத்திற்குப் பயன்தராத எந்த ஒரு செயலையும் தவிர்ப்பதாகவும் குறிப்பிட்டார். மேலும், தேவையற்ற கவனச் சிதறலைத் தவிர்க்க, சமூக ஊடகங்களில் இருந்து விலகி இருப்பதாகவும் கூறினார்.

தனது பெற்றோரின் கடின உழைப்பைத் தன்னுடைய உந்துதலுக்குக் காரணம் என்கிறார் ஷிப்சந்திலர். “என் பெற்றோர் வெற்றிகரமான புலம்பெயர்ந்தோரின் கதைக்குச் சிறந்த எடுத்துக்காட்டு,” என்று அவர் கூறினார். "நீண்ட வேலை நேரம், தீவிரமான முயற்சி மற்றும் தியாகம் ஆகியவையே ஒருவரை உயர்ந்த நிலைக்குக் கொண்டு செல்லும்," என்பதில் அவர் உறுதியாக உள்ளார்.