இந்தி திணிப்புக்கு எதிராக பேசும் கீர்த்தி சுரேஷின் ‘ரகு தாத்தா’ ட்ரெய்லர்: ‘இந்தி தெரியாது போயா’

பிளாக்பஸ்டர் வெற்றிப் படங்களான ‘கேஜிஎஃப்’, ‘காந்தாரா’ உள்ளிட்ட படங்களை தயாரித்த ஹோம்பாலே ஃபிலிம்ஸ் நிறுவனம் முதன்முறையாக நேரடியாக தமிழில் ‘ரகு தாத்தா’ என்ற படத்தை தயாரித்துள்ளது. இந்த படத்துக்கு ‘தி ஃபேமிலி மேன்’ வெப் சீரிஸுக்கு கதை எழுதிய சுமன் குமார் எழுதி இயக்கியுள்ளார்.

‘ரகு தாத்தா’ படத்தில் நடிகை கீர்த்தி சுரேஷ் முதன்மைக் கதாபாத்திரத்தில் நடித்துள்ளார். இவருடன் எம்.எஸ். பாஸ்கர், தேவதர்ஷினி, ரவீந்திர விஜய், ஆனந்த்சாமி, ராஜேஷ் பாலகிருஷ்ணன் உள்ளிட்ட பலர் நடித்துள்ளனர். இந்தப் படத்தில் ஒய் யாமினி ஒளிப்பதிவு செய்துள்ளார், ஷான் ரோல்டன் இசையமைத்திருக்கிறார். 

இந்நிலையில், படக்குழுவினர் கீர்த்தி சுரேஷின் ‘ரகு தாத்தா’ படத்தின் ட்ரெய்லரை வெளியிட்டுள்ளது.

இந்த படத்தின் ட்ரெய்லரில் இடம்பெற்றுள்ள வசனங்கள், காட்சிகள், தமிழகத்தில் அவ்வப்போது கொந்தளிப்பை ஏற்படுத்தும் இந்தி திணிப்பு விவகாரத்தை மையமாக கொண்டு உருக்கப்பட்டுள்ளது என்பது தெரிகிறது. 

ட்ரெய்லரில் பள்ளியில் என்.சி.சி மாணவர்களிடம் இந்தியில் சொல்லப்படும் வார்த்தையை புரிந்துகொண்டு பலரும் அதன்படி செயல்பட, கீர்த்தி சுரேஷ் மட்டும் ‘தமிழ்ல சொல்லுங்க சார்’ என உறுதியாக நிற்கிறார். அடுத்தடுத்த காட்சிகளில் இந்தி திணிப்பு வலுவாக எதிர்க்கப்படுகிறது.

‘இந்தியை திணிக்காதே’ முழக்கமும், ‘இந்தி எக்ஸாம் எழுதுனாதான் எனக்கு புரமொஷன் கிடைக்குமா? அப்டினா எனக்கு புரமோஷனே வேணாம், ‘இதையெல்லாம் மீறி இந்தியை திணித்தே தீருவோம் என்றால் இந்தி தெரியாது போயா’ என்று கீர்த்தி சுரேஷ் பேசும் வசனங்களும் இந்தி திணிப்பு எதிர்ப்பு போராட்ட அரசியலை இந்த படம் அழுத்தமாக பதிவு செய்ய உள்ளது என்று தெரிகிறது. ட்ரெய்லரிலேயே பெரும் சலசலப்பை ஏற்படுத்தி கவனத்தை ஈர்த்துள்ள கீர்த்தி சுரேஷின் ‘ரகு தாத்தா’ வெளியீட்டு தேதி இன்னும் அறிவிக்கப்படவில்லை.

‘இந்தி தெரியாது போயா’ என்று இந்தி திணிப்புக்கு எதிராக பேசும் கீர்த்தி சுரேஷின் ‘ரகு தாத்தா’ ட்ரெய்லரைப் பாருங்கள்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“