பூனையை தூக்கிச் சென்ற சிறுத்தை; விடாமல் துரத்திய நாய் - கோவையில் பரபரப்பு!

கோவை மாவட்டம் தொண்டாமுத்தூர் மற்றும் அதன் சுற்றுவட்டாரப் பகுதிகளில் வனவிலங்குகளின் நடமாட்டம் நாளுக்கு நாள் அதிகரித்து வருகிறது. இதனால் விவசாயிகளும், பொதுமக்களும் மிகுந்த அச்சத்தில்உள்ளனர். சமீப நாட்களாக, காட்டு யானைகள் தொடர்ந்து இப்பகுதியில் முகாமிட்டு, பயிர்களையும், உயிர்களையும் சேதப்படுத்தி வருகின்றன. மேலும், மதுக்கரை மற்றும் தொண்டாமுத்தூர் பகுதிகளில் சிறுத்தைகள் கால்நடைகளை வேட்டையாடிச் செல்வது வழக்கமாகிவிட்டது. வனத்துறையினர் இவற்றை பிடிக்க ஆங்காங்கே கூண்டுகள் வைத்து கண்காணித்து வருகின்றனர். ஆனாலும், இதுவரை எந்த சிறுத்தையும் கூண்டில் சிக்கவில்லை.

இந்தச் சூழ்நிலையில், கடந்த சில தினங்களுக்கு முன் பரபரப்பான சம்பவம் அரங்கேறியது. கோவை தொண்டாமுத்தூர் - தாளியூர் சாலையில் உள்ள உலியம்பாளையம் பகுதியில், சாலையோரத்தில் பூனைக் குட்டிகள் இருந்தன. அப்பகுதியில் உலாவந்த சிறுத்தை, அந்தப் பூனைகளைக் பிடிக்க முயன்றது. அப்போது, ஒரு பூனை தப்பித்து ஓட, மற்றொரு பூனையைச் சிறுத்தை கவ்விக்கொண்டு சென்றது.

பூனையை கவ்விச் சென்ற சிறுத்தை - துரத்திய நாயின் வைரல் வீடியோ! கோவையில் பரபரப்பு!#Coimbatore pic.twitter.com/WAdS0cUSbu

— Indian Express Tamil (@IeTamil) July 20, 2025

சிறுத்தை பூனையைக் கவ்விச் சென்ற சத்தம் கேட்டு, அருகில் இருந்த நாய் குரைத்துக்கொண்டே சிறுத்தையின் பின்னால் துரத்திச் சென்றது. இந்த அதிர்ச்சியூட்டும் காட்சிகள் அப்பகுதியில் பொருத்தப்பட்டிருந்த கண்காணிப்பு கேமராவில் தெளிவாகப் பதிவாகியுள்ளன. தற்போது இந்த வீடியோ சமூக வலைதளங்களில் வெளியாகி வைரலாகப் பரவி வருகிறது. இதைப் பார்த்த பொதுமக்கள் மிகுந்த அதிர்ச்சி அடைந்துள்ளனர்.

இந்தச் சம்பவம் குறித்து, வனத்துறையினர் சிறுத்தையைப் பிடிக்க கூண்டுகள் வைத்து தொடர்ந்து கண்காணித்து வருவதாகத் தெரிவித்து உள்ளனர். இந்தப் பகுதியிலுள்ள பொதுமக்கள் கவனமாக இருக்க வேண்டும் என்றும் அறிவுறுத்தப்பட்டுள்ளது.