இந்த பூமியில் எல்லா உயிரினங்களும் பரிணாம வளர்ச்சியில் தோன்றியது. மனித இனம் பரிணாமம் அடைந்ததைப் போல மற்ற விலங்குகளும் சிறிய அளவில் பரிணாமம் அடைந்திருக்கக் கூடும். பரிணாமம் என்பது நாம் கற்பனை செய்து பார்க்க முடியாத அளவுக்கு மிகவும் மெதுவாக பல ஆயிரக் கணக்கான ஆண்டுகளாக நடந்திருக்க வேண்டும். பல உயிரினங்கள் இந்த பூமியில் இருந்து அழிந்து போயிருக்கலாம். பல உயிரினங்கள் புதியதாகத் தோன்றியிருக்கலாம். இப்போதும்கூட அறிவியலாளர்கள் இதுவரை கண்டுபிடிக்காத புதிய உயிரினங்களைக் கண்டுபிடித்துக்கொண்டிருக்கிறார்கள்.
அந்த வகையில், நாம் அனைவரும் அறிந்த புலி பரபணு காரணமாக அதன் நிறம் மாறி அதன் கருப்பு வரிகள் அதிக அளவில் இருக்கும்படி பிறப்பது உண்டு. அப்படியான புலிகளை மெலனிஸ்டிக் புலி என்கிறார்கள். அப்படி இந்தியாவில் சிம்லிபால் புலிகள் சரணாலயக் காட்டில் மெலனிஸ்டிக் புலி ஒன்று புல்வெளியில் உலவும் வீடியோ சமூக வலைதளங்களில் வைரலாகி வருகிறது.
புலி தெரியும், அதென்ன மெலனிஸ்டிக் புலி என்று கேட்கிறீர்களா? மெலனிசம் என்பது ஒரு மரபணு நிலை, இது மெலனின் உற்பத்தியை அதிகரிக்கிறது, இது கருப்பு அல்லது கிட்டத்தட்ட கருப்பு தோல், கருப்பு முடி அல்லது விலங்குகளின் கருப்பு முடிக்கு வழிவகுக்கிறது.
அனைத்திந்திய புலிகள் மதிப்பீடு, 2022-ன் படி, சிமிலிபால் புலிகள் காப்பகத்தில் 16 புலிகள் உள்ளன, அவற்றில் 10 மெலனிஸ்டிக் பண்புகளை வெளிப்படுத்துகின்றன என்று கூறுகின்றனர்.
புல்வெளியில் மெலனிஸ்டிக் புலி நடந்து செல்லும் வீடியோவை ஐ.எஃப்.எஸ் அதிகாரி சுசந்தா நந்தா தனது எக்ஸ் சமூக வலைதளப் பக்கத்தில் பகிர்ந்துள்ளார். இந்த வீடியோவில் ஒரு மெலனிஸ்டிக் புலி புல்வெளியில் நடந்து செல்கிறது. அந்த புலியின் உடலில் ரோமங்கள் அடர்த்தியான கருப்பு வரிகளாக அமைந்துள்ளன. முதலில் இது புலிதானா என்ற சந்தேகம் வருகிறது. நன்றாக பார்த்த பிறகுதான் புலி என்பதை உறுதி செய்கிறோம். அந்த அளவுக்கு மெலனிஸ்டிக் புலியின் தோல் அடர்த்தியான கருப்புவரிகளால் நிறைந்துள்ளது.
இந்த வீடியோ குறித்து ஐ.எஃப்.எஸ் அதிகாரி சுசந்தா நந்தா குறிப்பிடுகையில், “சிம்லிபால் புலி, மெலனிஸ்டிக் புலியின் முதல் வீடியோவை டி.எஸ்.எல்.ஆர் கேமராவில் பின்னணியில் இயற்கையான இசையுடன் எடுக்கப்பட்டதை இங்கே பார்க்கிறீர்கள்” என்று குறிப்பிட்டுள்ளார்.
புல்வெளியில் மெலனிஸ்டிக் புலி நடந்து செல்லும் வீடியோவைப் பார்த்த நெட்டிசன்கள் தங்களுடைய கருத்துகளைத் தெரிவித்து வருகின்றனர். அதில் ஒரு எக்ஸ் பயனர், “அற்புதமான படைப்பு” என்று குறிப்பிட்டுள்ளார்.
“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“
/indian-express-tamil/media/agency_attachments/33Ho9XHwZawzDekwDLnu.png)
Follow Us/indian-express-tamil/media/media_files/zCx71oTbknaEz7yj6Jxv.jpg)