‘வாழ்க்கை தொடங்கியது…’: ஒடிசாவில் ஆலிவ் ரிட்லி ஆமை குஞ்சுகள் கடலுக்குள் ஊர்ந்து செல்லும் அழகான காட்சி!

ஒடிசாவின் கஞ்சம் மாவட்டத்தில் உள்ள ருஷிகுல்யா ஆற்று முகத்துவாரத்தில் ஆலிவ் ரிட்லி ஆமைகளின் கூடுகட்டும் பருவம் தொடங்கியுள்ளது. ஆயிரக்கணக்கான ஆமைக் குஞ்சுகள் தங்கள் மணல் கூடுகளிலிருந்து வெளிவந்து பரந்த கடலை நோக்கிப் பயணிக்கின்றன. இந்திய வனத்துறை அதிகாரி பர்வீன் கஸ்வான், புதிதாகப் பொரித்த ஆலிவ் ரிட்லி ஆமைகள் தங்கள் முட்டைகளில் இருந்து வெளிவரும் ஒரு திகைக்க வைக்கும் வீடியோவைப் பகிர்ந்துள்ளார்.

ஆக்கிலத்தில் படிக்க:

தற்போது வைரலாகி வரும் இந்த வீடியோவில், ஆமைகள் கடலை நோக்கிச் செல்லும் போது அலைகளால் அடித்துச் செல்லப்படுவதையும் காட்டுகிறது. “வாழ்க்கை தொடங்கியது, பயணமும் தொடங்கியது!! ருஷிகுல்யாவில் புதிதாகப் பொரித்த ஆலிவ் ரிட்லி ஆமைகள் கடலை நோக்கிய பயணத்தைத் தொடங்கியுள்ளன. அவை மீண்டும் கூட்டமாக முட்டையிடுவதற்காக, அவை பொரித்த அதே இடத்திற்குத் திரும்ப வரும். வாழ்க்கைச் சக்கரம் தொடர்ந்து கொண்டே இருக்கிறது,” என்று கஸ்வான் எக்ஸ் தளத்தில் பதிவிட்டுள்ளார்.

அந்த வீடியோவை இங்கே காணலாம்:

The life began and so as the journey !!

These newly hatched Olive Ridley Turtle in Ruskilulya have started taking the journey over ocean. They will come back again for mass nesting, the same place where there were hatched. The cycle of life keeps continuing. VC - DFO Behrampur. pic.twitter.com/Cl1CpyE9TX

— Parveen Kaswan, IFS (@ParveenKaswan) April 12, 2025

பி.டி.ஐ செய்தி நிறுவனம் வெளியிட்டுள்ள செய்திப்படி, இந்த ரூகெரியில் (rookery) கூட்டமாக குஞ்சு பொரிக்கும் நிகழ்வு வியாழக்கிழமை தொடங்கியது. “கூட்டமாக குஞ்சு பொரிக்கும் நிகழ்வு சரியான நேரத்தில் தொடங்கியுள்ளது, இது அடுத்த நான்கு முதல் ஐந்து நாட்களுக்குத் தொடர வாய்ப்புள்ளது. ஆமைக் குஞ்சுகளின் பாதுகாப்பை உறுதி செய்ய நாங்கள் எங்களால் முடிந்தவரை முயற்சித்து வருகிறோம்” என்று உதவி வனப் பாதுகாவலர் (ACF) மற்றும் கல்லிகோட்டை வனச்சரகப் பொறுப்பாளர் திவ்ய சங்கர் பெஹெரா கூறினார்.

“வன நாய்கள், நரிகள் மற்றும் கழுதைப்புலிகள் போன்ற வேட்டை விலங்குகள் நுழைவதைத் தடுக்க நாங்கள் முழுப் பகுதிக்கும் வேலி அமைத்துள்ளோம்” என்றும் ஏ.சி.எஃப் தெரிவித்ததாக பி.டி.ஐ செய்தி வெளியிட்டுள்ளது.

ஒடிசாவின் கஞ்சம் மாவட்டத்தில் உள்ள ருஷிகுல்யா ஆற்று முகத்துவாரத்தில் ஆலிவ் ரிட்லி ஆமைகள் ஆண்டுதோறும் கூட்டமாக முட்டையிடுவதற்காக பிப்ரவரி மாதத்தில் அதிக எண்ணிக்கையில் வந்தன. ஒடிசா வனத்துறையின் தகவல்களின்படி, ருஷிகுல்யா மற்றும் தேவி ஆற்று முகத்துவாரங்களில் சுமார் ஆறு லட்சம் முட்டைகளை கடல் ஆமைகள் இட்டுள்ளன.

தேசிய வனவிலங்கு கூட்டமைப்பு (NWF) தகவலின்படி, ஆலிவ் ரிட்லி ஆமைகள் பசிபிக், அட்லாண்டிக் மற்றும் இந்தியப் பெருங்கடல்களின் வெப்பமண்டல நீரில் காணப்படுகின்றன. பசிபிக் பெருங்கடலில், அவை பொதுவாக மெக்சிகோவிலிருந்து கொலம்பியா வரை நீண்டுள்ள கடற்கரைகளில் காணப்படுகின்றன, அதே நேரத்தில் இந்தியப் பெருங்கடலில், அவை இந்தியாவின் கிழக்கு கடற்கரைகள் மற்றும் இலங்கையில் மிகவும் அதிகமாக உள்ளன.