சிவாஜி பிறந்தாள் விழா: மேடையில் முன்னால் வர முயன்ற நபரை ஓங்கி குத்திய சிவாஜி மகன் ராம்குமார்!

நடிகர் திலகம் சிவாஜி கணேசனின் பிறந்தநாள் விழாவில், மேடையில், நடிகர் பிரபு மேடையில் பேசிக்கொண்டிருந்த போது, ஒருவர் பின்னால் இருந்து முன்னால் வர முயன்றதால் கோபடமைநெத சிவாஜியின் மூத்த மகன் ராம்குமார்  அந்த நபரை கைமுட்டியால் குத்திய சம்பவத்தின் வீடியோ வைரலாகி வருகிறது.

தமிழ் சினிமாவை பொறுத்தவரை, நடிப்புக்கு இலக்கணம் என்றால் சிவாஜி கணேசன்தான், வீரபாண்டிய கட்டபொம்மன், கப்பலோட்டியத் தமிழன் போன்ற வரலாற்றுப் பாத்திரங்களுக்கு உயிர்கொடுத்தவர். 2000-கள் வரை, சினிமாவில் நடிக்க விரும்பியவர்கள் முதலில் மனப்பாடம் செய்த வசனம் சிவாஜி நடித்த பராசக்தி படம்தான். இன்று வரைக்கும்கூட சிவாஜி கணேசன் பேசிய அந்த வசனம் பேசப்படுகிறது. தான் நடிக்கும் கதாபாத்திரங்களுக்கு இறவாப் புகழ் அளித்தவர். அந்த வகையில், தமிழ் சினிமாவில் எத்தனை நடிகர்கள் வந்தாலும், நடிகர் திலகம்தான் நடிப்புக்கு இலக்கணம். 

செவாலியர் விருது, இந்திய சினிமாவில் உயரிய விருதான தாதா சாகேப் பால்கே விருது உள்ளிட்ட விருதுகளைப் பெற்ற சிவாஜி கணேசன் தமிழ் சினிமாவின் சூரியன் என்றால் அது மிகையல்ல. நடிகர் திலகம் சிவாஜி கணேசன் 1928-ம் தேதி அக்டோபர் 1ம் தேதி பிறந்தார். ஆண்டுதோறும் அவருடைய பிறந்தநாள் அக்டோபர் 1-ம் தேதி கொண்டாடப்படுகிறது.

அந்த வகையில், நடிகர் திலகம் சிவாஜி கணேசனின் 97வது பிறந்த நாள் விழா செவ்வாய்க்கிழமை (அக்டோபர் 1) கொண்டாடப்பட்டது. சிவாஜி கணேசனின் பிறந்தநாளையொட்டி, முதலமைச்சர் மு.க. ஸ்டாலின் சென்னை அடையாறில் உள்ள சிவாஜி கணேசன் மணிமண்டபத்தில் உள்ள சிலைக்கு மலர் தூவி மரியாதை செலுத்தினார். இதையடுத்து, புகைப்பட கண்காட்சியை திறந்து வைத்தும் முதல்வர் மு.க.ஸ்டாலின் பார்வையிட்டார்.

நடிகர் திலகம் சிவாஜி கணேசன் பிறந்த நாளில் அவரது சிலைக்கு பல்வேறு அரசியல் கட்சி தலைவர்கள், நடிகர்கள், நடிகைகள் மலர் தூவி மரியாதை செலுத்தினர். நடிகர் திலகம் சிவாஜி கணேசனின் பிறந்த நாள் விழாவில் அவருடைய மகன்கள் பிரபு மற்றும் ராம்குமார் மற்றும் ஏராளமான ரசிகர்கள் பங்கேற்றனர்.

சிவாஜி கணேசன் பிறந்தநாள் விழா நிகழ்ச்சியில், சிவாஜியின் மகனும் நடிகருமான பிரபு மேடையில் பேசிக்கொண்டிருந்தார். அப்போது அவர் அருகே சிவாஜியின் மூத்த மகன் ராம்குமாரும் இருந்தார். அப்போது சிலர் மேடையில் ஏற முயன்றனர். மேடையில் பின்னால் இருந்து ஒருவர் முன்னால் வர முயன்றட்போது, கோபம் அடைந்த சிவாஜி கணேசனின் மூத்த மகன் ராம்குமார், தனது கை முட்டியால் அவரை ஓங்கி குத்தி, தள்ளிவிட்டு கோபத்தை வெளிப்படுத்தினார். 

நடிகர் திலகம் சிவாஜி கணேசனின் பிறந்தநாள் விழா மேடையில், பின்னால் இருந்து ஒருவர் முன்னால் வர முயன்றபோது கோபம் அடைந்த சிவாஜியின் மகன் ராம்குமார் அந்த நபரை கை முட்டியால் குத்தி தள்ளிய வீடியோ சமூக வலைதளங்களில் வைரலாகி வருகிறது.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“