திருச்சியிலிருந்து சீனாவுக்கு பேருந்து இயக்கமா? வைரல் வீடியோ

திருச்சி சத்திரம் பேருந்து நிலையத்தில் லால்குடிக்கு செல்ல இருந்த நகர பேருந்தின் ஊர் பெயர்கள் குறிப்பிடப்படும் டிஜிட்டல் பெயர் பலகைகளில் சீன மொழி எழுத்துகள் ஒளிர்ந்ததால் பயணிகள் திகைத்துப் போனார்கள். இந்த வீடியோ சமூகவலைதளங்களில் வைரலான நிலையில், திருச்சியிலிருந்து சீனாவுக்கு பேருந்து இயக்கப்படுகிறதா என்று நெட்டிசன்கள் நகைச்சுவையாகக் கேட்டு வருகின்றனர்.

திருச்சி சத்திரம் பேருந்து நிலையத்தில் லால்குடிக்கு செல்ல இருந்த நகர பேருந்து நின்று கொண்டிருந்தது. இந்த நகரப்பேருந்தில் டிஜிட்டல் பெயர் பலகைகள் வைக்கப்பட்டுள்ளது. இதில் செல்லும் ஊர்கள் மற்றும் வழித்தடங்கள் சிறு திரை மூலம் முன்புறம் பின்புறம் எழுத்துக்கள் ஓடும்.

திருச்சி சத்திரம் பேருந்து நிலையத்தில் நகர பேருந்தின் டிஜிட்டல் பெயர் பலகைகளில் ஒளிர்ந்த சீன மொழி எழுத்துகள்: வீடியோ#viralvideopic.twitter.com/NNrXGmYsom

— Indian Express Tamil (@IeTamil) October 9, 2025

இந்நிலையில் சத்திரம் பேருந்து நிலையத்தில் நிறுத்தி வைக்கப்பட்டிருந்த அரசு நகரப் பேருந்து லால்குடி செல்ல இருந்த நிலையில், திடீரென பின்பக்க பெயர் பலகையில் சீன மொழியில் எழுத்துக்கள் ஓடியதால் பொதுமக்கள் குழப்பம் அடைந்தனர். டிஜிட்டல் போர்டுகளில் ஏராளமான தமிழ், ஆங்கிலம் என அந்தந்த மாநில மொழிகளில் பெயர்பலகைகளில் ஊர் பெயர்கள் ஓடுவதை பார்த்திருக்கிறோம்.
  
ஆனால், திருச்சி சத்திரம் பேருந்து நிலையத்தில் இருந்து லால்குடிக்கு புறப்பட தயாரான மாநகரப்பேருந்தில் தமிழ் மொழிக்கு பதிலாக சீன மொழி திரையில் ஓடியதால் பயணிகள் பார்த்து சிலர் சிரித்தும், சிலர் வியந்தும், ஓட்டுநர், நடத்துனரை அழைத்துக் காண்பித்தனர். அவர்களோ விழிபிதுங்கி செய்வதறியாது திகைத்து நின்றனர். பின்னர் அந்தப் பெயர் பலகையின் டிஜிட்டல் போர்ட்டை ஆப் செய்து நிம்மதி பெருமூச்சு விட்டனர். இருந்தாலும் இந்த சம்பவம் பெரும் அளவில் சமூக ஊடகங்களில் பகிரப்பட்டு  வைரலாகி வருகின்றது.

செய்தி: க.சண்முகவடிவேல்.