சுகர் அளவை கண்ட்ரோலில் இந்தக் கீரை... ஒரு கைப்பிடி கிடைச்சா போதும்; டேஸ்ட் சட்னி ரெடி!

முருங்கைக்கீரை, அதன் எண்ணற்ற ஊட்டச்சத்துக்களுக்காக 'சூப்பர் ஃபுட்' என்று உலகளவில் போற்றப்படும் ஒரு அற்புதக் கீரையாகும். இரும்புச்சத்து, வைட்டமின்கள், தாதுக்கள் மற்றும் ஆன்டிஆக்ஸிடன்ட்கள் நிறைந்த இந்தக் கீரையை நமது அன்றாட உணவில் சேர்த்துக் கொள்வது ஆரோக்கியத்திற்கு மிகவும் நல்லது.

வழக்கமாகப் பொரியல், கூட்டு என்று செய்து வரும் முருங்கைக்கீரையை, ஒரு வித்தியாசமான மற்றும் சுவையான சட்னியாக எப்படித் தயாரிப்பது என்று ஸ்பூன் ஆஃப் ஃபேஷன் இன்ஸ்டா பக்கத்தில் கூறியிருப்பது பற்றி பார்ப்போம். இந்த முருங்கைக்கீரை சட்னி, சூடான இட்லி, தோசை, அல்லது சாதத்துடன் சேர்த்து சாப்பிட அருமையாக இருக்கும்.

தேவையான பொருட்கள்: 

எண்ணெய் – 1 தேக்கரண்டி
வேர்க்கடலை – 2 மேசைக்கரண்டி
உளுத்தம் பருப்பு – 1 மேசைக்கரண்டி
சீரகம் – 1 தேக்கரண்டி
வெள்ளை எள் – 1 தேக்கரண்டி
தக்காளி – 1  
பூண்டு பற்கள் – 2
புளி  
பச்சை மிளகாய் – 2  
முருங்கைக்கீரை – 1 கைப்பிடி 
துருவிய தேங்காய் – 2 மேசைக்கரண்டி
உப்பு  
நல்லெண்ணெய் – 1 தேக்கரண்டி
கடுகு – ½ தேக்கரண்டி
உளுத்தம் பருப்பு – ½ தேக்கரண்டி
காய்ந்த மிளகாய் – 1
கறிவேப்பிலை  
பெருங்காயம்  

செய்முறை:

ஒரு கடாயில் 1 தேக்கரண்டி எண்ணெய் விட்டு சூடாக்கவும். எண்ணெய் சூடானதும், வேர்க்கடலை, உளுத்தம் பருப்பு, சீரகம் மற்றும் வெள்ளெள் ஆகியவற்றைச் சேர்த்து, பொன்னிறமாக மணம் வரும் வரை வறுக்கவும்.
வறுத்த பொருட்களை ஒரு தட்டிற்கு மாற்றி ஆற விடவும். 

அதே கடாயில் (தேவைப்பட்டால் மேலும் சிறிது எண்ணெய் சேர்க்கலாம்), நறுக்கிய தக்காளி, பூண்டு, புளி மற்றும் பச்சை மிளகாய் ஆகியவற்றைச் சேர்த்து ஒரு நிமிடம் வதக்கவும். இப்போது, சுத்தம் செய்து வைத்துள்ள முருங்கைக்கீரையையும், துருவிய தேங்காயையும் சேர்த்து, தேவையான அளவு உப்பையும் சேர்க்கவும்.

முருங்கைக்கீரை சுருங்கி, அதன் பச்சை வாசனை நீங்கும் வரை நன்கு வதக்கவும். (அதிக நேரம் வதக்கத் தேவையில்லை). முதலில், வறுத்து ஆற வைத்த வேர்க்கடலை, உளுத்தம் பருப்பு, சீரகம், மற்றும் எள் கலவையை மிக்ஸி ஜாரில் சேர்த்து, தண்ணீர் சேர்க்காமல் சற்று கொரகொரப்பாக அரைக்கவும்.

பின்னர், வதக்கி ஆற வைத்துள்ள முருங்கைக்கீரை கலவையையும் சேர்த்து, மிகக் குறைவான தண்ணீர் தெளித்து, கொரகொரப்பான பதத்தில் அரைக்கவும். (மாவு போல நைசாக அரைக்காமல், சற்று கரகரப்பாக இருந்தால் சுவையாக இருக்கும்).

ஒரு சிறிய கடாயில் 1 தேக்கரண்டி நல்லெண்ணெய் விட்டு சூடாக்கவும். எண்ணெய் சூடானதும், கடுகு சேர்த்து வெடிக்க விடவும். கடுகு வெடித்ததும், உளுத்தம் பருப்பு, காய்ந்த மிளகாய், கறிவேப்பிலை மற்றும் பெருங்காயம் சேர்த்து தாளிக்கவும். தாளித்த பொருட்களை அரைத்து வைத்துள்ள முருங்கைக்கீரை சட்னியில் சேர்த்து நன்கு கலந்து விடவும். 

அவ்வளவுதான், சுவையான மற்றும் சத்தான முருங்கைக்கீரை சட்னி தயார். இதை சூடான இட்லி, தோசை, சாதம், அல்லது சப்பாத்தியுடன் சேர்த்து பரிமாறலாம். இதன் தனித்துவமான சுவையும், ஆரோக்கியப் பலன்களும் உங்களை நிச்சயம் கவரும்.  

View this post on Instagram

A post shared by Riz Mydheen (@spoon_of_passion)