வெயிட் லாஸ் பண்ணும் மக்களே... ஒருநாளைக்கு இத்தனை முறை 'க்ரீன் டீ' குடிக்கலாம்: சொல்லும் உணவியல் நிபுணர் தாரிணி!

க்ரீன் டீ அதன் ஏராளமான ஆரோக்கிய நன்மைகளுக்காக உலகளவில் பிரபலமாகி வருகிறது. நிபுணர் தாரிணி அதன் மகத்துவமும், அதை சரியான முறையில் எப்படி அருந்துவது என்பது பற்றியும் விரிவாக கூறுகிறார். உங்கள் அன்றாட வாழ்க்கையில் பச்சை தேநீரைச் சேர்ப்பதன் மூலம் நீங்கள் பெறும் பலன்களை பற்றியும் அவர் கூறுகிறார். 
 
பால் டீயில் 100 மில்லிக்கு சுமார் 30 முதல் 50 கலோரிகள் இருக்கும் நிலையில், க்ரீன் டீயில் கலோரிகள் முற்றிலும் இல்லை என்பது இதன் முக்கிய சிறப்பம்சமாகும். இதனால், உடல் எடையைக் கட்டுக்குள் வைத்திருக்க விரும்புவோருக்கு இது ஒரு சிறந்த மாற்றாக அமைகிறது.

க்ரீன் டீயை அருந்த சிறந்த நேரம், உணவு இடைவேளைகள்தான். அதிகாலையில், காலை 11 மணி அளவில், மற்றும் மாலை 3 முதல் 4 மணி அளவில் என ஒரு நாளைக்கு மூன்று முறை அருந்துவது போதுமானது. இதை உணவுடன் சேர்த்து அருந்துவதைத் தவிர்க்க வேண்டும், ஏனெனில் அது இரும்பு மற்றும் பிற அத்தியாவசிய ஊட்டச்சத்துக்களை உடல் உறிஞ்சுவதைத் தடுக்கலாம்.

க்ரீன் டீயில் அதிக அளவில் ஆன்டிஆக்ஸிடன்ட்கள் நிறைந்துள்ளன, இவை உடல் ஆரோக்கியத்திற்கு மிகவும் அவசியமானவை. க்ரீன் டீ பைகளை இரண்டு முதல் மூன்று நிமிடங்கள் வரை வெந்நீரில் ஊறவைத்து, வெளிர் பச்சை-மஞ்சள் நிறம் வந்தவுடன் அருந்தலாம். கூடுதல் சுவை மற்றும் வைட்டமின் சி சத்திற்காக, நீங்கள் சிறிது எலுமிச்சை சாற்றை சேர்த்துக் கொள்ளலாம்.

பலரும் க்ரீன் டீயை எடை குறைப்பு பானமாகவே பார்க்கின்றனர். இது நேரடியான கொழுப்பு எரிப்புக்கு உதவாவிட்டாலும், பூஜ்ஜிய கலோரி பானமாக இருப்பதால், உங்கள் ஒட்டுமொத்த கலோரி உட்கொள்ளலைக் குறைக்க உதவுகிறது. இருப்பினும், எடை இழப்புக்கு சீரான உடற்பயிற்சி மிகவும் அவசியம். 

பொறுப்பு துறப்பு: இந்தக் கட்டுரை பொது தளத்தில்/ நாங்கள் தொடர்பு கொண்டு பேசிய நிபுணர்களிடம் இருந்து பெறப்பட்ட தகவல் அடிப்படையில் எழுதப்பட்டுள்ளது. இக்கட்டுரையில் குறிப்பிட்டு இருப்பதை நீங்கள் கடைபிடிக்கும் முன், உங்கள் குடும்ப மருத்துவர் அல்லது உங்கள் உடல்நலப் பயிற்சியாளரை அணுகும்படி கேட்டுக் கொள்கிறோம்.