அடிக்கடி யூரின் வருதா? முருங்கைக் கீரையை இப்படி சாப்பிட்டு வாங்க போதும்: டாக்டர் ஜோன்ஸ் செங்கோட்டையன்

அடிக்கடி சிறுநீர் கழிக்கும் பிரச்சனை, குறிப்பாக சர்க்கரை நோய் இல்லாதவர்களிடமும் அதிகரித்து வருகிறது. ஒரு நாளைக்கு 20 முறைக்கு மேல் சிறுநீர் கழிக்கும் நிலை பலரையும் பாதிக்கிறது. இந்தப் பிரச்சனைக்கான பொதுவான காரணங்கள் மற்றும் வீட்டிலேயே செய்யக்கூடிய ஒரு எளிய இயற்கை மருத்துவ முறை குறித்து டாக்டர் ஜோன்ஸ் செங்கோட்டையன்  தனது யூடியூப் பக்கத்தில் கூறியிருப்பது பற்றி பார்ப்போம். 

சாதாரண சிறுநீர் கழிக்கும் அளவு:

பொதுவாக, ஒரு நபர் 24 மணி நேரத்தில் 6 முதல் 8 முறை சிறுநீர் கழிக்கலாம். இது தட்பவெப்பநிலைக்கு ஏற்ப மாறுபடலாம். கோடை காலத்தில் நீர் அருந்துவது அதிகம் என்பதால் சிறுநீர் கழிப்பது சற்று அதிகமாக இருக்கலாம், குளிர் காலத்தில் குறைவாக இருக்கலாம். ஆனால், ஒரு நாளைக்கு 15 முதல் 20 முறைக்கு மேல், அரை மணி நேரத்திற்கு ஒரு முறை, அல்லது இரவில் 5-6 முறை சிறுநீர் கழிப்பது பாலியூரியா எனப்படும் ஒரு நிலையாகும்.

அடிக்கடி சிறுநீர் கழிப்பதற்கான காரணங்கள்:

சர்க்கரை வியாதி: உணவுக்குப் பின் சர்க்கரையின் அளவு 150-ஐ தாண்டினால் பாலியூரியா வர வாய்ப்புள்ளது.

சிறுநீர்ப்பையில் கல்: சிறுநீர்ப்பையில் கல் இருந்தாலும் அடிக்கடி சிறுநீர் கழிக்க நேரிடலாம்.

சிறுநீர் தொற்று (Urinary Infection): சிறுநீர் தொற்று இருந்தால் அடிக்கடி சிறுநீர் கழிக்க வாய்ப்புள்ளது.

சிறுநீர்ப்பை தடிமன் (Bladder Thickness): 50 வயதிற்குப் பிறகு சிறுநீர்ப்பை தடிமனாகலாம், இதனால் சிறிதளவு சிறுநீர் சேர்ந்தாலும் வெளியேறத் தூண்டும்.

அதிவேக சிறுநீர்ப்பை (Hyperactive Bladder): இது ஒரு நரம்பியல் சார்ந்த நிலையாகும், இதிலும் அடிக்கடி சிறுநீர் கழிக்க நேரிடலாம்.

எந்தக் காரணத்தினால் அடிக்கடி சிறுநீர் கழிக்கிறீர்களோ, அந்த நோயை முதலில் கட்டுப்படுத்த வேண்டும். சர்க்கரை வியாதி இருந்தால், அதற்கான மருந்துகளை எடுத்துக்கொள்வது அவசியம்.

நீர் அருந்தும் அளவு: தாகத்திற்கு ஏற்ப மட்டுமே தண்ணீர் குடிக்க வேண்டும். ஒரு நாளைக்கு 5-6 லிட்டர் தண்ணீர் குடிக்க வேண்டும் என்ற தவறான எண்ணத்தைத் தவிர்க்க வேண்டும். நாம் உண்ணும் உணவு, பழங்கள், ஜூஸ், மோர் போன்றவற்றிலும் நீர்ச்சத்து உள்ளது என்பதைக் கருத்தில் கொள்ள வேண்டும். ஒரே நேரத்தில் அதிக தண்ணீர் குடிப்பதைத் தவிர்க்கவும். 

அடிக்கடி சிறுநீர் கழிக்கும் பிரச்சனையைக் குறைக்க, ஒரு அருமையான நீர் கட்டு சிகிச்சை முறையை டாக்டர்  பரிந்துரைக்கிறார். 

செய்முறை: முருங்கைக்கீரையை நன்கு அலசி, சிறிது உப்பு, மஞ்சள் சேர்த்து, குறைந்த அளவு தண்ணீரில் வேகவைத்து வடிகட்டி தனியே வைக்கவும். எண்ணெய் ஆட்டும் செக்குகளில் கிடைக்கும் எள்ளு புண்ணாக்கை வாங்கி, பொடியாக்கி வைத்துக்கொள்ளவும். ஒரு வாணலியில் எள்ளு புண்ணாக்கை லேசாக சூடுபடுத்தவும். அது சற்று எண்ணெயாக மாறும். சூடானதும், வேகவைத்த முருங்கைக்கீரையை அதில் சேர்த்து நன்கு பிரட்டி, முருங்கைக்கீரை பொரியல் அல்லது கறி போல தயாரிக்கவும்.

பயன்பாடு: இதை தினமும் ஒரு வேளை (காலை அல்லது இரவு), ஒரு கைப்பிடி அளவு சமைத்த பிறகு எடுத்துக்கொள்ளலாம்.

நன்மைகள்: இது நியூரோஜெனிக் பிளாடர் அல்லது சர்க்கரை வியாதியால் ஏற்படும் அடிக்கடி சிறுநீர் கழிக்கும் பிரச்சனையைக் கட்டுப்படுத்தும். இது நீர் கட்டு உண்டாக்கி, சிறுநீர்ப்பையின் கட்டுப்பாட்டை மேம்படுத்தும்.

கால அளவு: இதைத் தொடர்ச்சியாக ஒரு மாதம் வரை எடுத்துக்கொள்ளலாம். ஒரு நாளைக்கு 10 முறைக்கும் குறைவாக சிறுநீர் கழிக்கும் நிலை வந்தாலோ, இரவில் சிறுநீர் கழிக்க எழ வேண்டிய அவசியம் இல்லையென்றாலோ இதை நிறுத்திக்கொள்ளலாம். இது ஒரு மருந்து அல்ல, உணவாகவே எடுத்துக்கொள்ளலாம்.

மாலை 4, 5, 6 மணிக்கு மேல் நீர் அருந்துவதைக் குறைத்துக்கொள்ள வேண்டும். இரவில் சிறுநீர் கழித்துவிட்டு வந்தவுடன் மீண்டும் அதிக தண்ணீர் குடிப்பதைத் தவிர்க்கவும். 

பொறுப்பு துறப்பு: இந்தக் கட்டுரை பொது தளத்தில்/ நாங்கள் தொடர்பு கொண்டு பேசிய நிபுணர்களிடம் இருந்து பெறப்பட்ட தகவல் அடிப்படையில் எழுதப்பட்டுள்ளது. இக்கட்டுரையில் குறிப்பிட்டு இருப்பதை நீங்கள் கடைபிடிக்கும் முன், உங்கள் குடும்ப மருத்துவர் அல்லது உங்கள் உடல்நலப் பயிற்சியாளரை அணுகும்படி கேட்டுக் கொள்கிறோம்.