உடம்பை வைரம் பாய்ந்த கட்டையாக மாற்ற... முன்னோர்கள் சொன்ன சூப்பர் டிப்ஸ்: பகிரும் டாக்டர் கே.ஆர். அக்ஷயன்!

வயதானாலும் உடலை வைரம் பாய்ந்த கட்டை போல் வைத்திருக்க வேண்டும் என்று நினைப்பவர்களுக்கு ஒரு டிப்ஸ் டாக்டர் கே.ஆர். அக்ஷயன் ஹெல்த் கஃபே தமிழ் சேனல் மூலம் கூறுகிறார். இன்றைய காலகட்டத்தில் அதிகரித்து வரும் நோய்த்தாக்குதல்களில் இருந்து உடலை எவ்வாறு வைரம் பாய்ந்த கட்டையாக மாற்றலாம் என்பது குறித்து சித்தர்களின் ஒரு ரகசிய காயகல்ப முறையை விளக்குகிறார்.

இன்றைய காலகட்டத்தில், ஒரு குடும்பத்தில் உள்ள அனைவருக்கும் நோய் வரும் நிலை உருவாகியுள்ளது. இது நமது உடல் எவ்வளவு பலவீனமாகிவிட்டது என்பதைக் காட்டுகிறது. சாதாரண குளிர் காற்று, குளிர்ந்த நீர், அதிகப்படியான வெயில் அல்லது வைரஸ் தாக்குதல் எதுவாக இருந்தாலும், உடல் பாதிக்கப்படாமல் இருக்க வேண்டும். 

ஒரு சிலருக்கு மட்டும் சளி பிடிப்பது, காய்ச்சல் வருவது, அல்லது உணவு ஒவ்வாமை ஏற்படுவது போன்றவை, அவர்களின் உடலில் ஏதோ ஒரு சிஸ்டம் பலவீனமாக இருப்பதைக் காட்டுகிறது. நமது முன்னோர்கள் பனை மரத்தில் இருந்து விழுந்தாலும், சிறு நாட்டு வைத்தியம் செய்துக்கொண்டு மீண்டும் பனை மரம் ஏறியிருக்கிறார்கள்.

ஆனால் இன்று, இருசக்கர வாகனத்தில் இருந்து விழுந்தவர்கள் கூட மீண்டும் வாகனம் ஓட்டத் தயங்குகிறார்கள். இது நமது எலும்பு மண்டலம், தசை மண்டலம், நரம்பு மண்டலம், நிணநீர் மண்டலம், இனப்பெருக்க மண்டலம், சுவாச மண்டலம், செரிமான மண்டலம் என உடலின் அனைத்து சிஸ்டங்களும் பலவீனமாகிவிட்டதையே காட்டுகிறது.

உடலை வைரம் பாய்ந்த கட்டையாக மாற்றுவது எப்படி?

முருங்கை மரம் எளிதில் உடையக்கூடியது, ஆனால் கருங்காலி மரம் மிகவும் கடினமானது. அதுபோல, நமது உடலையும் கருங்காலி மரம் போல வைரம் பாய்ந்த கட்டையாக மாற்ற வேண்டும். இதற்கு சித்தர்கள் கூறிய ஒரு எளிய காயகல்ப முறையைப் பின்பற்றலாம்.

தேவையான பொருட்கள்:

ஒரிஜினல் மிளகு - 100 கிராம்
சுத்தமான மலைத்தேன் - 1 லிட்டர்
மிளகு தேர்வு: நல்ல ஒரிஜினல் மிளகு சிறியதாக இருந்தாலும் வீரியம் அதிகம் கொண்டது.
தேன் தேர்வு: தேன் சுத்தமானதா என்பதைச் சரிபார்க்க, ஒரு துளி தேனை ஒரு இடத்தில் விட்டு, ஒரு மணி நேரம் கழித்துப் பார்த்தால் எறும்புகள் மொய்க்கக் கூடாது. அல்லது ஒரு துளி தேனைத் தண்ணீரில் விட்டால், அது கலக்காமல் அடியில் அப்படியே இறங்க வேண்டும்.

செய்முறை:

ஒரு லிட்டர் சுத்தமான மலைத்தேனில் 100 கிராம் மிளகைச் சேர்த்து ஊறவிடவும்.
இந்தக் கலவையை 48 நாட்கள் (ஒரு மண்டலம்) ஊறவிட வேண்டும்.
பயன்பாடு:

48 நாட்கள் முடிந்த பிறகு, தினமும் காலையில் உணவு உண்பதற்கு ஒரு மணி நேரத்திற்கு முன், தேனுடன் ஊறிய நான்கு மிளகுகளை எடுத்து நன்கு மென்று, தேனுடன் சேர்த்துச் சுவைத்துச் சாப்பிடவும். மிளகின் காரம் தேனில் ஊறியதால் குறைந்திருக்கும்.

இந்த முறையைத் தொடர்ச்சியாக ஒரு மண்டலம் (48 நாட்கள்) பின்பற்றவும். வருடத்திற்கு இரண்டு முறை இந்த 48 நாள் காயகல்ப முறையைப் பின்பற்றலாம். உதாரணமாக, மூன்று மாதங்களுக்கு ஒரு முறை அல்லது ஆறு மாதங்களுக்கு ஒரு முறை இதைத் தொடரலாம். இந்த தேன் மிளகு காயகல்ப முறையைப் பின்பற்றுவதன் மூலம், உடலின் நோய் எதிர்ப்பு சக்தி அதிகரிக்கும்.  

பொறுப்பு துறப்பு: இந்தக் கட்டுரை பொது தளத்தில்/ நாங்கள் தொடர்பு கொண்டு பேசிய நிபுணர்களிடம் இருந்து பெறப்பட்ட தகவல் அடிப்படையில் எழுதப்பட்டுள்ளது. இக்கட்டுரையில் குறிப்பிட்டு இருப்பதை நீங்கள் கடைபிடிக்கும் முன், உங்கள் குடும்ப மருத்துவர் அல்லது உங்கள் உடல்நலப் பயிற்சியாளரை அணுகும்படி கேட்டுக் கொள்கிறோம்.