ஒரு நாளைக்கு 20 பாதாம்... 60 வயதை தாண்டிய மக்கள் அவசியம் நோட் பண்ணுங்க: டாக்டர் ராஜலட்சுமி யோசனை

60 வயதைக் கடந்தவர்களுக்கு ஆரோக்கியமான வாழ்க்கை முறை மிகவும் அவசியம். இதில் உணவுப் பழக்கவழக்கங்கள் முக்கியப் பங்காற்றுகின்றன. டாக்டர் ராஜலட்சுமி, வயதானவர்கள் தங்கள் தினசரி உணவில் பாதாம் பருப்பைச் சேர்ப்பதன் முக்கியத்துவத்தையும் அதன் நன்மைகளையும் பற்றி ட்ரடிஷனல்கேர் ஹாஸ்பிடல்யூடியூப் பக்கத்தில் வலியுறுத்துகிறார்.

பாதாமில் நிறைந்துள்ள வைட்டமின் ஈ, செல்களுக்கு ஏற்படும் சேதத்தைத் தடுத்து, உங்கள் சரும ஆரோக்கியத்தைப் பாதுகாப்பதில் முக்கியப் பங்கு வகிக்கிறது. வயதாகும்போது சருமம் வறண்டுபோகும் பிரச்சனையை இது குறைக்க உதவும்.

எலும்புகளின் உறுதிக்குக் கால்சியம் அத்தியாவசியம். அரை கைப்பிடி பாதாமில் சுமார் 96 மில்லிகிராம் கால்சியம் உள்ளது. வயதானவர்களுக்கு எலும்பு பலவீனம் ஒரு பொதுவான பிரச்சனை. மாத்திரைகள் மூலம் கால்சியம் எடுத்துக்கொள்வது சில சமயங்களில் சிறுநீரகக் கற்கள் போன்ற பிரச்சனைகளை ஏற்படுத்தலாம். 

ஆனால், பாதாமில் உள்ள கால்சியம், மெக்னீசியத்துடன் இணைந்து, எலும்புகளில் சரியாகப் படிய உதவுகிறது. இது எலும்புத் தேய்மானம் மற்றும் பலவீனத்தைத் தடுக்கிறது. பாதாமில் உள்ள நார்ச்சத்து, வயதானவர்களுக்கு ஏற்படும் மலச்சிக்கல் பிரச்சனையைத் தடுக்கிறது. சீரான குடல் இயக்கம் ஒட்டுமொத்த ஆரோக்கியத்திற்கு மிகவும் முக்கியம்.

60 வயதைக் கடந்தவர்கள் தினமும் 15 முதல் 20 பாதாம் பருப்புகளை உட்கொள்ளலாம். பாதாமின் முழுமையான நன்மைகளையும் பெற, அவற்றை இரவு முழுவதும் ஊறவைத்து, காலையில் தோலை உரித்துச் சாப்பிடுவது நல்லது. 

ஏனெனில், பாதாமின் வெளித்தோலில் உள்ள பைடிக் அமிலம் எனப்படும் ஒரு பொருள், உடலில் ஊட்டச்சத்துக்கள் உறிஞ்சப்படுவதைத் தடுக்கக்கூடும். குறிப்பாக நீரிழிவு நோயாளிகள் தோலை நீக்கிச் சாப்பிடுவது மிகவும் முக்கியம்.

ஆகவே, வயதானவர்கள் தங்கள் ஆரோக்கியத்தைப் பேணிக்காக்க, டாக்டர் ராஜலட்சுமியின் இந்த ஆலோசனையைப் பின்பற்றி, தினமும் பாதாம் பருப்பைத் தங்கள் உணவில் சேர்த்துக்கொள்ளலாம். இது அவர்களின் ஒட்டுமொத்த உடல்நலத்திற்கும் பெரும் நன்மை பயக்கும்.

பொறுப்பு துறப்பு: இந்தக் கட்டுரை பொது தளத்தில்/ நாங்கள் தொடர்பு கொண்டு பேசிய நிபுணர்களிடம் இருந்து பெறப்பட்ட தகவல் அடிப்படையில் எழுதப்பட்டுள்ளது. இக்கட்டுரையில் குறிப்பிட்டு இருப்பதை நீங்கள் கடைபிடிக்கும் முன், உங்கள் குடும்ப மருத்துவர் அல்லது உங்கள் உடல்நலப் பயிற்சியாளரை அணுகும்படி கேட்டுக் கொள்கிறோம்.