உச்சத்தில் பி. பி... அப்படியே குறைக்க சீரகம் இப்படி வறுத்து சாப்பிடுங்க: டாக்டர் சந்தோஷிமா

இன்றைய காலகட்டத்தில் பெரும்பாலானவர்களுக்கு உயர் இரத்த அழுத்தம் இருக்கிறது. உணவு முறை மாற்றம், வாழ்க்கை முறை மாற்றம் மற்றும் மன அழுத்தம் என பல்வேறு காரணங்களால் வயது பேதமின்றி பலரும் உயர் இரத்த அழுத்தத்திற்கு ஆளாகி வருகின்றனர். இந்நிலையில், வீட்டு வைத்திய முறையில் இதற்கு எவ்வாறு தீர்வு காணலாம் என்று மருத்துவர் சந்தோஷிமா தெரிவித்துள்ளார்.

ஒரு கிளாஸ் எலுமிச்சை சாறுடன், கால் ஸ்பூன் முதல் அரை ஸ்பூன் வரை பட்டை பொடி, இரண்டு சிட்டிகை சுத்தமான விரலி மஞ்சள் பொடி ஆகிய இரண்டையும் சேர்த்து கலந்து காலை நேரத்தில் குடிக்கலாம். இவ்வாறு தினசரி குடிக்கும் போது உயர் இரத்த அழுத்தம் குறையும் என்று மருத்துவர் சந்தோஷிமா தெரிவித்துள்ளார்.

இது தவிர சீரகத்தையும் மருந்தாக பயன்படுத்தலாம். அதன்படி, எண்ணெய் சேர்க்காமல் சீரகத்தை மட்டும் நன்றாக வறுத்து பொடியாக்கி வைத்துக் கொள்ள வேண்டும். இந்த சீரக பொடியை ஒரு ஸ்பூன் எடுத்து தேன் அல்லது வெதுவெதுப்பான சுடுதண்ணீரில் கலந்து குடிக்கலாம் என்று மருத்துவர் சந்தோஷிமா குறிப்பிட்டுள்ளார்.

சீரகத்தில் இருக்கும் அன்டி ஹைப்பர்டென்சிவ் தன்மை, உயர் இரத்த அழுத்தத்தை குறைக்க உதவுகிறது என்று கூறப்படுகிறது. எனவே, இதனையும் தொடர்ச்சியாக எடுத்துக் கொள்ளலாம் என்று மருத்துவர் சந்தோஷிமா தெரிவித்துள்ளார்.

இது போன்று வீட்டு வைத்திய முறையில் மருந்துகளை எடுத்துக் கொள்ளலாம் என்று நினைப்பவர்கள், தாங்கள் வழக்கமாக உட்கொள்ளும் மருந்துகளை எக்காரணம் கொண்டும் உடனடியாக தவிர்க்கக் கூடாது. இவ்வாறு செய்யும் போது அவை நோயின் தீவிரத்தை அதிகப்படுத்தும் வாய்ப்பு அதிகமாக இருக்கிறது.

எனவே, தாங்கள் வழக்கமாக சிகிச்சை பெற்று வரும் மருத்துவரின் ஆலோசனையின் பேரில் மட்டுமே வீட்டு வைத்திய முறையை பின்பற்ற வேண்டும் என்று வல்லுநர்கள் கூறுகின்றனர்.

நன்றி - Madhavas Siddha Ayurveda Clinic Dr. Santhoshima Youtube Channel

பொறுப்பு துறப்பு: இந்தக் கட்டுரை பொது தளத்தில்/ நாங்கள் தொடர்பு கொண்டு பேசிய நிபுணர்களிடம் இருந்து பெறப்பட்ட தகவல் அடிப்படையில் எழுதப்பட்டுள்ளது. இக்கட்டுரையில் குறிப்பிட்டு இருப்பதை நீங்கள் கடைபிடிக்கும் முன், உங்கள் குடும்ப மருத்துவர் அல்லது உங்கள் உடல்நலப் பயிற்சியாளரை அணுகும்படி கேட்டுக் கொள்கிறோம்.