ஆண்களின் வரப்பிரசாதம்... அற்புதம் செய்யும் இந்த சூப்; ஒரு முறை குடிச்சுப் பாருங்க!

முருங்கைக்காய், அதன் ஊட்டச்சத்துக்கள் மற்றும் ஆரோக்கிய நன்மைகளுக்காக அறியப்படுகிறது. அதிலும் குறிப்பாக, முருங்கைக்காய் சூப் ஆண்களின் ஆரோக்கியத்திற்கு மிகவும் நல்லது என்று கூறப்படுகிறது. இந்த சுவையான மற்றும் எளிமையான முருங்கைக்காய் சூப்பை எப்படி செய்வது என்று செஃப் தினு இன்ஸ்டா பக்கத்தில் செய்து காட்டியிருப்பது பற்றி பார்க்கலாம்.

தேவையான பொருட்கள்:

முருங்கைக்காய் (நறுக்கியது) - 4
தக்காளி (நறுக்கியது) - 2
பச்சை மிளகாய் (நீளமாக கீறியது) - 2
துவரம் பருப்பு - 1 தேக்கரண்டி
மஞ்சள் தூள் - ¼ தேக்கரண்டி
புளி - சிறிய எலுமிச்சை அளவு (ஊறவைத்து, சாறு எடுக்கவும்)
பூண்டு - 6 பல்
மிளகு - ½ தேக்கரண்டி
சீரகம் - 1 தேக்கரண்டி
கொத்தமல்லி இலை - ஒரு கைப்பிடி
உப்பு - தேவையான அளவு
எண்ணெய்/நெய் - 1 தேக்கரண்டி
கடுகு - ½ தேக்கரண்டி
உளுத்தம் பருப்பு - ½ தேக்கரண்டி
வெந்தயம் - ¼ தேக்கரண்டி
காய்ந்த மிளகாய் - 2
கறிவேப்பிலை - 1 கொத்து
மஞ்சள் தூள் - ஒரு சிட்டிகை
பெருங்காயம் - ஒரு சிட்டிகை

செய்முறை:

முதலில், ஒரு பிரஷர் குக்கரில் முருங்கைக்காய், தக்காளி, பச்சை மிளகாய், மஞ்சள் தூள், துவரம் பருப்பு, சிறிதளவு உப்பு மற்றும் தண்ணீர் சேர்த்துக்கொள்ளுங்கள். குக்கரை மூடி, 4 முதல் 5 விசில் வரும் வரை வேகவிடுங்கள். குக்கரில் உள்ள அழுத்தம் குறைந்ததும், மூடியைத் திறந்து, முருங்கைக்காயில் உள்ள சதைப்பற்றை ஒரு பாத்திரத்தில் எடுத்துக்கொள்ளுங்கள். பிறகு, அந்த பாத்திரத்தில் புளித் தண்ணீர் சேர்த்து, மிளகு மற்றும் சீரகத்தை பூண்டுடன் சேர்த்து நன்கு இடித்து, அதையும் கலந்துவிடுங்கள்.

நறுக்கிய கொத்தமல்லி இலைகளை சேர்த்து, சூப்பை நுரை வரும் வரை சூடாக்குங்கள். அதிக நேரம் கொதிக்க வைக்க வேண்டாம். ஒரு சிறிய தாளிப்பு கரண்டியில் எண்ணெய்/நெய் சூடாக்கி, கடுகு, உளுத்தம் பருப்பு, வெந்தயம், காய்ந்த மிளகாய் மற்றும் கறிவேப்பிலை சேர்த்து தாளித்துக்கொள்ளுங்கள். பிறகு, ஒரு சிட்டிகை மஞ்சள் தூள் மற்றும் பெருங்காயம் சேர்த்து, இந்த தாளிப்பை சூப்பின் மேல் ஊற்றவும்.

View this post on Instagram

A post shared by DINESH C (@chefdinu)

கடைசியாக, சுவை நன்கு கலப்பதற்காக மூடி வைத்து சிறிது நேரம் கழித்து பரிமாறுங்கள். இந்த சூடான மற்றும் சுவையான முருங்கைக்காய் சூப்பை அப்படியே சூப்பாகவும் அல்லது சாதத்துடன் ரசமாகவும் பரிமாறலாம். முருங்கைக்காயில் உள்ள சத்துக்கள் உடல் சோர்வைக் குறைத்து, ஆற்றல் மற்றும் சுறுசுறுப்பை அதிகரிக்க உதவுகின்றன.  பாரம்பரியமாக, முருங்கைக்காய் ஆண்மை சார்ந்த பிரச்சனைகளை சரிசெய்யவும், அவர்களின் ஒட்டுமொத்த ஆரோக்கியத்தை மேம்படுத்தவும் பயன்படுத்தப்படுகிறது.

பொறுப்பு துறப்பு: இந்தக் கட்டுரை பொது தளத்தில்/ நாங்கள் தொடர்பு கொண்டு பேசிய நிபுணர்களிடம் இருந்து பெறப்பட்ட தகவல் அடிப்படையில் எழுதப்பட்டுள்ளது. இக்கட்டுரையில் குறிப்பிட்டு இருப்பதை நீங்கள் கடைபிடிக்கும் முன், உங்கள் குடும்ப மருத்துவர் அல்லது உங்கள் உடல்நலப் பயிற்சியாளரை அணுகும்படி கேட்டுக் கொள்கிறோம்.