ஞாபக சக்தி குறையுதா? இந்த மீன் ரொம்ப பெஸ்ட்!

மீன் சாப்பிடுவது என்பது சுவைக்காக மட்டுமல்ல, ஒட்டுமொத்த உடல் ஆரோக்கியத்திற்கும் மிகவும் நல்லது என்று மருத்துவர்கள் தொடர்ந்து வலியுறுத்தி வருகிறார்கள். மீன்களில் உள்ள அத்தியாவசிய ஊட்டச்சத்துக்கள் பல நோய்களில் இருந்து நம்மைப் பாதுகாக்கின்றன. பெரும்பாலும் மக்கள் வஞ்சரம், சங்கரா, வவ்வா போன்ற அதிக விலை கொண்ட மீன்களைத் தேடிச் செல்கிறார்கள்.

ஆனால், உள்ளூர் சந்தைகளில் மலிவான விலையில் கிடைக்கும் சில மீன்கள் ஊட்டச்சத்துக்களின் களஞ்சியமாக இருக்கின்றன. அவற்றில் ஒன்றுதான் பவளப்பாறை மீன் (Coral Fish). பவளப்பாறை மீன் அதிக விலை கொண்ட மீன்களைப் போலவே ஆரோக்கிய நன்மைகளைத் தரக்கூடியது. ஒரு கிலோ 70 முதல் 80 ரூபாய் என்ற குறைந்த விலையில் கிடைப்பதால், அனைவரும் இதை வாங்கிப் பயன்படுத்த முடியும்.

ஞாபக சக்தி: பவளப்பாறை மீனில் நிறைந்துள்ள ஒமேகா-3 கொழுப்பு அமிலங்கள் மூளையின் செயல்பாட்டிற்கு மிகவும் அவசியம். இந்த ஆரோக்கியமான கொழுப்பு அமிலங்கள் மூளை செல்களின் வளர்ச்சியை ஊக்குவிப்பதுடன், நரம்பு மண்டலத்தின் செயல்பாடுகளை மேம்படுத்துகின்றன. இதன் மூலம் நினைவாற்றல் அதிகரிப்பதுடன், கவனச்சிதறல் குறைந்து ஒருமுகப்படுத்தும் திறன் மேம்படும். மூளைக்குத் தேவையான ஊட்டச்சத்துக்களை வழங்குவதன் மூலம், பவளப்பாறை மீன் அல்சைமர் போன்ற மூளை தொடர்பான நோய்கள் வருவதற்கான வாய்ப்புகளையும் குறைக்க உதவுகிறது.  

இதய ஆரோக்கியம்: பவளப்பாறை மீனில் ஒமேகா-3 கொழுப்பு அமிலங்கள் நிறைந்துள்ளன. இவை வீக்கத்தைக் குறைக்கவும், டிரைகிளிசரைடு அளவுகளைக் குறைக்கவும் உதவுகின்றன. ஆய்வுகளின்படி, தினமும் குறைந்தபட்சம் 250 மி.கி ஒமேகா-3 எடுத்துக்கொள்வது இதய நோயால் ஏற்படும் இறப்பை 35% வரை குறைக்கக்கூடும். மேலும், இதில் உள்ள சாச்சுரேட்டட் மற்றும் பாலிஅன்சாச்சுரேட்டட் கொழுப்பு அமிலங்கள் கொலஸ்ட்ரால் அளவைக் குறைத்து, மாரடைப்பு மற்றும் பக்கவாதம் ஏற்படும் அபாயத்தைக் குறைக்கின்றன.

எடை குறைப்பு, மூட்டு வலி நிவாரணி: குறைந்த அளவு கொழுப்பு மற்றும் அதிக புரதம் கொண்ட பவளப்பாறை மீனை சாப்பிடுவது உடல் எடை குறைப்புக்கு உதவுகிறது. இதில் உள்ள பொட்டாசியம் ரத்த அழுத்தத்தைக் கட்டுக்குள் வைத்திருக்கவும் உதவுகிறது.  பவளப்பாறை மீனில் வைட்டமின் B3 சத்து உள்ளது. இது கைகள் மற்றும் கால்களைப் பாதிக்கும் கீல்வாதம் (Arthritis) போன்ற பிரச்சனைகளைத் தடுக்க உதவுகிறது.

பவளப்பாறை மீன் சுவையாக இருப்பதோடு, குழம்பு, வறுவல் என இரண்டுக்கும் ஏற்றது. இதன் சுவை தனித்துவமானது. அடுத்தமுறை மீன் சமைக்க நினைத்தால், சுவையையும் ஆரோக்கியத்தையும் ஒருசேர தரும் இந்த மலிவான பவளப்பாறை மீனை கட்டாயம் முயற்சி செய்து பாருங்கள்.