300 வகை நோய்களை தடுக்கும்... இந்தக் கீரையில் சாம்பார் செஞ்சு ருசிங்க!

முருங்கை கீரை, நம் முன்னோர்கள் காலம் தொட்டு பயன்படுத்தி வரும் ஒரு அரிய மூலிகை. இது வெறும் கீரை மட்டுமல்ல, உடலில் உள்ள 300-க்கும் மேற்பட்ட நோய்களை குணப்படுத்தக்கூடிய ஒரு வரப்பிரசாதம் என ஆயுர்வேத மருத்துவம் கூறுகிறது. எளிதாகக் கிடைக்கும் இந்தக் கீரையில் உள்ள ஏராளமான ஊட்டச்சத்துக்கள் மற்றும் மருத்துவ குணங்கள் நம்மை வியப்பில் ஆழ்த்துகின்றன.
 
வைட்டமின் சி இதில் ஆரஞ்சு பழத்தைவிட 7 மடங்கு அதிகம் உள்ளது. இது நமது நோய் எதிர்ப்பு மண்டலத்தை வலுப்படுத்தி, சளி, இருமல் போன்ற நோய்களை தடுக்கிறது. முருங்கை கீரை இரும்புச்சத்தின் சிறந்த மூலமாகும். இது இரத்த சோகையை குணப்படுத்துவதோடு, உடலுக்கு தேவையான ஆற்றலையும் அளிக்கிறது.

பாலில் உள்ள கால்சியத்தை விட இதில் 4 மடங்கு அதிகம் உள்ளது. இது எலும்புகளையும், பற்களையும் வலுப்படுத்தி, ஆஸ்டியோபோரோசிஸ் போன்ற நோய்களைத் தடுக்கிறது. இதில் உள்ள ஆன்டி-ஆக்ஸிடண்ட்கள் இரத்த சர்க்கரை அளவை கட்டுக்குள் வைத்து, சர்க்கரை நோயாளிகளுக்கு நன்மை பயக்கிறது.

வைட்டமின் ஏ மற்றும் ஆன்டி-ஆக்ஸிடண்ட்கள் சருமத்தை ஆரோக்கியமாகவும், பளபளப்பாகவும் வைத்திருக்க உதவுகிறது. இவ்வளவு நன்மைகள் கொண்ட கீரையை நம் அன்றாட உணவில் சேர்த்துக்கொள்வது மிகவும் அவசியம். எளிமையான மற்றும் சுவையான முருங்கை கீரை சாம்பார் தயாரித்து அதன் முழு நன்மையையும் பெறலாம்.

தேவையான பொருட்கள்:

முருங்கை கீரை - 1 கப்
துவரம் பருப்பு - 1/2 கப்
வெங்காயம், தக்காளி - தலா 1
பூண்டு - 3-4 பல்
சாம்பார் தூள் - 1.5 தேக்கரண்டி
மஞ்சள் தூள் - 1/4 தேக்கரண்டி
புளி - சிறிய நெல்லிக்காய் அளவு
கடுகு, சீரகம், பெருங்காயத்தூள்
எண்ணெய், உப்பு - தேவையான அளவு

செய்முறை:

முதலில், துவரம் பருப்பை மஞ்சள் தூள் சேர்த்து குக்கரில் நன்கு வேகவைத்து எடுத்துக்கொள்ளுங்கள்.
ஒரு கடாயில் எண்ணெய் விட்டு, கடுகு, சீரகம் தாளித்த பிறகு, நறுக்கிய வெங்காயம், பூண்டு சேர்த்து வதக்குங்கள். வெங்காயம் பொன்னிறமானதும், தக்காளியை சேர்த்து மசிய வதக்கவும்.

பிறகு சாம்பார் தூள் சேர்த்து பச்சை வாசனை போக வதக்கி, சுத்தம் செய்த முருங்கை கீரையை சேர்த்து ஒரு நிமிடம் வதக்கவும். வேகவைத்த பருப்பு, புளிக்கரைசல் மற்றும் உப்பு சேர்த்து நன்கு கலக்கவும்.

View this post on Instagram

A post shared by Anusuya Pandiyan (@_anu_lifestyle_)

சாம்பார் ஒரு கொதி வந்ததும், தீயை குறைத்து, கீரை நன்கு வெந்ததும் இறக்கி விடவும். இப்போது சுவையான, ஆரோக்கியமான முருங்கை கீரை சாம்பார் தயார். இந்த சத்தான சாம்பாரை சூடான சாதத்துடன் சேர்த்து உண்டு, ஆரோக்கிய வாழ்வை பெறுங்கள். இது உங்கள் குடும்பத்தினருக்கும் குழந்தைகளுக்கும் சிறந்த ஊட்டச்சத்தை அளிக்கும்.