டெல்லி அவசரச் சட்டத்தை கண்டிக்காவிட்டால் காங்கிரஸுடன் கூட்டணி அமைப்பது மிகவும் கடினம்: ஆம் ஆத்மி

தேர்ந்தெடுக்கப்பட்ட அரசாங்கத்திடம் இருந்து ஆட்சியைக் கட்டுப்படுத்த டெல்லியில் பிரகடனம் செய்யப்பட்ட மத்திய அரசால் நிறைவேற்றப்பட்ட அவசரச் சட்டத்தை காங்கிரஸ் பகிரங்கமாகக் கண்டிக்காத வரை, காங்கிரஸை உள்ளடக்கிய எந்தவொரு கூட்டணியிலும் ஆம் ஆத்மி கட்சி அங்கம் வகிப்பது "மிகவும் கடினமாக" இருக்கும் என்று ஆம் ஆத்மி கட்சி (AAP) வெள்ளிக்கிழமை கூறியது.

2024 ஆம் ஆண்டு மக்களவைத் தேர்தலுக்கு முன்னதாக பா.ஜ.க.,வுக்கு எதிரான கூட்டணி குறித்து விவாதிக்க பீகாரின் பாட்னாவில் 15 எதிர்க்கட்சிகளின் கூட்டத்திற்குப் பிறகு ஆம் ஆத்மி கட்சியின் இந்த அறிக்கை வந்துள்ளது.

இதையும் படியுங்கள்: 2024 மக்களவை தேர்தல்: பாஜகவுக்கு எதிராக எதிர்க்கட்சிகள்: ‘ஊழல் கூட்டணி’ என பாஜக தாக்கு

“குறிப்பாக இது போன்ற முக்கியமான ஒரு பிரச்சினையில், காங்கிரஸின் தயக்கம் மற்றும் கூட்டணியில் ஒரு கட்சியாக செயல்பட மறுப்பது, காங்கிரஸை உள்ளடக்கிய எந்தவொரு கூட்டணியிலும் ஆம் ஆத்மி ஒரு பகுதியாக அங்கம் வகிப்பதற்கு மிகவும் கடினமாக இருக்கும். காங்கிரஸ் கருப்புச் சட்டத்தை பகிரங்கமாகக் கண்டித்து, அதன் 31 ராஜ்யசபா எம்.பி.,க்களும் ராஜ்யசபாவில் அவசரச் சட்டத்தை எதிர்ப்பார்கள் என்று அறிவிக்கும் வரை, காங்கிரஸ் பங்கேற்கும் ஒத்த எண்ணம் கொண்ட கட்சிகளின் எதிர்காலக் கூட்டங்களில் ஆம் ஆத்மி கட்சி பங்கேற்பது கடினம்,” என்று ஆம் ஆத்மி ஒரு அறிக்கையில் தெரிவித்துள்ளது.

இந்த அவசரச் சட்டம் குறித்து காங்கிரஸ் தனது நிலைப்பாட்டை தெளிவுபடுத்தவில்லை என்று ஆம் ஆத்மி கூறியுள்ளது. அதிகாரப்பூர்வ அறிக்கையில், பெரிய பழைய கட்சியான காங்கிரஸின் "மௌனம் அதன் உண்மையான நோக்கங்கள் பற்றிய சந்தேகத்தை எழுப்புகிறது" என்று ஆம் ஆத்மி கூறியது.

“தனிப்பட்ட விவாதங்களில், மூத்த காங்கிரஸ் தலைவர்கள் தங்கள் கட்சி ராஜ்யசபாவில் வாக்களிப்பதில் இருந்து முறைசாரா அல்லது முறைப்படி விலகிக் கொள்ளலாம் என்று சுட்டிக்காட்டியுள்ளனர். இந்தப் பிரச்சினையில் வாக்களிப்பதில் இருந்து காங்கிரஸின் புறக்கணிப்பு, இந்திய ஜனநாயகத்தின் மீதான தாக்குதலை மேலும் அதிகரிக்க பா.ஜ.க.,வுக்கு (BJP) பெரிதும் உதவும்... இன்று, பாட்னாவில் ஒத்த எண்ணம் கொண்ட கட்சிக் கூட்டத்தின் போது, ​​பல கட்சிகள் கருப்புச் சட்டத்தை பகிரங்கமாகக் கண்டிக்குமாறு காங்கிரஸை வலியுறுத்தின. ஆனால், அதற்கு காங்கிரஸ் மறுப்பு தெரிவித்தது,” என்று ஆம் ஆத்மி தெரிவித்துள்ளது.

டெல்லி முதல்வர் அரவிந்த் கெஜ்ரிவால் வெள்ளிக்கிழமை பாட்னாவில் நடைபெற்ற எதிர்க்கட்சிகள் கூட்டத்தில் பஞ்சாப் முதல்வர் பகவந்த் மான் மற்றும் ராஜ்யசபா எம்.பி.,க்கள் சஞ்சய் சிங் மற்றும் ராகவ் சதா ஆகியோருடன் கலந்து கொண்டார்.

“பாட்னாவில் ஒரே எண்ணம் கொண்ட கட்சிகளின் கூட்டத்தில் மொத்தம் 15 கட்சிகள் கலந்து கொள்கின்றன, அதில் 12 கட்சிகள் மாநிலங்களவையில் பிரதிநிதித்துவம் பெற்றுள்ளன. இந்திய தேசிய காங்கிரஸைத் தவிர, ராஜ்யசபாவில் பிரதிநிதித்துவம் பெற்ற மற்ற 11 கட்சிகளும் கருப்புச் சட்டத்திற்கு எதிரான தங்கள் நிலைப்பாட்டை தெளிவாக வெளிப்படுத்தியுள்ளன, மேலும் ராஜ்யசபாவில் அதை எதிர்ப்பதாக அறிவித்துள்ளன,” என்று ஆம் ஆத்மி தெரிவித்துள்ளது.

ஆம் ஆத்மி ஆட்சியில் உள்ள டெல்லி மற்றும் பஞ்சாபில் உள்ள காங்கிரஸ் பிரிவுகள், இந்த விவகாரத்தில் நரேந்திர மோடி அரசுக்கு ஆதரவளிக்க வேண்டும் என்று அறிவித்துள்ளன, என்றும் ஆம் ஆத்மி தெரிவித்துள்ளது.

டெல்லியில் தேர்ந்தெடுக்கப்பட்ட அரசாங்கத்தின் ஜனநாயக உரிமைகளைப் பறிப்பதையே ‘கருப்புச் சட்டம்’ நோக்கமாகக் கொண்டுள்ளது என்றும், அது “இந்தியாவின் ஜனநாயகம் மற்றும் அரசியலமைப்புக் கொள்கைகளுக்கு குறிப்பிடத்தக்க அச்சுறுத்தலை” ஏற்படுத்துவதாகவும் ஆம் ஆத்மி கூறியது.

இந்த அவசரச் சட்டம் "அரசியலமைப்புச் சட்டத்திற்கு எதிரானது, கூட்டாட்சிக்கு எதிரானது மற்றும் முற்றிலும் ஜனநாயக விரோதமானது" மற்றும் "நீதித்துறைக்கு எதிரானது" என்று கூறிய ஆம் ஆத்மி, "டெல்லி மக்களுடன் நிற்பதா அல்லது மோடி அரசாங்கத்துடன் நிற்பதா என்பதை காங்கிரஸ் தீர்மானிக்க வேண்டிய நேரம் இது" என்று கூறியது. 2024 ஆம் ஆண்டு மக்களவைத் தேர்தலுக்கு முன்னதாக பாட்னாவில் பா.ஜ.க.,வுக்கு எதிரான கூட்டணி குறித்து விவாதிக்க 15 எதிர்க்கட்சிகளின் கூட்டத்தைத் தொடர்ந்து ஆம் ஆத்மியின் இந்த அறிக்கை வந்துள்ளது.

தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil