scorecardresearch

பாதுகாப்பில் சமரசம் வேண்டாம்; உலகெங்கும் கொரோனா பரவல் அதிகரித்து வருவதால் மத்திய அரசு எச்சரிக்கை

உலகின் பல்வேறு நாடுகளில் மீண்டும் கொரோனா பரவல் எதிரொலி; பாதுகாப்பைக் குறைக்க வேண்டாம் என மாநிலங்களுக்கு மத்திய அரசு கடிதம்

பாதுகாப்பில் சமரசம் வேண்டாம்; உலகெங்கும் கொரோனா பரவல் அதிகரித்து வருவதால் மத்திய அரசு எச்சரிக்கை

Global Covid surge prompts alert from Centre: Don’t let guard down: உலகெங்கும் பல நாடுகளில் முன்னெப்போதும் இல்லாத வகையில் கொரோனா பரவல் அதிகரித்து வரும் நிலையில், இந்தியாவில் பாதிப்புகள் குறைந்து வரும் போக்கில் ஏதேனும் மாற்றம் நிகழாமல் இருக்க, தீவிரமான மரபணு வரிசைமுறை மூலம் சோதனையை தீவிரப்படுத்தவும், கண்காணிப்பை தீவிரப்படுத்தவும் மாநிலங்களை மத்திய அரசு கேட்டுக் கொண்டுள்ளது. முன்கூட்டிய எச்சரிக்கை சமிக்ஞைகள் தவறவிடப்படாமல் இருப்பதை உறுதிசெய்ய, காய்ச்சல் மற்றும் கடுமையான சுவாச நோய்களின் நிகழ்வுகளைக் கண்காணிக்க வேண்டியதன் அவசியத்தையும் மத்திய அரசு அடிக்கோடிட்டுக் காட்டியுள்ளது.

மாநில அரசுகளுக்கு மத்திய சுகாதார செயலாளர் ராஜேஷ் பூஷன் எழுதிய கடிதத்தில், மாநிலங்கள் மற்றும் யூனியன் பிரதேசங்கள் அனைத்து முன்னெச்சரிக்கை நடவடிக்கைகளையும் எடுக்க வேண்டியது அவசியம் என்றும், பொருளாதார மற்றும் சமூக நடவடிக்கைகளை மீண்டும் தொடங்கும் போது கொரோனா தடுப்பு பாதுகாப்பைக் குறைக்க வேண்டாம் என்றும் கூறினார். மத்திய சுகாதார அமைச்சர் மன்சுக் மாண்டவியா புதன்கிழமை நாட்டின் கொரோனா பணிக்குழுவுடன் நடத்திய சந்திப்பைத் தொடர்ந்து இந்த கடிதம் வெளியாகியுள்ளது.

“சோதனை செய்தல், தடமறிதல், சிகிச்சை அளித்தல், தடுப்பூசி மற்றும் கொரோனா வழிகாட்டு நெறிமுறைகளைப் பின்பற்றுதல் (உறுதிப்படுத்துதல்) ஆகிய ஐந்து முக்கிய உத்திகளில் தொடர்ந்து கவனம் செலுத்தப்பட வேண்டும் என்பதையும் நான் வலியுறுத்த விரும்புகிறேன்” என்று ராஜேஷ் பூஷன் எழுதியுள்ளார்.

புதிய மாறுபாடுகளை முன்கூட்டியே கண்டறிவதை உறுதி செய்வதற்காக, மரபணு வரிசைமுறைக்கான வைரஸ் மாதிரிகளை “போதுமான எண்ணிக்கையில்” மாநிலங்கள் சமர்ப்பிக்க வேண்டும் என்றும், இந்திய மருத்துவ ஆராய்ச்சி கவுன்சில் (ICMR) வகுத்துள்ள நெறிமுறைகளின்படி போதுமான எண்ணிக்கையிலான சோதனைகளை தொடர்ந்து மேற்கொள்ள வேண்டும் என்றும் அவர் கூறியுள்ளார்.

“சமீபத்திய கொரோனா தடுப்பு நடவடிக்கையான இளைஞர்களுக்கான தடுப்பூசி இயக்கம் மற்றும் தகுதி வாய்ந்தோருக்கான முன்னெச்சரிக்கை டோஸ்கள் மற்றும் அனைத்து பெரியவர்களும் தடுப்பூசி போடப்பட்டிருக்க வேண்டியதன் நோக்கத்தில் தகுதியான நபர்கள் அனைவரும் கொரோனாவுக்கு எதிராக தடுப்பூசி போட உந்துதல் பெறுவதை மாநிலங்கள் உறுதி செய்வது மிகவும் முக்கியம்” என்று ராஜேஷ் பூஷன் எழுதியுள்ளார்.

இதையும் படியுங்கள்: இந்தியாவுடன் பேச்சுவார்த்தை: சீனா விருப்பம்

இந்தியாவில் தொற்றுநோய் நிலைமை தற்போது கட்டுப்பாட்டில் உள்ளது, புதிய பாதிப்புகள் ஏப்ரல் 2020 முதல் மிகக் குறைந்த அளவில் உள்ளன. வியாழக்கிழமை, நாடு முழுவதும் 2,528 புதிய பாதிப்புகள் மட்டுமே பதிவாகியுள்ளன. சிகிச்சையில் உள்ளவர்களின் எண்ணிக்கையும் 30,000 ஆகக் குறைந்துள்ளது, இது மீண்டும் ஏப்ரல் 2020 இன் இறுதிக்கு பிறகான நிலையில் உள்ளது.

ஆனால் இந்தியாவின் அண்டை நாடுகள் உட்பட உலகெங்கிலும் உள்ள பல நாடுகள் கொரோனா பரவலில் அசாதாரணமான எழுச்சியைக் காண்கின்றன. மத்திய மற்றும் மேற்கு ஐரோப்பாவில் உள்ள பெரும்பாலான நாடுகள்; தென்கிழக்கு ஆசியாவில் மலேசியா, இந்தோனேசியா, சிங்கப்பூர் மற்றும் வியட்நாம்; நியூசிலாந்து மற்றும் ஆஸ்திரேலியா; இப்போது தென் கொரியாவில் மிக அதிக எண்ணிக்கையிலான நோய்த்தொற்றுகள் காணப்படுகின்றன.

உண்மையில், தென் கொரியாவின் மக்கள்தொகை இந்தியாவை விட குறைந்தது 25 மடங்கு குறைவாக உள்ளது, கடந்த ஒரு வாரமாக சராசரியாக 3.5 லட்சத்திற்கும் அதிகமான புதிய தொற்று பாதிப்புகள் பதிவாகியுள்ளன. வியாழக்கிழமை, அந்த நாட்டில் ஒரே நாளில் 6.21 லட்சத்திற்கும் அதிகமான பாதிப்புகள் கண்டறியப்பட்டுள்ளன. பிப்ரவரி தொடக்கத்தில் இருந்து ஹாங்காங்கில் இதேபோன்ற எழுச்சி பதிவு செய்யப்பட்டுள்ளது, மேலும் சீனாவிலும் குறைந்த அளவில் அதிகரித்து வருகிறது, ஆனால் இப்போது அங்கு கொரோனா பரவல் மெதுவாக இருப்பதாகத் தெரிகிறது.

சர்வதேச பயணங்கள் மீண்டும் தொடங்கியுள்ள நிலையில், இந்தியாவில் தொற்றுநோய்கள் அதிகரிக்கும் சாத்தியம் உள்ளது. ஒரு ஆறுதலான காரணி என்னவென்றால், தற்போதைய தொற்றுநோய்களின் அலை இன்னும் ஓமிக்ரான் மாறுபாட்டால் பரவி வருகிறது, இது இந்திய மக்கள்தொகையில் பெரும் பகுதியினரால் ஏற்கனவே வெளிப்படுத்தப்பட்டுள்ளது. ஒப்பீட்டளவில் அதிக தடுப்பூசி செலுத்தப்பட்டிருப்பது நம்பிக்கையின் ஆதாரமாக இருக்கலாம்.

புதன்கிழமை நடந்த கூட்டத்தில், சமூகத்தில் புழக்கத்தில் இருக்கும் புதிய மாறுபாடுகளைக் கண்டறிய மாதிரிகளின் தீவிரமான மரபணு வரிசைமுறையை உறுதிப்படுத்துமாறு அதிகாரிகளுக்கு அமைச்சர் மாண்டவியா உத்தரவிட்டார். மேலும், இந்தியாவில் உள்ள ஹாட்ஸ்பாட்களை முன்கூட்டியே கண்டறிவதற்கான கண்காணிப்பு முயற்சிகளை தீவிரப்படுத்த உள்ளூர் அளவிலான அதிகாரிகளுக்கு உத்தரவிட வேண்டும் என்றும் அமைச்சர் கூறினார்.

தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil

Stay updated with the latest news headlines and all the latest India news download Indian Express Tamil App.

Web Title: Centre states monitoring ili sari cases covid 19 surge