Vidheesha Kuntamalla
அசோகா பல்கலைக்கழகத்தின் பொருளாதாரத் துறையின் ஆசிரியர் சப்யசாச்சி தாஸ், 'உலகின் மிகப்பெரிய ஜனநாயகத்தில் ஜனநாயகப் பின்னடைவு' என்ற தனது ஆய்வுக் கட்டுரையின் சர்ச்சையைத் தொடர்ந்து ராஜினாமா செய்த சில நாட்களுக்குப் பிறகு, பொருளாதாரத் துறை புதன்கிழமை ஒரு திறந்த கடிதத்தில், அவரது ஆய்வின் "தகுதிகளை ஆராய்வதற்கான" செயல்பாட்டில் அசோகா பல்கலைக்கழக ஆட்சிமன்றக் குழுவின் "தலையிடல்," "ஆசிரியர்களின் வெளியேற்றத்தை துரிதப்படுத்தக்கூடும்" என்று கூறியது.
அசோகா பல்கலைக்கழகத்தின் பொருளாதாரப் பேராசிரியரான புலப்ரே பாலகிருஷ்ணனும் சப்யசாச்சி தாஸ் வெளியேறியதற்கு எதிர்ப்புத் தெரிவித்து ராஜினாமா செய்தார். அவரைத் தொடர்பு கொண்டபோது, “ஆம், நான் ராஜினாமா செய்துவிட்டேன். இது சப்யசாச்சி தாஸின் ராஜினாமா தொடர்பானது,” என்று கூறினார். அவரது ராஜினாமா குறித்து பல்கலைக்கழகம் இன்னும் முடிவு எடுக்கவில்லை; துணைவேந்தர் மற்றும் பதிவாளருக்கு மின்னஞ்சல் அனுப்பியும் பதில் வரவில்லை.
இதையும் படியுங்கள்: மும்பை ரயில் கொலை: ரயில்வே போலீஸ் பணி நீக்கம்; அவர் மீது 6 ஆண்டுகளுக்கு முன்பே மற்றொரு ‘வெறுப்பு வழக்கு’
பொருளாதாரத் துறையின் அதிகாரப்பூர்வ ட்விட்டர் பக்கத்தில் வெளியிடப்பட்ட பல்கலைக்கழக நிர்வாகக் குழுவிற்கு எழுதப்பட்ட கடிதத்தை, அசோகா பல்கலைக்கழகத்தின் பொருளாதாரத் தரவு மற்றும் பகுப்பாய்வு மையத்தின் (CEDA) நிறுவன இயக்குநரும், பொருளாதார பேராசிரியருமான அஸ்வினி தேஷ்பாண்டேவும் பகிர்ந்துள்ளார். பொருளாதாரத் துறையின் ஒருமித்த கருத்தைப் பிரதிபலிப்பதாக அஸ்வினி தேஷ்பாண்டே உறுதிப்படுத்திய கடிதத்தில், சப்யசாச்சி தாஸூக்கு பல்கலைக்கழகம் "நிபந்தனையின்றி" அவரது பதவியை மீண்டும் வழங்க வேண்டும் என்றும், "எந்தவொரு குழு அல்லது வேறு எந்த அமைப்பு மூலமாகவும் ஆசிரியரின் ஆராய்ச்சியை மதிப்பிடுவதில்" ஆட்சிமன்றக் குழு எந்தப் பங்கையும் கொண்டிருக்க கூடாது என்றும் கோரியது.
“எங்கள் சக பேராசிரியர் சப்யசாச்சி தாஸின் ராஜினாமா மற்றும் அதை பல்கலைக்கழகம் அவசரமாக ஏற்றுக்கொண்டது, பொருளாதாரத் துறை பீடத்தில் உள்ள நாங்கள், எங்கள் சகாக்கள், எங்கள் மாணவர்கள் மற்றும் அசோகா பல்கலைக்கழகத்தின் நலன் விரும்பிகள் என எல்லோரிடம் இருந்த நம்பிக்கையை ஆழமாக சிதைத்துவிட்டது. சப்யசாச்சி தாஸ் பல்கலைக் கழகத்தின் முக்கியப் பொறுப்பில் இருந்தவர்… இதை உடனடியாகத் தீர்க்குமாறு ஆட்சிமன்றக் குழுவை நாங்கள் கேட்டுக்கொள்கிறோம், ஆனால் ஆகஸ்ட் 23, 2023 க்குப் பிறகு அல்ல. அவ்வாறு செய்யத் தவறினால், அசோகாவில் உள்ள மிகப்பெரிய கல்வித் துறையும், அசோகா பார்வையின் நம்பகத்தன்மையும் முறையாக சிதைந்துவிடும், என்று கடிதம் கூறியது.
பல்கலைக்கழகத்தின் தலைமையுடனான ஆசிரிய அமைப்பின் அவசரக் கூட்டத்தில், சப்யசாச்சி தாஸுக்கு அவரது பதவியைத் திரும்ப வழங்கவும், வளாகத்தில் கல்விச் சுதந்திரத்தை உறுதிப்படுத்தவும் கோரிக்கைகள் முன்வைக்கப்பட்டன. முன்னதாக ஆகஸ்ட் 15, செவ்வாய் அன்று, துறைத் தலைவரும், கிரியேட்டிவ் ரைட்டிங் பேராசிரியருமான அமித் சவுத்ரி, துணைவேந்தர் மற்றும் பீடாதிபதிக்கு கடிதம் எழுதினார், மேலும் "கல்வி சுதந்திரத்தின் அனைத்து முக்கிய களத்திற்கும் தொடர்ந்து அச்சுறுத்தல்கள்" என்று சிவப்புக் கொடி காட்டினார்.
நயன்ஜோத் லஹிரி, புலப்ரே பாலகிருஷ்ணன், சைகத் மஜும்தார் மற்றும் மாதவி மேனன் உட்பட 87 ஆசிரியர்கள் கையெழுத்திட்ட ‘கல்வி சுதந்திரம் குறித்த கடிதம்’ மின்னஞ்சலில் இணைக்கப்பட்டுள்ளது. தி இந்தியன் எக்ஸ்பிரஸ் தொடர்பு கொண்டபோது, “பல்கலைக்கழகத்தில் ஏற்றுக்கொள்ள முடியாத வகையில் நிலைமை கையாளப்பட்டதாக நாங்கள் கருதியதாலும், பிரதாப் பானு மேத்தா வெளியேறிய பிறகு உருவாக்கப்பட்ட கல்வி சுதந்திரத்திற்கான ஆவணம் எங்களிடம் இருந்ததாலும், அதற்கான வழிகாட்டுதல்கள் மற்றும் உறுதிமொழிகள் இருந்ததால் இந்தக் கடிதத்தை நாங்கள் வடிவமைத்தோம். கல்வி சுதந்திரம் பற்றிய பல்கலைக்கழகத்தின் அதிகாரப்பூர்வ நிலைப்பாடுகள் மற்றும் சில ட்வீட்களின் தோற்றம் பற்றி எங்களுக்கு எதுவும் தெரியாது. இப்போது நடக்கும் ஒன்று, விரைவில், கல்விச் சுதந்திரத்திற்கான ஒரு குழுவை அமைப்பதாகும், இதனால் நமக்கு எதுவும் தெரியாத தற்காலிக முடிவுகள் சாத்தியமற்றதாகிவிடும்,” என்று அமித் சவுத்ரி கூறினார்.
அசோகா பல்கலைக்கழகத்தில் ஒரு புதிய கல்வி அமர்வு தொடங்குவதற்கு மூன்று நாட்களுக்கு முன்னதாகவே இந்த நிகழ்வுகள் வந்துள்ளன. அசோகா பல்கலைக்கழகத்தின் செய்தித் தொடர்பாளர் மற்றும் துணைவேந்தருக்கு மின்னஞ்சல் அனுப்பியும் இதுவரை பதில் வரவில்லை.
அசோகா பல்கலைக்கழகத்தின் ஆங்கிலம் மற்றும் படைப்பாற்றல் துறைகளும் பொருளாதாரத் துறைக்கு ஆதரவை தெரிவித்து பல ஆட்சிமன்றக் குழு உறுப்பினர்களுக்கு கடிதம் எழுதின. “பொருளாதாரத் துறையில் உள்ள எங்கள் சகாக்களுக்கு நாங்கள் ஆதரவாக நிற்கிறோம் மற்றும் அசோகாவில் பேராசிரியர் சப்யசாச்சி தாஸின் பதவியை மீட்டெடுக்க வேண்டும் என்ற அவர்களின் கோரிக்கையை எதிரொலிக்கிறோம். இந்த தோல்விக்கு பொறுப்பான ஆட்சிமன்றக் குழு மற்றும் மூத்த சகாக்களிடமிருந்து பொறுப்புக்கூறலைக் கோருகிறோம், மேலும் ஆசிரியரின் ஆராய்ச்சியை மதிப்பிடுவதிலோ மூத்த ஆசிரியர்களை தற்காலிகக் குழுக்கள் அல்லது அமைப்புகளை நியமிப்பதன் மூலம் இந்தப் பயிற்சியை மேற்கொள்வதில் எந்தப் பங்கும் வகிக்காது என்று ஆட்சிமன்றக் குழுவிடம் உறுதிமொழி கோருகிறோம்,” என்று துறைகள் தெரிவித்தன.
இத்துறையில் உதவிப் பேராசிரியரான சப்ய்சாச்சி தாஸ் கடந்த வாரம் ராஜினாமா செய்தார். திங்களன்று அவரது ராஜினாமாவை பல்கலைக்கழகம் உறுதிசெய்து, ஒரு அறிக்கையில், “அவரைத் தடுக்க தீவிர முயற்சிகளை மேற்கொண்ட பிறகு, பல்கலைக்கழகம் அவரது ராஜினாமாவை ஏற்றுக்கொண்டது… இந்திய தேர்தல்கள் குறித்த டாக்டர் சப்யசாச்சி தாஸின் கட்டுரை சமீபத்தில் சமூக ஊடகங்களில் பகிரப்பட்ட பின்னர் பரவலான சர்ச்சைக்கு உட்பட்டது. பல்கலைக் கழகத்தின் கருத்துக்களைப் பிரதிபலிக்கும் வகையில் பலரால் உணரப்பட்டது... பல்கலைக் கழகம் அதன் ஆசிரியர்கள் மற்றும் மாணவர்களால் நடத்தப்படும் ஆராய்ச்சியை இயக்கவோ அல்லது கட்டுப்படுத்தவோ இல்லை. இந்தக் கல்விச் சுதந்திரம் டாக்டர் சப்யசாச்சி தாஸுக்கும் பொருந்தும்,” என்று கூறியது.
ஆட்சிமன்றக் குழுவிற்கு எழுதிய பகிரங்கக் கடிதத்தில், பொருளாதாரத் துறை, “பேராசிரியர். சப்யசாச்சி தாஸ் கல்வி நடைமுறையில் ஏற்றுக்கொள்ளப்பட்ட எந்த விதிமுறையையும் மீறவில்லை. கல்விசார் ஆராய்ச்சி என்பது சக மதிப்பாய்வு செயல்முறை மூலம் தொழில் ரீதியாக மதிப்பீடு செய்யப்படுகிறது. இந்தச் செயல்பாட்டில் ஆட்சிமன்றக் குழுவின் தலையீடு, அவரது சமீபத்திய ஆய்வின் தகுதிகளை ஆராய்வது, நிறுவனரீதியான துன்புறுத்தலை உருவாக்குகிறது, கல்விச் சுதந்திரத்தைக் குறைக்கிறது, மேலும் அறிஞர்களை அச்சம் நிறைந்த சூழலில் செயல்பட வைக்கிறது. இதை நாங்கள் கடுமையாக கண்டிக்கிறோம் மற்றும் ஆட்சிமன்றக் குழுவின் தனிப்பட்ட பொருளாதார ஆசிரிய உறுப்பினர்களின் ஆராய்ச்சியை மதிப்பிடுவதற்கான எந்தவொரு எதிர்கால முயற்சியிலும் ஒத்துழைக்க ஒரு கூட்டாக மறுக்கிறோம்,” என்று குறிப்பிட்டது.
ஆட்சிமன்றக் குழுவில் அசோகா பல்கலைக்கழக வேந்தர் ருத்ராங்ஷு முகர்ஜி, துணைவேந்தர் சோமக் ராய்சவுத்ரி, மது சந்தக், புனித் டால்மியா, ஆஷிஷ் தவான், பிரமத் ராஜ் சின்ஹா, சித்தார்த் யோக், தீப் கல்ரா மற்றும் ஜியா லால்காகா ஆகியோர் இடம்பெற்றுள்ளனர்.
அசோகா பல்கலைக்கழகத்தின் பொருளாதாரத் துறையானது, நாட்டின் தலைசிறந்த பொருளாதாரத் துறைகளில் சிறப்பானதாகக் கருதப்படும் வகையில் மிகவும் சிரமப்பட்டு கட்டமைக்கப்பட்டுள்ளது என்று ஆட்சிமன்றக் குழுவிற்கு அனுப்பிய திறந்த கடிதத்தில் குறிப்பிடப்பட்டுள்ளது. “ஆட்சிமன்றக் குழுவின் நடவடிக்கைகள் துறைக்கு இருத்தலியல் அச்சுறுத்தலை ஏற்படுத்துகின்றன. இது ஆசிரியர்களின் வெளியேற்றத்தைத் துரிதப்படுத்தவும், புதிய ஆசிரியர்களை சேர்ப்பதில் இருந்து நம்மைத் தடுக்கவும் வாய்ப்புள்ளது,” என்று கடிதம் கூறியது.
சப்யசாச்சி தாஸின் "உலகின் மிகப்பெரிய ஜனநாயகத்தில் ஜனநாயக பின்னடைவு" என்ற ஆய்வுக் கட்டுரை, இந்தியாவில் 2019 பொதுத் தேர்தலில் ஒழுங்கற்ற வடிவங்களை ஆவணப்படுத்துகிறது மற்றும் அவை தேர்தல் கையாளுதல் அல்லது துல்லியமான கட்டுப்பாட்டின் காரணமாக உள்ளதா என்பதை அடையாளம் காட்டுகிறது, அதாவது, பிரச்சாரத்தின் மூலம் வெற்றி வித்தியாசத்தை துல்லியமாக கணித்து பாதிப்பை ஏற்படுத்தும் தற்போதைய ஆளும் கட்சியின் திறன் ஆகியவற்றை வெளிப்படுத்தியது. “இந்தியாவின் மிகப் பெரிய சிறுபான்மைக் குழுவான முஸ்லிம்களுக்கு எதிராக இலக்குத் தேர்தல் பாகுபாட்டின் வடிவத்தைக் கையாளுதல், தேர்தல் பார்வையாளர்களின் பலவீனமான கண்காணிப்பால் ஓரளவு எளிதாக்கப்படுகிறது. இந்த முடிவுகள் ஜனநாயகத்தின் எதிர்காலத்திற்கான கவலையளிக்கும் வளர்ச்சியை முன்வைக்கின்றன.”
சப்யசாச்சி தாஸ் செய்த அனுமானங்கள், பின்பற்றப்பட்ட முறை மற்றும் எடுக்கப்பட்ட முடிவுகள் விமர்சனங்களைத் தூண்டின: மிகச் சிறிய மாதிரி அளவு (11 இடங்கள்), தேர்தல் அலுவலர்கள் மற்றும் இயந்திரங்களின் விரிவான சீரமைப்பு (குறிப்பிட்ட சாவடி நிலை அதிகாரி எங்கே நியமிக்கப்படுகிறார் என்பது தலைமைத் தேர்தல் அதிகாரியின் அலுவலகத்திற்குத் தெரியாது; ஆனால், BLO கள் கூட மூன்று நாட்களுக்கு முன்பே தெரிந்துகொள்ளலாம்), இலக்கு வாக்காளர் நீக்கம் பற்றிய உறுதியற்ற சான்றுகள் மற்றும் சிறுபான்மை குழுக்கள் அல்லது அரசியல் கட்சிகளில் இருந்து வாக்காளர்களை நீக்குவது பற்றிய புகார்கள் எதுவும் இல்லை.
அசோகா பல்கலைக்கழகம், ஆன்லைனில் பதவில், ஆய்வுக் கட்டுரையில் இருந்து விலகி, அசோகா பல்கலைக்கழகத்தின் ஆசிரியர்கள், மாணவர்கள் அல்லது பணியாளர்களின் "தனிப்பட்ட திறனில்" செய்யும் சமூக ஊடக செயல்பாடு அல்லது பொது செயல்பாடு பல்கலைக்கழகத்தின் நிலைப்பாட்டை பிரதிபலிக்கவில்லை என்று கூறியது.
தில்லியில் உள்ள ஐ.எஸ்.ஐ.,யின் பொருளாதாரத்தின் இணைப் பேராசிரியர் முடித் கபூர் தனது விமர்சனத்தில், "ஆய்வுக் கட்டுரையின் புள்ளிவிவரக் கண்டுபிடிப்புகள் ஆய்வுக் கட்டுரையில் உள்ள கூற்றுகளை ஆதரிக்கவில்லை" என்று கூறினார். "2019 இல் பா.ஜ.க.,வின் (BJP) வெற்றி வித்தியாசம் மட்டுமே தொடர்ச்சியின்மை பற்றிய புள்ளிவிவர ரீதியாக குறிப்பிடத்தக்க மதிப்பீட்டை வெளிப்படுத்துகிறது" என்று சப்யசாச்சி தாஸின் கட்டுரை குறிப்பிடுகையில், முடித் கபூர் இது "தங்கள் முடிவுகளின் தவறான விளக்கம், ஏனெனில் 2009 இல், இந்திய தேசிய காங்கிரஸூக்கு (INC) ஆசிரியர்கள் 1.80 இன் தொடர்ச்சியின்மையின் பெரிய மதிப்பீட்டைக் கண்டறிந்தனர்; இருப்பினும், அது 'புள்ளியியல் முக்கியத்துவம் வாய்ந்ததாக' இல்லாததால், விளைவு பூஜ்ஜியம் (0) என்று கருதப்பட்டது." என்று கூறினார்.
"தேர்தல்களில் பா.ஜ.க தோல்வியடைந்தது, சராசரி அல்லது சராசரி தேர்தல் வளர்ச்சியில் இருந்து வாக்காளர் பதிவில் வழக்கத்திற்கு மாறான அதிகரிப்பு இருப்பதாகத் தெரிகிறது... இந்த வரைபடங்களை எளிமையாகப் படித்தால், இலக்கு வாக்காளர் நீக்கப்பட்டதற்கான சான்றுகள் சிறந்தவையாக இல்லை," என்று முடித் கபூர் கூறினார்.
தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil
/indian-express-tamil/media/agency_attachments/33Ho9XHwZawzDekwDLnu.png)
Follow Us/tamil-ie/media/media_files/uploads/2023/08/Ashoka-University-Professors.jpg)