நாக்கு புற்றுநோய்: கவனிக்க வேண்டிய 7 ஆரம்ப அறிகுறிகள்; நிபுணர்கள் விளக்கம்

உணவை ரசித்துச் சாப்பிடும்போது திடீரென்று நாக்கில் ஒரு வலி, எரிச்சல்... "அட! ஒரு சின்ன வாய்ப்புண் போல!" என்று நினைத்து அதை நாம் அலட்சியப்படுத்துவது வழக்கமானதுதானே? ஆனால், சில நேரங்களில், இந்தச் சின்னஞ்சிறு புண்கள் ஒரு பெரிய ஆபத்தின் முதல் படியாக இருக்கலாம் என்பதை நாம் அறிவோமா? ஆம், நாம் இங்குப் பேசப்போவது நாக்கு புற்றுநோய் பற்றி!

ஹைதராபாத்தில் உள்ள புகழ்பெற்ற யசோதா மருத்துவமனையின் புற்றுநோய் நிபுணர் டாக்டர் சச்சின் மார்டா இந்துஸ்தான் டைம்ஸ் லைஃப்ஸ்டைலுக்கு நாக்கு புற்றுநோயின் ஆரம்ப அறிகுறிகள் பற்றித் தௌிவாக எடுத்துரைக்கிறார்.

நாம் உடனடியாகக் கவனம் செலுத்த வேண்டிய அந்த ஏழு முக்கிய அறிகுறிகள் இங்கே:

1. ஆறாத ரணங்கள்!

இரண்டு வாரங்களுக்கு மேல் ஆறாமல் இருக்கும் நாக்கு புண்கள், அல்லது வாயில் இருக்கும் புண்கள். சில சமயங்களில் இது ஆரம்பத்தில் வலியைக் கூட ஏற்படுத்தாது. கவனமாக இருங்கள்!

2. நாக்கில் வெள்ளை மற்றும் சிவப்புத் திட்டுகள்!

வாயின் அடியில் அல்லது நாக்கின் அடியில் திடீரென வெள்ளை அல்லது சிவப்புத் திட்டுகள் தோன்றுகிறதா? இவை புற்றுநோயாக மாறக்கூடிய ஆரம்ப நிலையின் அறிகுறிகளாக இருக்கலாம்!

3. வலி, வலி, வலி!

சாப்பிடும்போதும், பேசும்போதும் நாக்கில் ஒருவித வலி, அசௌகரியம் தொடர்ந்து இருக்கிறதா? அதுவும் ஒரு அபாய அறிவிப்பே!

4. தடித்தும், வீங்கியும் போகும் நாக்கு!

நாக்கில் ஒரு தடிப்பு அல்லது வீக்கம் தெரிகிறதா? அது குணமாகாமல் இருக்கிறதா? அலட்சியப்படுத்தாதீர்கள்!

5. நாக்கை அசைக்க முடியவில்லை!

நாக்கை வழக்கம்போல் அசைக்க முடியவில்லை, இதனால் பேசவும், விழுங்கவும் சிரமமாக இருக்கிறதா? இதுவும் நாக்கு புற்றுநோயின் அறிகுறியாக இருக்கலாம்!

6. விவரிக்க முடியாத ரத்தப்போக்கு!

எந்தக் காரணமும் இல்லாமல் நாக்கிலிருந்து ரத்தம் வருகிறதா? உடனடியாக மருத்துவரை அணுகவும்!

7. கழுத்தில் வீக்கம்!

கழுத்தில் உள்ள நிணநீர் கணுக்கள் பெரிதாகி, வீங்கியதுபோல் உணர்கிறீர்களா? இது ஒரு முக்கியமான எச்சரிக்கை!

அசாதாரணமான அறிகுறிகள்:

நாக்கு புற்றுநோய் அதிகமாகும்போது, காதுகளில் வலி, தாடையில் வலி, காதில் ஒருவித இரைச்சல் (டின்னிடஸ்), தாடையைத் திறப்பதில் சிரமம் போன்ற அசாதாரண அறிகுறிகளும் தோன்றலாம்.

டாக்டர் சச்சின் மார்டா கூறியதுபோல், "நாக்கு புற்றுநோயை ஆரம்பத்திலேயே கண்டறிவது, சிகிச்சையின் வெற்றியைப் பல மடங்கு அதிகரிக்கும்."

எனவே, உங்கள் உடல் ஆரோக்கியத்தின் மீது ஒரு கண் வையுங்கள். ஒரு புண் என்று அலட்சியப்படுத்தும் முன், அது ஒரு பெரிய ஆபத்தின் ஆரம்ப அறிகுறியா என்பதை உறுதிப்படுத்திக் கொள்ளுங்கள். நினைவில் கொள்ளுங்கள், விழிப்புணர்வு தான் முதல் பாதுகாப்பு.

பொறுப்பு துறப்பு: இந்த கட்டுரை தகவலுக்காக மட்டுமே, இது ஒரு தொழில்முறை மருத்துவ ஆலோசனைக்கு மாற்றாகாது. ஒரு மருத்துவ நிலை குறித்து ஏதேனும் கேள்விகள் இருந்தால் எப்போதும் உங்கள் மருத்துவரை அணுகவும்.