மாநில கிரிக்கெட் சங்கங்கள் மற்றும் பி.சி.சி.ஐ ஆகியவற்றில் உள்ள நிர்வாகிகளின் பதவிக் காலங்களுக்கு இடையே கட்டாய இடைவெளிக் (ஓய்வு) காலத்தை நீக்கக் கோரிய பி.சி.சி.ஐ.,யின் மனுவை உச்ச நீதிமன்றம் புதன்கிழமை ஏற்றுக்கொண்டது.
இப்போது நிர்வாகிகள் தொடர்ந்து இரண்டு முறை பதவியில் இருந்த பின்னரே இடைவெளிக் காலத்தை மேற்கொள்ள வேண்டும்.
இதையும் படியுங்கள்: ‘கோலியை விடுங்க… உங்க கதை எப்படி?’ அஃப்ரிடிக்கு பதிலடி கொடுத்த மாஜி வீரர்
புதிய விதி இப்போது மாநில கிரிக்கெட் சங்கங்களுக்கும் பொருந்தும்.
பி.சி.சி.ஐ.,யின் அரசியலமைப்பை திருத்தக் கோரிய மனுவை விசாரித்த உச்ச நீதிமன்றம், பி.சி.சி.ஐ ஒரு தன்னாட்சி அமைப்பு மற்றும், அதன் செயல்பாட்டை நீதிமன்றத்தால் நுண்ணிய முறையில் நிர்வகிக்க முடியாது என்ற கருத்துக்களை ஏற்றுக் கொண்டது. ஐ.சி.சி.,யில் தேசத்தை பிரதிநிதித்துவப்படுத்த 70 வயதுக்கு மேற்பட்டவர்கள் ஏன் இருக்க வேண்டும் என்று நாட்டின் உச்ச கிரிக்கெட் அமைப்பான பி.சி.சி.ஐ-யிடம் உச்ச நீதிமன்றம் கேட்டுள்ளது.
"ஓய்வுக் காலத்தின் நோக்கம், தேவையற்ற சிக்கல் இருக்கக் கூடாது என்பதே" என்பதால், அலுவலகப் பணியாளர்களின் பதவிக் காலத்திற்கு இடையே இடைவெளிக் காலம் நீக்கப்படாது என்றும் உச்ச நீதிமன்றம் கூறியது.
பி.சி.சி.ஐ.,யால் ஏற்றுக்கொள்ளப்பட்ட அரசியலமைப்பின்படி, ஒரு அலுவலகப் பொறுப்பாளர், மாநில சங்கம் அல்லது பி.சி.சி.ஐ அல்லது இரண்டையும் சேர்த்து இரண்டு தொடர்ச்சியான காலங்களுக்கு இடையே மூன்று வருட இடைவெளிக் காலத்தை மேற்கொள்ள வேண்டும். தொடக்கத்தில், பி.சி.சி.ஐ சார்பில் ஆஜரான சொலிசிட்டர் ஜெனரல் துஷார் மேத்தா, நீதிபதிகள் டி.ஒய் சந்திரசூட் மற்றும் ஹிமா கோஹ்லி ஆகியோர் அடங்கிய அமர்வுக்கு, நாட்டில் கிரிக்கெட் விளையாட்டு கணிசமாக நெறிப்படுத்தப்பட்டுள்ளது என்று கூறினார். துணைச் சட்டங்கள் செயல்பாட்டுக்குத் தயாராகும் போது, நீதிமன்றத்தின் அனுமதியுடன் சில மாற்றங்களைச் செய்யலாம் என்று உச்ச நீதிமன்றம் கூறியிருப்பதாக அவர் சமர்ப்பித்தார்.
அக்டோபர் 2019 இல் பி.சி.சி.ஐ.,யின் தலைவராக கங்குலி பொறுப்பேற்றார். தற்போதுள்ள அரசியலமைப்பின்படி, கங்குலியின் ஆறு ஆண்டு பதவிக்காலம் 2020 இல் முடிவடைந்தது.
ஜெய் ஷா 2013 ஆம் ஆண்டில் குஜராத் கிரிக்கெட் சங்கத்தின் பொறுப்பாளராக இருந்த பின்னர், ஆறு ஆண்டுகளாக பி.சி.சி.ஐ.,யின் செயலாளராக இருந்து வருகிறார்.
தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil