Tamil Nadu Assembly News: NRCயை எதிர்ப்போம் – அமைச்சர் உதயகுமார்

சட்டசபை கூட்டத்தொடரில் பங்கேற்க திமுக எம்எல்ஏ அன்பழகனுக்கு தடைவிதித்து சபாநாயகர் தனபால் உத்தரவிட்டுள்ளார்.

தேசிய குடிமக்கள் பதிவேட்டை தமிழகத்தில் அமல்படுத்தினால் அதிமுக எதிர்க்கும். எதிர்க்கட்சி தலைவர் ஸ்டாலின் எழுப்பிய கேள்விக்கு அமைச்சர் உதயகுமார் இவ்வாறு பதிலளித்துள்ளார்.

உள்ளாட்சித்துறை அமைச்சர் வேலுமணியை ஒருமையில் பேசியது தொடர்பாக, திமுக எம்எல்ஏ அன்பழகனை வெளியேற்றுவது தொடர்பாக அவை முன்னவர் ஒ.பன்னீர்செல்வம்  தீர்மானம் நிறைவேற்றப்பட்ட நிலையில், அன்பழகன் மன்னிப்பு கேட்டார். 

மறப்போம், மன்னிப்போம் என ஒ.பன்னீர்செல்வம் கூறியதால் வெளியேற்றத்தை கைவிட்டார் சபாநாயகர்

குடியுரிமை சட்டத்தை எதிர்க்கவில்லை, அதில் மேற்கொள்ளப்பட்டுள்ள திருத்தங்களையே எதிர்ப்பதாக சட்டசபை எதிர்க்கட்சி துணைத்தலைவர் துரைமுருகன் தெரிவித்துள்ளார்.

சிறுபான்மையினருக்கு ஆதரவாக எங்கள் கட்சி உள்ளது என்று அதிமுக கூறிவரும் நிலையில், குடியுரிமை திருத்த சட்டத்துக்கு ஆதரவு அளித்தது ஏன் என திமுக தலைவர் ஸ்டாலின் கேள்வி எழுப்பியுள்ளார்.

நாட்டிலேயே சட்டம் ஒழுங்கில் தமிழகம் தான் முதன்மை மாநிலமாக உள்ளது என்று சட்டசபையில் முதல்வர் பழனிசாமி தெரிவித்துள்ளார். அவர் பேசியதாவது, தமிழகத்தில் சட்டம் ஒழுங்கு சரியில்லை என்ற குறறச்சாட்டுக்கு திமுக எம்எல்ஏ அன்பழகன் ஆதாரங்களை அளிக்க முடியுமா என்று கேள்வி எழுப்பினார். சட்டம் ஒழுங்கில் தமிழகம் முதன்மை இடம் என்பதை நாங்கள் கூறவில்லை, மத்திய அரசே கூறியிருப்பதாக முதல்வர் பழனிசாமி தெரிவித்துள்ளார்.

உள்ளாட்சி தேர்தல் நேர்மையாக நடைபெற்றதற்கு எடப்பாடி, கெங்கவல்லியில் அதிமுக தோற்றதே சாட்சி என்று சட்டசபையில் துணை சபாநாயகர் பொள்ளாச்சி ஜெயராமன் தெரிவித்துள்ளார். சென்னையில், 2006ம் ஆண்டில் உருட்டுக்கட்டை தேர்தல் நடைபெற்றதாக அவர் மேலும் கூறினார்.

மறைந்த முன்னாள் முதல்வர் ஜெயலலிதாவுக்கு பாரத ரத்னா விருது வழங்க வேண்டும் என்று துணை சபாநாயகர் பொள்ளாச்சி ஜெயராமன், சட்டசபையில் கோரிக்கை வைத்துள்ளார்.

சட்டசபை மாற்றுத்தலைவர்களாக ராஜன் செல்லப்பா, குமரகுரு, எஸ்.பி. சண்முகநாதன், நரசிம்மன், எஸ்.ரவினா குணசேகரன் உள்ளிட்டோர் செயல்படுவார்கள் என்று சபாநாயகர் தனபால் அறிவித்துள்ளார்.

குடியுரிமை திருத்த சட்டம் தொடர்பான விவாதத்திற்கு சபாநாயகர் அனுமதி அளிக்காததால், சட்டசபையிலிருந்து திமுக வெளிநடப்பு செய்துள்ளது. பத்திரிகையாளர்களை சந்தித்த திமுக தலைவர் ஸ்டாலின் கூறியதாவது, இதுதொடர்பாக, ஜனவரி 2ம் தேதியே நாங்கள் சபாநாயகரிடம் மனு வழங்கியுள்ளோம். இதுவரை அவர் எந்தவித நடவடிக்கையும் எடுக்கவில்லை என்று கூறினார்.

திமுக உடன் காங்கிரஸ், அதிமுக சின்னத்தில் நின்று வெற்றி பெற்ற தமீமுன் அன்சாரி உள்ளிட்டோர் வெளிநடப்பு செய்தனர்.

மேயர், நகராட்சி, பேரூராட்சி தலைவர் பதவிக்கு மறைமுக தேர்தல் நடத்த தமிழக சட்டப்பேரவையில் இன்று சட்டத்திருத்த மசோதா தாக்கல் செய்யப்பட உள்ளது

சட்டசபை 15 நிமிட ஒத்திவைப்புக்கு பிறகு மீண்டும் துவங்கியுள்ள நிலையில் கேள்வி - பதில் நேரம் நடைபெற்று வருகிறது.

தமிழக சட்டசபை முன்னாள் சபாநாயகர் பி.ஹெச். பாண்டியன் உள்ளிட்ட 13 எம்எல்ஏக்களின் மறைவுக்கு இரங்கல் தெரிவிக்கப்பட்ட நிலையில், சபை 15 நிமிடம் ஒத்திவைக்கப்பட்டது.

மறைந்த எம்எல்ஏக்கள் நல்லப்பன், வடிவேலு உள்ளிட்ட 13 பேருக்கு சட்டசபையில் இரங்கல் தெரிவிக்கப்பட்டதுடன் 2 நிமிடம் மவுன அஞ்சலி செலுத்தப்பட்டது.

கவர்னர் உரைக்கு நன்றி தெரிவிக்கும் தீர்மானம் நிறைவேற்றப்பட உள்ளது, அதன் பின்னர் அது தொடர்பான விவாதம் நடைபெறும் என்று அறிவிக்கப்பட்டுள்ளது.