வெந்தயத்தை ஊறவைத்து சாப்பிட்டால் பலன் இல்லையா? மருத்துவர் சிவராமனின் ஷாக்கிங் தகவல்

பார்ப்பதற்கு மிகச் சாதாரணமாக இருக்கும் வெந்தயத்தில் ஏராளமான மருத்துவ பயன்கள் நிறைந்திருப்பதாக மருத்துவர் சிவராமன் தெரிவித்துள்ளார். குறிப்பாக, நம் உடல் ஆரோக்கியத்தில் வெந்தயம் வகிக்கக் கூடிய பங்கினையும் அவர் விவரித்துள்ளார்.

முன்னர், வெந்தயத்தை நல்ல மனம் கொடுக்கக் கூடிய பொருளாக கருதினர். சீன மருத்துவத்தில் வெந்தயத்தை ஆண்மை பெருக்கியாக பயன்படுத்தியதாக சிவராமன் தெரிவித்துள்ளார். அதன் பின்னர், வெந்தயத்தில் நார்ச்சத்து அதிகமாக இருப்பதாக கண்டுபிடிக்கப்பட்டது. குறிப்பாக, கரையும் நார்ச்சத்து வெந்தயத்தில் நிறைந்திருக்கிறது. இவை இரத்தத்தில் கொழுப்பு படிவதை தடுக்கும்.

இத்தனை தகவல்களை கருத்திற்கொண்டு பார்த்தால் வெந்தயம் அற்புதமான மருத்துவ குணங்கள் நிறைந்தது எனத் தெரிய வருகிறது. இரத்தத்தில் உள்ள கொழுப்பை குறைக்கவும், ஈரலில் படிந்திருக்கும் கொழுப்பை கரைக்கவும் வெந்தயம் அதிகளவில் பயன்படுகிறது. இது பல ஆய்வு முடிவுகளில் கண்டறியப்பட்டதாக மருத்துவர் சிவராமன் குறிப்பிடுகிறார்.

வெந்தயத்தை இரவு முழுவதும் ஊறவைத்து சாப்பிடுவதாக பலரும் கூறுகின்றனர். சிலர் வெந்தயத்தை முளைகட்டியை பின்னர் சாப்பிடுவதாகவும் கூறுகின்றனர். இவ்வாறு செய்ய வேண்டுமென்ற அவசியம் இல்லை என மருத்துவர் சிவராமன் கூறுகிறார். இப்படி செய்வதன் மூலம் வெந்தயத்தின் கரையும் நார்ச்சத்தின் பயன்கள் குறையும் என அவர் தெரிவித்துள்ளார்.

வெந்தயம் முழுமையாக பயன்பட வேண்டுமென்றால் அதை அப்படியே சாப்பிட வேண்டும் என சிவராமன் பரிந்துரைத்துள்ளார். இல்லையென்றால், வெந்தயத்தை பொடியாக்கி காலை மற்றும் மாலையில் அரை ஸ்பூன் சாப்பிடலாம் எனவும் அவர் கூறுகிறார். ஊறவைத்து சாப்பிட்டால் வெந்தயத்தில் குளிர்ச்சி தன்மை தான் கிடைக்குமே தவிர சத்துகள் முழுமையாக கிடைக்காது என அவர் தெரிவித்துள்ளார்.

எனவே, சர்க்கரை நோயாளிகள் அல்லது கொலஸ்ட்ரால் இருப்பவர்கள் வெந்தயத்தை ஊறவைத்து சாப்பிட்டால் பலனளிக்காது என மருத்துவர் சிவராமன் கூறியுள்ளார்.

பொறுப்பு துறப்பு: இந்தக் கட்டுரை பொது தளத்தில்/ நாங்கள் தொடர்பு கொண்டு பேசிய நிபுணர்களிடம் இருந்து பெறப்பட்ட தகவல் அடிப்படையில் எழுதப்பட்டுள்ளது. இக்கட்டுரையில் குறிப்பிட்டு இருப்பதை நீங்கள் கடைபிடிக்கும் முன், உங்கள் குடும்ப மருத்துவர் அல்லது உங்கள் உடல்நலப் பயிற்சியாளரை அணுகும்படி கேட்டுக் கொள்கிறோம்.