குடியுரிமை திருத்த சட்ட எதிர்ப்பு போராட்டம் : 6 சிறப்பு அதிகாரிகள் நியமனம்

போலீஸாரைக் கண்டித்தும் சி.ஏ.ஏ, என்.ஆர்.சி ஆகியவற்றுக்கு எதிர்ப்புத் தெரிவித்தும் பழைய வண்ணாரப்பேட்டையில் உள்ள பென்சில் பேக்டரி அருகில் பெண்கள் காலவரையற்ற போராட்டத்தைத் தொடங்கியுள்ளனர். ஷாஹீன் பாக் போராட்டத்தைப் போலவே பெண்களால் இந்தப் போராட்டம் முன்னெடுக்கப்பட்டுள்ளது. வண்ணாரப்பேட்டைப் பகுதியில் இஸ்லாமியர்கள் நடத்திவரும் போராட்டம் 3வது நாளை எட்டியிருக்கிறது. போராட்டத்தில் ஈடுபட்ட பெண்கள் பேசுகையில், ``டெல்லி ஷாஹீன் பாக் போராட்டம் தேசிய அளவில் கவனத்தை ஈர்த்தது. அதேபோல் நாங்களும் போராட்டத்தை முன்னெடுத்திருக்கிறோம். மத்திய அரசு சி.ஏ.ஏவைத் திரும்பப் பெற வேண்டும்’’ என்றனர்.

தமிழக சட்டப் பேரவையில் குடியுரிமைத் திருத்தச் சட்டத்திற்கு எதிராக தீர்மானம் நிறைவேற்றும் வரை போராட்டம் தொடரும் என்று தமிழத்தின் பலபகுதிகளில் போராட்டம் நடத்திவரும் முஸ்லீம்கள் கோரிக்கை விடுத்துள்ளனர்.

குடியுரிமை திருத்த சட்டத்திற்கு எதிரான போராட்டங்களை கண்காணிக்க சட்டம் ஒழுங்கு கூடுதல் டிஜிபி மேற்பார்வையில் ஆறு அதிகாரிகள் நியமனம் செய்யப்பட்டுள்ளனர்.

சிலை கடத்தல் தடுப்புப்பிரிவு கூடுதல் டி.ஜி.பி. அபய்க்குமார் சிங் மதுரை மாநகர் மற்றும் மதுரை சரகத்திற்கும், கூடுதல் டி.ஜி.பி. மகேஷ்குமார் அகர்வால் திருநெல்வேலி மாநகர் மற்றும் நெல்லை சரகத்திற்கும் நியமிக்கப்பட்டுள்ளனர். இதேபோல் பொருளாதார குற்றப்பிரிவு ஐ.ஜி. முருகன் நெல்லை சரகத்திற்கு நியமிக்கப்பட்டுள்ளனர்.

நெல்லை மாவட்ட போலீஸ் சூப்பிரண்டு அலுவலகத்தைதமிழ்நாடு தவ்ஹீத் ஜமாத்தினர் முற்றுகையிட்டு போராட்டத்தில் ஈடுபட்டனர். இதனால் அந்த பகுதியில் போக்குவரத்து மாற்றம் செய்யப்பட்டு உள்ளது. இதையொட்டி அங்கு போலீஸ் பாதுகாப்பு போடப்பட்டு இருந்தது.

சிஏஏவுக்கு எதிரான போராட்டம் தொடர்ந்து வரும் நிலையில், முதல்வர் பழனிசாமியை, அவரது இல்லத்தில், டிஜிபி திரிபாதி, சென்னை போலீஸ் கமிஷனர் விஸ்வநாதன் உள்ளிட்டோர் சந்தித்து ஆலோசனை நடத்தியுள்ளனர்.

குடியுரிமை திருத்தச் சட்டத்துக்கு எதிராக கடந்த 14ம் தேதி சென்னை வண்ணாரப்பேட்டையில் இஸ்லாமியர்கள் போராட்டத்தில் ஈடுபட்டனர். இதில், காவல்துறையினர் போராட்டக்காரர்கள் மீது தடியடி நடத்தினர். இதைத்தொடர்ந்து இன்று மாநிலம் முழுவதும் இஸ்லாமிய அமைப்பைச் சேர்ந்தவர்கள் போலீஸாரின் தடியடியைக் கண்டித்து போராட்டங்களில் ஈடுபட்டு வருகின்றனர்.

குடியுரிமை சட்டத் திருத்தத்திற்கு எதிராக, சென்னை மண்ணடியில், இஸ்லாமியர்கள் இரவும் தொடர்ச்சியாக தர்ணா நடத்தி வருகிறார்கள். இதில் பெண்கள் மற்றும் குழந்தைகள் கணிசமாக பங்கேற்றுள்ளனர்.

இஸ்லாமியர்களின் இந்த போராட்டத்துக்கு தி.மு.க. எம்.பி.க்கள் தயாநிதி மாறன், டாக்டர் கலாநிதி வீராசாமி, மாவட்ட செயலாளர் பி.கே.சேகர்பாபு, தமிழக காங்கிரஸ் கட்சி தலைவர் கே.எஸ்.அழகிரி, இந்திய கம்யூனிஸ்டு கட்சியின் மூத்த தலைவர்கள் ஆர்.நல்லக்கண்ணு, தா.பாண்டியன், அ.ம.மு.க. பொருளாளர் வெற்றிவேல், விடுதலை சிறுத்தைகள் கட்சி பொருளாளர் முகமது யூசுப், ஆம் ஆத்மி தமிழக நிர்வாகி வசீகரன் உள்ளிட்ட அரசியல் கட்சி தலைவர்கள் நேரில் ஆதரவு தெரிவித்தனர்.